ଅଫିସକୁ ଜିନ୍ସ ଓ ଟିସାର୍ଟ ପିନ୍ଧି ନ ଆସିବାକୁ ନିର୍ଦ୍ଦେଶ ଦେଲେ ଜିଲ୍ଲାପାଳ
ଲକ୍ଷ୍ନୌ : ଅଫିସକୁ ଜିନ୍ସ ଓ ଟିସାର୍ଟ ପିନ୍ଧି ନ ଆସିବାକୁ ନିର୍ଦ୍ଦେଶନାମା ଜାରି କରିଛନ୍ତି ଜିଲ୍ଲାପାଳ | ନିର୍ଦ୍ଦେଶକୁ ଅବମାନନା କଲେ ଦୃଢ କାର୍ଯ୍ୟାନୁଷ୍ଠାନ ନିଆଯିବ ବୋଲି କୁହାଯାଇଛି | ଉତ୍ତରପ୍ରଦେଶର ସମ୍ବଲ ଜିଲ୍ଲାରୁ ଏହି ଖବର ଆସିଥିବାବେଳେ ଜିଲ୍ଲାପାଳ ସଞ୍ଜୀବ ରଂଜନ ଏଭଳି ନିର୍ଦ୍ଦେଶ ଦେଇଛନ୍ତି। ଏହି ଆଦେଶ ଅନୁଯାୟୀ, ସରକାରୀ କାର୍ଯ୍ୟାଳୟକୁ ଆସୁଥିବା ଅଧିକାରୀମାନେ ଜିନ୍ସ ଏବଂ ଟି-ସାର୍ଟ ପିନ୍ଧି ଅଫିସକୁ ଆସିପାରିବେ ନାହିଁ। କେବଳ ଏତିକି ନୁହେଁ, ଏଭଳି କରିବା ଦ୍ୱାରା କର୍ମଚାରୀଙ୍କ ମଧ୍ୟରେ କାମ ପ୍ରତି ଅଧିକ ନିଷ୍ଠା ଆଣିବାରେ ସାହାଯ୍ୟ କରିବ |
Sambad is now on WhatsApp
Join and get latest news updates delivered to you via WhatsApp
ସୂଚନା ଥାଉ ଯେ ଜିଲ୍ଲାପାଳ ତାଙ୍କ ଆଦେଶରେ କହିଛନ୍ତି ଯେ ଯିଏ ଏହି ନିୟମ ଉଲ୍ଲଂଘନ କରିବେ ସମ୍ପୃକ୍ତ କର୍ମଚାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ସଞ୍ଜୀବ ରଂଜନଙ୍କୁ ଗତ ମାସରେ ଗୋରଖପୁର ବିକାଶ ପ୍ରାଧିକରଣର ସିଇଓ ଭାବରେ ନିଯୁକ୍ତି ଦିଆଯାଇଥିଲା | ଆଉ ନିକଟରେ ତାଙ୍କୁ ସମ୍ୱଲର ଜିଲ୍ଲାପାଳ ଭାବରେ ବଦଳି କରାଯାଇଥିଲା। ସମ୍ୱଲ ଜିଲ୍ଲାର ଦାୟିତ୍ୱ ଗ୍ରହଣ କରିବା ପରେ ଏଭଳି ନିର୍ଦ୍ଦେଶନାମା ଜାରି କରିଛନ୍ତି |
ଜିଲ୍ଲାପାଳଙ୍କ କହିବା ମୁତାବକ କେବଳ କିଛି ଲୋକ ହିଁ ନିୟମ ମାନିଥାନ୍ତି | ଅଧିକାଂଶ କର୍ମଚାରୀ ଟି-ସାର୍ଟ ଏବଂ ଜିନ୍ସ ପିନ୍ଧି ଆସୁଛନ୍ତି | ଯାହାଦ୍ୱାରା ସରକାରୀ କର୍ମଚାରୀଙ୍କ ଆଚରଣ ସଂହିତା ଉଲ୍ଲଂଘନ ହେଉଛି | ତେଣୁ ଜିଲ୍ଲାର ସମସ୍ତ ସରକାରୀ ବିଭାଗର ଅଧିକାରୀ ଏବଂ କର୍ମଚାରୀଙ୍କ ପାଇଁ ଏଭଳି ପୋଷାକ ନ ପିନ୍ଧିବା ପାଇଁ ନିୟମ ଲାଗୁ କରାଯାଇଛି |