ବିହାର : ପ୍ରକାଶ ପାଇଲା ଚିଠା ଭୋଟର ତାଲିକା

ପାଟନା: ଚଳିତ ବର୍ଷ ବିହାରରେ ବିଧାନସଭା ନିର୍ବାଚନ ହେବାକୁ ଯାଉଛି। ଭୋଟର ତାଲିକାର ସଠିକତା ଏବଂ ନିରପେକ୍ଷତା ସୁନିଶ୍ଚିତ କରିବା ପାଇଁ ବିହାରରେ ଭୋଟର ତାଲିକା ସଂଶୋଧନ ଅଭିଯାନ (ଏସଆଇଆର) କରାଯାଇଥିଲା। ଏହି ଅଭିଯାନ ଗୋଟିଏ ମାସ ଧରି ଚାଲିଥିଲା। ଏବେ ଏହା ଶେଷ ହୋଇଛି। ଏହା ପରେ, ଆଜି ନିର୍ବାଚନ କମିସନ ଭୋଟର ତାଲିକାର ଚିଠା ପ୍ରକାଶ କରିଛନ୍ତି। ଭୋଟରମାନେ ନିର୍ବାଚନ କମିସନଙ୍କ ୱେବସାଇଟ୍ ପରିଦର୍ଶନ କରି ଅନଲାଇନରେ ନିଜ ନାମ ଦେଖିପାରିବେ। ଏଥିପାଇଁ ନିର୍ବାଚନ କମିଶନଙ୍କ ଦ୍ୱାରା ଏକ ଲିଙ୍କ୍ ଜାରି କରାଯାଇଛି। ପ୍ରତ୍ୟେକ ଜିଲ୍ଲାର ତଥ୍ୟ ପ୍ରକାଶ କରାଯାଇଛି।

ବିହାରର ସମସ୍ତ ୩୮ ଜିଲ୍ଲାରେ ଜିଲ୍ଲା ନିର୍ବାଚନ ଅଧିକାରୀଙ୍କ ଦ୍ୱାରା ସ୍ୱୀକୃତିପ୍ରାପ୍ତ ରାଜନୈତିକ ଦଳଗୁଡ଼ିକୁ ଭୋଟର ତାଲିକାର ଡିଜିଟାଲ୍ ଏବଂ ପ୍ରିଣ୍ଟ କପି ଦିଆଯାଇଛି। ଏହା ସହିତ, ୨୪୩ ବିଧାନସଭା ନିର୍ବାଚନ ମଣ୍ଡଳୀର ନିର୍ବାଚନ ଅଧିକାରୀମାନେ ମଧ୍ୟ ଭୋଟର ଏବଂ ଦଳମାନଙ୍କଠାରୁ ଦାବି ଏବଂ ଆପତ୍ତି ଗ୍ରହଣ କରିବେ। ଏହି ସମୟ ମଧ୍ୟରେ, ଯେକୌଣସି ବ୍ୟକ୍ତି ତାଙ୍କ ନାମ ଯୋଡିବା, ହଟାଇବା କିମ୍ବା ଭୁଲ ସୂଚନା ସଂଶୋଧନ କରିବା ପାଇଁ ଆବେଦନ କରିପାରିବେ। ଦାବି ଏବଂ ଆପତ୍ତି ସେପ୍ଟେମ୍ବର ୧ ପର୍ଯ୍ୟନ୍ତ ପଞ୍ଜିକୃତ କରାଯାଇପାରିବ।