ନୂଆଦିଲ୍ଲୀ: ଦେଶର ବିଭିନ୍ନ ସ୍ଥାନରେ ଥିବା କାନାଡ଼ାର କୂଟନୀତିଜ୍ଞଙ୍କୁ ଭାରତ ବହିଷ୍କାର କରିବାର କିଛି ମାସ ପରେ କାନାଡା ମଧ୍ୟ ଭାରତୀୟ ଦୂତାବାସ କର୍ମଚାରୀଙ୍କୁ ହ୍ରାସ କରିଛି। ଜଣେ ହାଇ କମିସନ ଅଧିକାରୀ କହିଛନ୍ତି, କାନାଡା ସରକାର ଭାରତରେ ଆମର ମିସନ ନେଟୱର୍କରେ ଥିବା କିଛି କର୍ମଚାରୀ ହ୍ରାସକୁ କାର୍ଯ୍ୟକାରୀ କରିଛନ୍ତି। ଦେଶ ଭିତରେ କାର୍ଯ୍ୟକୁ ପ୍ରଭାବଶାଳୀ ଭାବରେ ପରିଚାଳନା କରିବା ପାଇଁ ଉପଲବ୍ଧ କାନାଡା କର୍ମଚାରୀଙ୍କ ସଂଖ୍ୟା ହ୍ରାସକୁ ଦୃଷ୍ଟିରେ ରଖି ଭାରତରେ କର୍ମଚାରୀ ହ୍ରାସ କରିବା ଅତ୍ୟନ୍ତ ଜରୁରୀ ଥିଲା ବୋଲି ସେ କହିଛନ୍ତି।

Advertisment

କାନାଡା ଭାରତରେ ଥିବା କାନାଡାବାସୀଙ୍କୁ ଦୂତାବାସ ସହାୟତା ଏବଂ ବାଣିଜ୍ୟ ଓ ବ୍ୟବସାୟିକ ବିକାଶ ପାଇଁ ମୁଖ୍ୟ ସେବା ପ୍ରଦାନ ଜାରି ରଖିବ। ଭାରତରେ କାନାଡାର ଭିସା ଆବେଦନ କେନ୍ଦ୍ରଗୁଡ଼ିକ ସ୍ୱାଭାବିକ ଭାବେ କାର୍ଯ୍ୟ କରୁଛି ବୋଲି ସେ କହିଛନ୍ତି। କୂଟନୈତିକ ଉତ୍ତେଜନା ସତ୍ତ୍ୱେ କାନାଡା ସରକାର କହିଛନ୍ତି ଯେ ଗସ୍ତ, ଚାକିରି, ଅଧ୍ୟୟନ କିମ୍ବା ସ୍ଥାୟୀ ବସବାସ ସମେତ ବିଭିନ୍ନ ଉଦ୍ଦେଶ୍ୟରେ ଭାରତୀୟ ନାଗରିକମାନଙ୍କୁ ସେମାନେ ସ୍ୱାଗତ କରୁଛନ୍ତି। କାନାଡାରେ ଜଣେ ଶିଖ୍ ବିଚ୍ଛିନ୍ନତାବାଦୀଙ୍କ ହତ୍ୟାକୁ ନେଇ ସୃଷ୍ଟି ହୋଇଥିବା ବିବାଦର କିଛି ସପ୍ତାହ ପରେ ଅକ୍ଟୋବରରେ କାନାଡାର ବୈଦେଶିକ ମନ୍ତ୍ରୀ ମେଲାନି ଜୋଲି କହିଥିଲେ ଯେ ଭାରତରେ ଥିବା କାନାଡାର ୬୨ ଜଣ କୂଟନୀତିଜ୍ଞଙ୍କ ମଧ୍ୟରୁ ୪୧ ଜଣଙ୍କୁ ହଟାଇ ଦିଆଯାଇଛି। ତେବେ କୂଟନୈତିକ ସମାନତା ପ୍ରତିଷ୍ଠା ପାଇଁ ଏହି ପଦକ୍ଷେପ ନିଆଯାଇଛି ବୋଲି ଭାରତ କହିଛି। ସେପ୍ଟେମ୍ବର ମାସରେ ପ୍ରଧାନମନ୍ତ୍ରୀ ଜଷ୍ଟିନ ଟ୍ରୁଡୋ ଖଲିସ୍ତାନୀ ଆତଙ୍କବାଦୀ ହରଦୀପ ନିଜାର ହତ୍ୟାକାଣ୍ଡରେ ଭାରତ ସରକାରଙ୍କ ଅଧିକାରୀଙ୍କ ସମ୍ପୃକ୍ତି ଥିବା ଅଭିଯୋଗ କରିବା ପରେ କୂଟନୈତିକ ବିବାଦ ଆରମ୍ଭ ହୋଇଥିଲା। ଭାରତ ଏହି ଦାବିକୁ ପ୍ରତ୍ୟାଖ୍ୟାନ କରିବା ସହ କାନାଡ଼ା ନିଜ ଅଞ୍ଚଳରେ ଭାରତ ବିରୋଧୀ କାର୍ଯ୍ୟକଳାପରେ ଆତ୍ମସନ୍ତୋଷ ପ୍ରକାଶ କରୁଥିବା ଅଭିଯୋଗ କରିଛି।