ରାଜନୈତିକ ଦଳମାନକୁ ୨ ହଜାର ଟଙ୍କାରୁ ଅଧିକ ଦାନ ଦେଲେ ପରିଚୟ ଗୋପନ ରହିବ ନାହିଁ : ନିର୍ବାଚନ ଆୟୋଗଙ୍କ ପ୍ରସ୍ତାବ
ନୂଆଦିଲ୍ଲୀ : ରାଜନୈତିକ ଦଳମାନଙ୍କ ପାଖକୁ ଆସୁଥିବା ଅର୍ଥ ଦାନକୁ ନିୟନ୍ତ୍ରଣ କରାଯିବା ଉଚିତ । ଏପରି ନହେଲେ ରାଜନୈତିକ ଅର୍ଥଯୋଗାଣରେ ସ୍ବଚ୍ଛତା ଆସିବ ନାହିଁ ବୋଲି ଭାରତର ନିର୍ବାଚନ ଆୟୋଗ ମତ ପ୍ରକାଶ କରିଛନ୍ତି ।
Sambad is now on WhatsApp
Join and get latest news updates delivered to you via WhatsApp
କେନ୍ଦ୍ର ଆଇନ ମନ୍ତ୍ରୀ କିରେନ ରିଜିଜୁଙ୍କ ନିକଟକୁ ଏକ ଚିଠା ପ୍ରସ୍ତାବ ଦାଖଲ କରି ଆୟୋଗ ପକ୍ଷରୁ କୁହାଯାଇଛି ଯେ ରାଜନୈତିକ ପାଣ୍ଠି ଯୋଗାଣକୁ ସ୍ବଚ୍ଛ କରିବାକୁ ହେଲେ ଜନପ୍ରତିନିଧି ଆଇନରେ କେତେକ ସଂଶୋଧନ ଅଣାଯିବା ଆବଶ୍ୟକ ।
ଆୟୋଗଙ୍କ ପକ୍ଷରୁ ଦିଆଯାଇଥିବା ପ୍ରସ୍ତାବ ଅନୁସାରେ ରାଜନୈତିକ ଦଳମାନଙ୍କୁ ଦିଆଯାଉଥିବା ଦାନର ପରିମାଣ ୨ ହଜାର ଟଙ୍କାରୁ ଅଧିକ ହେଲେ ଦାତାଙ୍କ ପରିଚୟ ଗୋପନ ରଖାଯାଇପାରିବ ନାହିଁ । ବର୍ତ୍ତମାନ ଏହି ସୀମା ୨୦ ହଜାର ଟଙ୍କା ରହିଛି । ଆହୁରି ମଧ୍ୟ ଗୋଟିଏ ରାଜନୈତିକ ଦଳ ନିକଟକୁ ଆସୁଥିବା ମୋଟ ଦାନର କେବଳ ୨୦ ପ୍ରତିଶତ ଅଥବା ୨୦ କୋଟି (ଯେଉଁଟି କମ) ନଗଦ ଟଙ୍କା ଆକାରରେ ଆସିପାରିବ ।
ଅନ୍ୟପକ୍ଷରେ ନିର୍ବାଚନରେ ଛିଡ଼ା ହେଉଥିବା ଜଣେ ପ୍ରାର୍ଥୀ ଏକ ସ୍ବତନ୍ତ୍ର ବ୍ୟାଙ୍କ ଖାତା ଖୋଲିବେ । ଏହି ବ୍ୟାଙ୍କ ଖାତାରେ ହିଁ ନିର୍ବାଚନ ସଂପର୍କିତ ଅର୍ଥ ଆସିବ ଓ ବ୍ୟୟ କରାଯିବ । ଯଦି ଜଣେ ପ୍ରାର୍ଥୀ ଉଭୟ ବିଧାୟକ ଓ ସାଂସଦ ଭାବେ ଛିଡ଼ା ହେଉଛନ୍ତି ସେ ଦୁଇଟି ଅଲଗା ଅଲଗା ବ୍ୟାଙ୍କ ଖାତା ଖୋଲିବେ । ଏହା ଦ୍ବାରା ନିର୍ବାଚନ ଆୟୋଗଙ୍କ ପକ୍ଷରୁ ସଂପୃକ୍ତ ପ୍ରାର୍ଥୀଙ୍କ ଖର୍ଚ୍ଚର ତଦାରଖ କରିବା ସହଜ ହେବ ।