ମୁମ୍ବାଇ: ଶିବସେନା ନେତା ସଞ୍ଜୟ ରାଉତ ଗୁରୁବାର କହିଛନ୍ତି ଯେ ବିଦ୍ରୋହୀମାନେ ସେମାନଙ୍କ ରାସ୍ତା ବାଛିଛନ୍ତି ଏବଂ ଭାରତୀୟ ଜନତା ପାର୍ଟି (ବିଜେପି) ସହିତ ସାମିଲ ହେବା ପାଇଁ ନିଷ୍ପତ୍ତ ନେଇଛନ୍ତି। ଅସନ୍ତୁଷ୍ଟଙ୍କ ପଥରେ ଦଳ ତରଫରୁ କୌଣସି ପ୍ରତିବନ୍ଧକ ରହିବ ନାହିଁ ଏବଂ ସେନା ନୂତନ ସରକାରରେ ଗଠନମୂଳକ ବିରୋଧୀର ଭୂମିକା ଗ୍ରହଣ କରିବ।
ମୁଖ୍ୟମନ୍ତ୍ରୀ ପଦରୁ ସେନା ସଭାପତି ଉଦ୍ଧବ ଠାକରେ ଇସ୍ତଫା ଦେବାର ଗୋଟିଏ ଦିନ ପରେ ଶ୍ରୀ ରାଉତ କହିଛନ୍ତି ଯେ ଅସନ୍ତୁଷ୍ଟ ନେତାମାନେ ଶିବସେନାରୁ ଅଲଗା ହେବାର ନିଷ୍ପତ୍ତି ପାଇଁ ‘ଅନୁତପ୍ତ’ ହେବେ ଏବଂ ଏଥିପାଇଁ ‘ପଶ୍ଚାତାପ’ ମଧ୍ୟ କରିବେ। ଏଥିସହ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ପକ୍ଷରୁ ତାଙ୍କୁ ଦିଆଯାଇଥିବା ସମନର ପ୍ରତିକ୍ରିୟାରେ ସେ କହିଛନ୍ତି ଶୁକ୍ରବାର ଦିନ ସେ ପ୍ରବର୍ତ୍ତନ ନିର୍ଦ୍ଦେଶାଳୟ କାର୍ଯ୍ୟାଳୟକୁ ଯିବେ ଏବଂ ତାଙ୍କ ସ୍ଥିତି ସ୍ପଷ୍ଟ କରିବେ।
Sambad is now on WhatsApp
Join and get latest news updates delivered to you via WhatsApp
ଶ୍ରୀ ରାଉତ କହିଛନ୍ତି, ବିଦ୍ରୋହୀ ନେତାମାନେ ଏଥିପାଇଁ ଦୁଃଖିତ ହେବେ ଯେ ଏକନାଥ ସିନ୍ଦେ (ବିଦ୍ରୋହୀ ବିଧାୟକଙ୍କ ନେତା) ଜଣେ କଠୋର ଶିବ ସୈନିକ ଥିଲେ ଏବଂ ଅନେକ ବର୍ଷ ଧରି ଦଳ ପାଇଁ କାମ କରିଥିଲେ। ସେହିପରି ଗୁଲାବରାଓ ପାଟିଲ, ସନ୍ଦିିପାନ ଭୁମ୍ରେ ଏବଂ ଅନେକ (ଯେଉଁମାନେ ସିନ୍ଦେ ଶିବିରରେ ଅଛନ୍ତି) ସେମାନେ ଏବେ କ୍ଷମତା ମୋହରେ ଏପରି ପଥ ବାଛିଛନ୍ତି। ଆମେ ସେମାନଙ୍କ ପଥରେ କୌଣସି ପ୍ରତିବନ୍ଧକ ସୃଷ୍ଟି କରିବୁ ନାହିଁ। ସେମାନେ ସେମାନଙ୍କର ନୂତନ ସମ୍ପର୍କ ବିଜେପି ସହିତ ସ୍ଥାପନ କରିପାରନ୍ତି। ଆମେ ଆମର କାର୍ଯ୍ୟ କରିବୁ। ବର୍ତ୍ତମାନ ଆମର ପଥ ଭିନ୍ନ … ଆମେ ଏକ ଗଠନମୂଳକ ବିରୋଧୀ ଭାବରେ କାର୍ଯ୍ୟ କରିବୁ ବୋଲି ସେ ସ୍ପଷ୍ଟ କରି ଦେଇଛନ୍ତି।
ବିଜେପିର ନାମ ନ ନେଇ ରାଉତ କହିଛନ୍ତି ଯେ ସେନା ବିଧାୟକଙ୍କ ଉପରେ ଚାପ ପକାଇବା ପାଇଁ ଦାୟୀ ବ୍ୟକ୍ତିମାନଙ୍କ ବିଷୟରେ ସେ ଭଲ ଭାବରେ ଅବଗତ ଅଛନ୍ତି, ଯାହା ଦଳରେ ବିଦ୍ରୋହର କାରଣ ହୋଇଥିଲା। ଉଦ୍ଧବ ଠାକରେଙ୍କ ନେତୃତ୍ୱାଧୀନ ସରକାର ଉପରେ ସମସ୍ତଙ୍କର ବିଶ୍ୱାସ ଥିଲା। ଜାତୀୟତାବାଦୀ କଂଗ୍ରେସ ଦଳର ମୁଖ୍ୟ ଶରଦ ପାୱାର ହୁଅନ୍ତୁ କିମ୍ବା କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀ ହୁଅନ୍ତୁ, ସମସ୍ତେ ଉଦ୍ଧବ ଠାକରେଙ୍କୁ ବିଶ୍ୱାସ କରିଥିଲେ ବୋଲି ସେ କହିଛନ୍ତି। କିନ୍ତୁ ପ୍ରଥମ ଦିନରୁ ସରକାରଙ୍କୁ ଗାଦିଚ୍ୟୁତ କରିବା ପାଇଁ ପ୍ରୟାସ ଚାଲିଥିଲା ଏବଂ ଆମେ ଏ ବିଷୟରେ ଅବଗତ ଥିଲୁ। କେନ୍ଦ୍ରୀୟ ଏଜେନ୍ସିକୁ ବ୍ୟବହାର କରି ଚାପ ସୃଷ୍ଟି କରା ଯାଉଥିଲା।
ସେ କହିଥିଲେ ଯେ ମହା ବିକାଶ ଅଘାଦି (ଏମଭିଏ) ଗଠନ ଏକ ‘ଆତ୍ମସମ୍ମାନ ପାଇଁ ଲଢେଇ’ ଥିଲା। ଶିବ ସୈନିକଙ୍କୁ ମୁଖ୍ୟମନ୍ତ୍ରୀ କରି ସ୍ୱର୍ଗତ ଶିବସେନା ସୁପ୍ରିମୋ ବାଲାସହେବ ଠାକରେଙ୍କ ସ୍ୱପ୍ନକୁ ପୂରଣ କରିବା ଥିଲା ଲକ୍ଷ୍ୟ। ଏବେ ବିଦ୍ରୋହୀ ବିଧାୟକମାନେ ଶିବ ସୈନିିକଙ୍କୁ ମୁଖ୍ୟମନ୍ତ୍ରୀ କରି ପାରିବେ କି ବୋଲି ଶ୍ରୀ ରାଉତ ପ୍ରଶ୍ନ କରିଛନ୍ତି।
ବିଦ୍ରୋହୀମାନେ କଂଗ୍ରେସ ଏବଂ ଏନସିପି ସହିତ ସମ୍ପର୍କକୁ ଦଳ ବିରୋଧରେ ବିଦ୍ରୋହ କରିବାର ମୁଖ୍ୟ କାରଣ ବୋଲି ଦର୍ଶାଇଛନ୍ତି। ଏହି ବାହାନା ଦେଉଥିବା ଅନେକ ବିଦ୍ରୋହୀ ବିଧାୟକ ପୂର୍ବରୁ ଏନସିପି ସହିତ ଥିଲେ ଏବଂ ଏହି ବିଧାୟକମାନଙ୍କ ମଧ୍ୟରୁ ଅନେକ ମନ୍ତ୍ରୀ ହେବା ପାଇଁ ଶିବସେନାରେ ଯୋଗ ଦେଇଥିଲେ ବୋଲି ସେ କହିଛନ୍ତି। ଏହି ପରିପ୍ରେକ୍ଷୀରେ ଶ୍ରୀ ରାଉତ କହିଛନ୍ତି, ‘ଶିବସେନା କ୍ଷମତା ପାଇଁ ଜନ୍ମ ହୋଇନାହିଁ, କିନ୍ତୁ ଶିବସେନା ପାଇଁ କ୍ଷମତା ଜନ୍ମ ହୋଇଛି’।