ବସ ଚଳାଉଥିବା ବେଳେ ହୃଦଘାତରେ ହେଲା ଡ୍ରାଇଭରଙ୍କ ମୃତ୍ୟୁ; ଲୋକଙ୍କ ଉପରକୁ ମାଡ଼ିଗଲା ବସ; ଦୁର୍ଘଟଣା ଘଟି ୨ ମୃତ, ୭ ଆହତ
ଭୋପାଳ: ମଧ୍ୟପ୍ରଦେଶର ଜବଲପୁରରେ ଏକ ଚଳନ୍ତା ବସର ଡ୍ରାଇଭରଙ୍କର ବସ ଚଳାଉଥିବା ସମୟରେ ହୃଦଘାତରେ ମୃତ୍ୟୁ ହେବା ପରେ ବସ୍ଟି ଭାରସାମ୍ୟ ହରାଇ ଲୋକଗହଳି ଭିତରକୁ ପଶି ଯାଇଥିଲା। ପରେ ନିୟନ୍ତ୍ରଣ ହରାଇଥିବା ବସ୍ଟି ଅନ୍ୟ ଯାନ ସହିତ ଧକ୍କା ହୋଇଥିଲା। ଯାହା ଫଳରେ ଦୁର୍ଘଟଣାରେ ୨ ଜଣଙ୍କର ମୃତ୍ୟୁ ହେବା ସହ ୭ରୁ ଅଧିକ ଲୋକ ଆହତ ହୋଇଥିଲେ।
Sambad is now on WhatsApp
Join and get latest news updates delivered to you via WhatsApp
ପ୍ରତ୍ୟକ୍ଷଦର୍ଶୀଙ୍କ କହିବା ଅନୁସାରେ, ଦୁର୍ଘଟଣା ଘଟାଇଥିବା ସିଟି ବସ୍ଟି ଗୋହାଲପୁର ପୁଲିସ ଷ୍ଟେସନ ଅଞ୍ଚଳ ଦେଇ ଯାଉଥିବା ବେଳେ ଏହା ହଠାତ ନିଜ ରାସ୍ତାରୁ ବିଚ୍ୟୁତ ହୋଇ ଅଟକିବା ପୂର୍ବରୁ ଏକ ମୋଟରସାଇକେଲ ଉପରେ ଚଢ଼ି ଯାଇଥିଲା। ପରେ ବସ୍ଟି ଟ୍ରାଫିକରେ ନାଲି ସିଗନାଲରେ ଅଟକି ଥିବା ଗାଡିଗୁଡ଼ିକୁ ଧକ୍କା ଦେଇଥିଲା। ଦୁର୍ଘଟଣା ସମୟରେ, ଏକ ଦୁଇ ଚକିଆ ଯାନକୁ ମଧ୍ୟ ବସଟି ଟାଣି ନେଇଥିଲା।
ଘଟଣାସ୍ଥଳରେ ପହଞ୍ଚିଥିବା ପୁଲିସ ଅଧିକାରୀମାନେ ଆହତ ବ୍ୟକ୍ତି ଏବଂ ତାଙ୍କ ସିଟରେ ପଡ଼ିଥିବା ଡ୍ରାଇଭରଙ୍କୁ ନିକଟସ୍ଥ ଡାକ୍ତରଖାନାକୁ ନେଇଥିଲେ। ହୃଦଘାତରେ ଡ୍ରାଇଭରର ମୃତ୍ୟୁ ହୋଇଥିବା ଡାକ୍ତର ପୁଲିସକୁ ସୂଚନା ଦେଇଛନ୍ତି। ବସ୍ଟି ରାଣୀତାଲ ଅଭିମୁଖେ ଯାଉଥିଲା।