ମହିଳାଙ୍କ ମୁହଁରୁ ୪ଫୁଟ ଲମ୍ବାର ସାପ ବାହାର କଲେ ଡାକ୍ତର
ନୂଆଦିଲ୍ଲୀ: ପାଟି ଖୋଲି ଶୋଇବାର ପରିଣାମ କେତେ ଭୟଙ୍କର ହୋଇପାରେ, ତାହାର ଏକ ଉଦାହରଣ ଋଷରେ ଦେଖିବାକୁ ମିଳିଛି | ଖୋଲା ପାଟିକୁ ଗାତ ବୋଲି ଭାବି ଚାରି ଫୁଟ ଲମ୍ବର ଏକ ସାପ ମହିଳାଙ୍କ ଶରୀର ଭିତରକୁ ପ୍ରବେଶ କରିବା ଘଟଣା ଏବେ ଚାରିଆଡ଼େ ଚର୍ଚ୍ଚାର ବିଷୟ ପାଲଟିଛି | ଘଟଣା ବିଷୟରେ ଶୁଣି ଆଶ୍ଚର୍ଯ୍ୟ ଲାଗୁଥିଲେ ମଧ୍ୟ ସତ। ଯେତେବେଳେ ମହିଳାଙ୍କୁ ନିଶ୍ୱାସ ନେବାରେ ଅସୁବିଧା ହୋଇଥିଲା, ସେ ଡାକ୍ତରଙ୍କ ପାଖକୁ ଯାଇଥିଲେ। ଡାକ୍ତରମାନେ ବେକ ଭିତରକୁ ଏକ ପାଇପ୍ ଲଗାଇ ପାଟିରୁ ସାପଟିକୁ ବାହାର କରିଥିଲେ ବୋଲି ଜଣା ପଡ଼ିଛି।
Sambad is now on WhatsApp
Join and get latest news updates delivered to you via WhatsApp
ଡେଲି ମେଲର ଖବର ଅନୁଯାୟୀ, ଋଷର ଦାଗେସ୍ତାନର ଲେଭାସି ଗାଁରେ ରହୁଥିବା ଜଣେ ମହିଳା ତାଙ୍କ ଘରର ବଗିଚାରେ ଶୋଇଥିଲେ। ଶୋଇବା ସମୟରେ ତାଙ୍କ ପାଟି ଖୋଲା ଥିବାରୁ ବଗିଚାରେ ଥିବା ଚାରି ଫୁଟ ଲମ୍ବା ପତଳା ସାପଟି ତାଙ୍କ ପାଟି ଦେଇ ତାଙ୍କ ଶରୀର ଭିତରକୁ ଚାଲି ଯାଇଥିଲା। ଏହା ପରେ ମହିଳାଙ୍କୁ ନିଶ୍ବାସ ନେବାରେ ଅସୁବିଧା ହେବା ସହ ତାଙ୍କ ସ୍ବାସ୍ଥ୍ୟାବସ୍ଥା ଖରାପ ହେବାକୁ ଲାଗିଥିଲା। ପରିବାର ଲୋକେ ଡାକ୍ତରଖାନା ନେବା ପରେ ମହିଳାଙ୍କୁ ତୁରନ୍ତ ସାଧାରଣ ଆନାସ୍ଥେସିଆ ଦିଆଯାଇଥିଲା। ଏହା ପରେ ଡାକ୍ତରମାନେ ମହିଳାଙ୍କ ବେକରେ ଏକ ଭିଡିଓ କ୍ୟାମେରା ଏବଂ ହାଲୁକା ଟ୍ୟୁବ୍ ରଖିଥିଲେ। କ୍ୟାମେରା ସାହାଯ୍ୟରେ ସାପଟି କେଉଁଠି ଅଛି ଦେଖି ଡାକ୍ତର ତାର ଲାଞ୍ଜକୁ ଧରି ଧିରେ ଧିରେ ବାହାରକୁ ଆଣିଥିଲେ।
ସାପକୁ ବାହାରକୁ ଆଣିବା ପରେ ତା’ର ଲମ୍ବକୁ ଦେଖି ଡାକ୍ତର ଆଶ୍ଚର୍ଯ୍ୟ ହୋଇଯାଇଥିଲେ। ତେବେ ସାପ ଜୀବନ୍ତ ବାହାରକୁ ଆସିଛି ନା ମୃତ ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ। ଏହି ଘଟଣା ପରଠାରୁ, ଋଷର ଦାଗେସ୍ତାନର ପ୍ରଶାସନ ଲୋକଙ୍କୁ ଘର ବାହାରେ ଶୋଇବାକୁ ବାରଣ କରିଛନ୍ତି।