୧୦ ବର୍ଷ ପରେ କରାଚୀ ଏବଂ ଢାକା ମଧ୍ୟରେ ସିଧାସଳଖ ବିମାନ ସେବା: ପାକ୍ ଏୟାରଲାଇନ୍ସକୁ ଅନୁମତି ଦେଲେ ୟୁନୁସ୍ ସରକାର

ଢାକା:  ବାଂଲାଦେଶର ମହମ୍ମଦ ୟୁନୁସ୍‌ଙ୍କ ନେତୃତ୍ୱାଧୀନ ମଧ୍ୟବର୍ତ୍ତୀକାଳୀନ ସରକାର କରାଚୀ ଏବଂ ଢାକା ମଧ୍ୟରେ ସିଧାସଳଖ ବିମାନ ସେବା ପାଇଁ ଏକ ପାକିସ୍ତାନୀ ଘରୋଇ ବିମାନ କମ୍ପାନିକୁ ଅନୁମୋଦନ ଦେଇଛନ୍ତି।  ଦଶନ୍ଧି ପରେ ବାଂଲାଦେଶ-ପାକିସ୍ତାନର ଦୁଇଟି ପ୍ରମୁଖ ସହର ମଧ୍ୟରେ ବିମାନ ସଂଯୋଗ ପୁନଃସ୍ଥାପନ ପାଇଁ ବାଟ ଖୋଲିଛି। ଗତ କିଛି ମାସ ମଧ୍ୟରେ ବାଂଲାଦେଶ ଏବଂ ପାକିସ୍ତାନ ମଧ୍ୟରେ ସମ୍ପର୍କରେ ଦ୍ରୁତ ଉନ୍ନତି ହୋଇଛି।

ଏହି ନିଷ୍ପତ୍ତି ମଧ୍ୟ ଏଦିଗରେ ଏକ ବଡ଼ ପଦକ୍ଷେପ। ଗତ ବର୍ଷ ଅଗଷ୍ଟ ମାସରେ ବ୍ୟାପକ ବିରୋଧ ପ୍ରଦର୍ଶନ ପରେ ପୂର୍ବତନ ବାଂଲାଦେଶ ପ୍ରଧାନମନ୍ତ୍ରୀ ଶେଖ ହସିନାଙ୍କ ସରକାରର ପତନ ଘଟିଥିଲା। ଶେଖ ହସିନାଙ୍କୁ ଭାରତ-ସମର୍ଥକ ଭାବରେ ଦେଖାଯାଏ। ହସିନାଙ୍କ ପରେ ବାଂଲାଦେଶର ମଧ୍ୟବର୍ତ୍ତୀକାଳୀନ ସରକାରଙ୍କ ନେତୃତ୍ୱ ନେଉଥିବା ମହମ୍ମଦ ୟୁନୁସ୍ ପାକିସ୍ତାନ ସହିତ ସମ୍ପର୍କ ଉନ୍ନତ କରିବା ଉପରେ ଧ୍ୟାନ ଦେଉଛନ୍ତି।

ଦି ନ୍ୟୁଜ୍ ରିପୋର୍ଟ ଅନୁଯାୟୀ, ବାଂଲାଦେଶର ବେସାମରିକ ବିମାନ ଚଳାଚଳ କର୍ତ୍ତୃପକ୍ଷ (ସିଏଏବି)ର ଅଧ୍ୟକ୍ଷ ଏୟାର ଭାଇସ୍ ମାର୍ଶାଲ୍ ମହମ୍ମଦ ମଞ୍ଜୁର କବୀର କହିଛନ୍ତି ଯେ, ଏହି ରୁଟ୍‌ରେ ଏକ ଘରୋଇ ପାକିସ୍ତାନୀ ବିମାନ କମ୍ପାନିକୁ ଚଳାଚଳ କରିବାକୁ ଅନୁମତି ଦିଆଯାଇଛି। ତଥାପି, କାର୍ଯ୍ୟ ଆରମ୍ଭ କରିବା ପୂର୍ବରୁ ବିମାନ କମ୍ପାନିକୁ ବାଂଲାଦେଶରେ ଜଣେ ସ୍ଥାନୀୟ ଜେନେରାଲ ସେଲ୍ସ ଏଜେଣ୍ଟ (ଜିଏସଏ) ନିଯୁକ୍ତ କରିବାକୁ ପଡିବ। ପାକିସ୍ତାନ ଇଣ୍ଟରନ୍ୟାସନାଲ ଏୟାରଲାଇନ୍ସ (ପିଆଇଏ) ୨୦୧୫ ପର୍ଯ୍ୟନ୍ତ ଏହି ରୁଟ୍‌ରେ ସିଧାସଳଖ ବିମାନ ସେବା ଯୋଗାଇ ଆସୁଥିଲା। ଦଶ ବର୍ଷ ପରେ, କରାଚୀ ଏବଂ ଢାକା ମଧ୍ୟରେ ପୁଣି ଥରେ ବିମାନ ସେବା ଆରମ୍ଭ ହେବ।

ସିଏଏବି  ଅଧ୍ୟକ୍ଷ ମଞ୍ଜୁର କବୀର ଭୂୟାଁ କହିଛନ୍ତି ଯେ ବିମାନ ସେବା ପୁନଃ ଆରମ୍ଭ କରିବା ପୂର୍ବରୁ ପାକିସ୍ତାନୀ ବିମାନ କମ୍ପାନିକୁ ବାଂଲାଦେଶରେ ଏକ  ଜିଏସଏ ନିଯୁକ୍ତ କରିବାକୁ ପଡିବ। ଜିଏସଏ ହେଉଛି ଏକ ପ୍ରକାରର ସ୍ଥାନୀୟ ଏଜେଣ୍ଟ ଯାହା ଏୟାରଲାଇନ୍ସର ଟିକେଟ୍ ବିକ୍ରୟ ଏବଂ ଅନ୍ୟାନ୍ୟ ସେବାର ତଦାରଖ କରେ। ଜିଏସଏ ନିଯୁକ୍ତ ହେବା ପରେ, ବିମାନ କମ୍ପାନି ଉଡ଼ାଣର ସମୟ ଏବଂ କେତେଥର ଉଡ଼ାଣ କରାଯିବ ତାହା ସ୍ଥିର କରିବ।

ଅଧିକ ପଢ଼ନ୍ତୁ: ଆମେରିକାରେ କ୍ଷମତା ବଦଳାଇବା ଷଡ଼ଯନ୍ତ୍ର କରୁଛନ୍ତି ଏଲନ୍ ମସ୍କ!: ମହିଳା ସାଂସଦଙ୍କ ଅଭିଯୋଗ

ଢାକା-କରାଚି ରୁଟରେ ବିମାନ ଚଳାଚଳ ପାଇଁ ଅନୁମୋଦନ ପାଇଥିବା ବିମାନ କମ୍ପାନିର ନାମ ଏପର୍ଯ୍ୟନ୍ତ ସାର୍ବଜନୀନ କରାଯାଇ ନାହିଁ। ଏହି ଏୟାରଲାଇନ୍ସର ନାମ ଖୁବ୍ ଶୀଘ୍ର ଘୋଷଣା କରାଯାଇପାରେ। କବୀର କହିଛନ୍ତି ଯେ ସିଧାସଳଖ ବିମାନ ଚଳାଚଳ ଆରମ୍ଭ ହେବା ଦ୍ୱାରା ଦୁଇ ଦେଶ ମଧ୍ୟରେ ବାଣିଜ୍ୟ ଏବଂ ଗତିବିଧି ବୃଦ୍ଧି ପାଇବ। ଏହା ଉଭୟ ଦେଶର ସାଧାରଣ ଲୋକଙ୍କ ମଧ୍ୟରେ ସମ୍ପର୍କରେ ମଧ୍ୟ ଉନ୍ନତି ଆଣିବ।

ବାଂଲାଦେଶର ମଧ୍ୟବର୍ତ୍ତୀକାଳୀନ ସରକାରଙ୍କ ମୁଖ୍ୟ ପରାମର୍ଶଦାତା ଡକ୍ଟର ମହମ୍ମଦ ୟୁନୁସ୍ ଗତ ବର୍ଷ ସେପ୍ଟେମ୍ବରରେ ଜାତିସଂଘରେ ଦେଶର ସଦସ୍ୟତାର ୫୦ତମ ବାର୍ଷିକୀ ଅବସରରେ ନ୍ୟୁୟର୍କରେ ପାକିସ୍ତାନ ପ୍ରଧାନମନ୍ତ୍ରୀ ଶାହବାଜ ସରିଫଙ୍କୁ ଭେଟିଥିଲେ। ଉଭୟ ଦେଶର ଉଚ୍ଚପଦସ୍ଥ ଅଧିକାରୀମାନେ ମଧ୍ୟ ସାମ୍ପ୍ରତିକ ସମୟରେ ଅନେକ ବୈଠକ କରିଛନ୍ତି। ଏହା ସ୍ପଷ୍ଟ ଯେ ଦୀର୍ଘ ସମୟ ଧରି ଉତ୍ତେଜନାପୂର୍ଣ୍ଣ ସମ୍ପର୍କ ପରେ, ଉଭୟ ଦେଶ ସମ୍ପର୍କକୁ ସୁଧାରିବା ପାଇଁ କାମ କରୁଛନ୍ତି।

ଅଧିକ ପଢ଼ନ୍ତୁ: ଅଗ୍ନିଶମ କର୍ମଚାରୀଙ୍କ ଭତ୍ତା ବୃଦ୍ଧି କଲେ ରାଜ୍ୟ ସରକାର