ନୂଆଦିଲ୍ଲୀ : ଦେଶରେ କରୋନା ସଂକ୍ରମଣର ୨ୟ ଲହର ଚାଲିଥିବାବେଳେ ଡାକ୍ତରଖାନାଗୁଡ଼ିକରେ ଅକ୍ସିଜେନ ସିଲିଣ୍ଡରର ଅଭାବ ଦେଖାଦେଇଛି । ଏହାକୁ ଦୃଷ୍ଟିରେ ରଖି ଡିଆରଡିଓ ପକ୍ଷରୁ ଏକ ସ୍ବତନ୍ତ୍ର ପ୍ରକାରର ଅକ୍ସିଜେନ ଡେଲିଭରୀ ସିଷ୍ଟମ ତିଆରି କରାଯାଇଛି ଯାହାକି ବର୍ତ୍ତମାନର ପରିସ୍ଥିତିର ବେଶ ଉପଯୋଗୀ ହୋଇପାରିବ ।
Sambad is now on WhatsApp
Join and get latest news updates delivered to you via WhatsApp
ଏହି ଏସପିଓଟୁ ଭିତ୍ତିକ ଅକ୍ସିଜେନ ଡେଲିଭରୀ ସିଷ୍ଟମକୁ ମୁଖ୍ୟତଃ ଉଚ୍ଚ ପାହାଡ଼ିଆ ଅଂଚଳରେ ମୁତୟନ ହୋଇଥିବା ସୈନିକମାନଙ୍କ ପାଇଁ ପ୍ରସ୍ତୁତ କରାଯାଇଛି । ଉଚ୍ଚ ପାର୍ବତ୍ୟାଞ୍ଚଳରେ ବାୟୁମଣ୍ଡଳରେ ଅମ୍ଳଜାନ ପରିମାଣ କମ ଥିବାରୁ ସୈନିକମାନଙ୍କ ରକ୍ତରେ ବି ଅମ୍ଳଜାନ ପରିମାଣ କମିଯାଏ । ଫଳରେ ସେମାନେ ହାଇପକ୍ସିଆ ନାମକ ସ୍ଥିତିରେ ପଡ଼ିଯାଆନ୍ତି, ଯାହାକି ମୃତ୍ୟୁର କାରଣ ହୋଇଥାଏ । ଏହି ସମସ୍ୟାର ସମାଧାନ କରିବାକୁ ଡିଆରଡିଓ ବିଗତ କିଛି ବର୍ଷର ଗବେଷଣା ପରେ ଏହି ଅକ୍ସିଜେନ ଡେଲିଭରୀ ସିଷ୍ଟମକୁ ପ୍ରସ୍ତୁତ କରିଛି ।
କରୋନା ରୋଗୀ ମଧ୍ୟ ସମାନ ସମସ୍ୟାର ସମ୍ମୁଖୀନ ହୋଇଥାନ୍ତି । ରକ୍ତରେ ଅମ୍ଳଜାନର ପରିମାଣ କମିଯାଉଥିବାରୁ ରୋଗୀ ମୃତ୍ୟୁମୁଖରେ ପଡ଼ିଥାଏ । ଏଣୁ ଡିଆରଡିଓର ନୂଆ ଅକ୍ସିଜେନ ଡେଲିଭରୀ ସିଷ୍ଟମଟି କରୋନା ରୋଗୀଙ୍କ ପାଇଁ ମଧ୍ୟ ବରଦାନ ସାବ୍ୟସ୍ତ ହେବ । ବିଶେଷକରି ଏହି ଉପକରଣଟି ଶସ୍ତା ଓ ବ୍ୟବହାର କରିବାକୁ ସହଜ ହୋଇଥିବାରୁ ତାହା ବର୍ତ୍ତମାନର ପରିସ୍ଥିତିରେ ବେଶ ଉପଯୋଗୀ ହେବ ।