ମୁଖ୍ୟମନ୍ତ୍ରୀଙ୍କ ଭାଉଜ, ପତ୍ନୀ ଓ ଭଉଣୀ ବି ଦ୍ରୌପଦୀଙ୍କ ଖାସ, ସୋରେନଙ୍କ ନିଷ୍ପତ୍ତିକୁ ଅପେକ୍ଷା

ରାଞ୍ଚି: ଓଡ଼ିଶାର ବିଜେପି ନେତ୍ରୀ ତଥା ଝାଡ଼ଖଣ୍ଡର ପୂର୍ବତନ ରାଜ୍ୟପାଳ ଦ୍ରୌପଦୀ ମୁର୍ମୁଙ୍କୁ ପ୍ରାର୍ଥୀ ଘୋଷଣା କରିଛି ଏନ୍‌ଡିଏ। ନିର୍ବାଚିତ ହେଲେ ଦ୍ରୌପଦୀ ହେବେ ଦେଶର ପ୍ରଥମ ଓଡ଼ିଆ ଏବଂ ଆଦିବାସୀ ମହିଳା ଏବଂ ଦ୍ବିତୀୟ ମହିଳା ରାଷ୍ଟ୍ରପତି। ଭାରତର ଗଣତାନ୍ତ୍ରିକ ବ୍ୟବସ୍ଥାରେ ଶାସନର ସର୍ବୋଚ୍ଚ ପଦବି ଲାଗି ଓଡ଼ିଶାର ଆଦିବାସୀ ନେତ୍ରୀ ଶ୍ରୀମତ୍ରୀ ମୁର୍ମୁଙ୍କ ନାମ ଘୋଷଣା କରି ବିଜେପି ସମସ୍ତଙ୍କୁ ଚକିତ କରିଛି। ଦ୍ରୌପଦୀଙ୍କୁ ପ୍ରାର୍ଥୀ କରି ଦଳ ଏକାସାଙ୍ଗରେ ଆଦିବାସୀ ଓ ମହିଳା କାର୍ଡ ଖେଳିଛି ଏବଂ ଅନେକ ରାଜନୈତିକ ଦଳଙ୍କୁ ସମର୍ଥନ କରିବା ଲାଗି ଏକପ୍ରକାର ଚାପରେ ରଖିଛି। ବାସ୍ତବରେ ଗତକାଲି ଅପରାହ୍ନରେ ବିରୋଧୀ ଦଳମାନେ ଯଶବନ୍ତ ସିହ୍ନାଙ୍କୁ ପ୍ରାର୍ଥୀ ଭାବେ ଘୋଷଣା କରିଥିଲା | ଆଉ ଯଶବନ୍ତଙ୍କୁ ସମର୍ଥନ କରିବାକୁ ଝାଡ଼ଖଣ୍ଡର ଜେଏମଏମ ମଧ୍ୟ ଘୋଷଣା କରିଥିଲା | କିନ୍ତୁ ରାତିରେ ବିଜେପି ଦ୍ରୌପଦୀଙ୍କ ନାମ ଘୋଷଣା କରି ଝାଡ଼ଖଣ୍ଡ ମୁକ୍ତି ମୋର୍ଚ୍ଚାକୁ ଅକଳରେ ପକାଇଦେଇଛି | କାରଣ ଜେଏମଏମର ବରିଷ୍ଠ ନେତାମାନେ ଆଜି କହିଛନ୍ତି ଯେ ସେମାନଙ୍କ ଦଳ ମୁର୍ମୁଙ୍କୁ ସମର୍ଥନ କରିପାରନ୍ତି |

କାରଣ ସେ ୬ ବର୍ଷ ଧରି ଝାଡ଼ଖଣ୍ଡର ରାଜ୍ୟପାଳ ଥିଲେ। ମୁର୍ମୁ ବ୍ୟକ୍ତିଗତ ଭାବରେ ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କ ପରିବାର ସହିତ ଜଡିତ ଥିବା କୁହାଯାଏ | ଦଳର ନେତାମାନେ କହିଛନ୍ତି ଯେ ନିଜକୁ ଆଦିବାସୀ ଦଳ ଭାବରେ ପ୍ରୋଜେକ୍ଟ କରୁଥିବା ଜେଏମଏମ ମୁର୍ମୁଙ୍କ ବିରୁଦ୍ଧରେ ଯିବା କଷ୍ଟକର ହେବ। ଜେଏମଏମ ନେତା କହିଛନ୍ତି ଯେ ମୁର୍ମୁ ଓ ସୋରେନଙ୍କ ପରିବାର ମଧ୍ୟରେ ଘନିଷ୍ଠତା ରହିଛି। ମୁର୍ମୁ ଓଡ଼ିଶାର ମୟୂରଭଞ୍ଜ ଜିଲ୍ଲାର ହୋଇଥିବାବେଳେ ସୋରେନଙ୍କର ଅନେକ ପାରିବାରିକ ସମ୍ପର୍କ ରହିଛି |

ଜେଏମଏମ ସୁପ୍ରିମୋ ଶିବୁ ସୋରେନଙ୍କ ଦୁଇ ବୋହୂଙ୍କ ସହ ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କ ପତ୍ନୀ ଏହି ଅଞ୍ଚଳର ହୋଇଥିବାବେଳେ ହେମନ୍ତଙ୍କ ଭଉଣୀ ମଧ୍ୟ ମୟୁରଭଞ୍ଜ-ଝାଡ଼ଖଣ୍ଡ ସୀମାନ୍ତରେ ବିବାହ କରିଥିଲେ | ସେହିପରି ହେମନ୍ତ ସୋରେନଙ୍କ ପତ୍ନୀ କଳ୍ପନା ସୋରେନଙ୍କ ସହ ମଧ୍ୟ ଦ୍ରୌପଦୀଙ୍କର ଖାସ ସମ୍ପର୍କ ରହିଛି | ଉଭୟ ହେମନ୍ତ ଓ କଳ୍ପନା ଅନେକ ଥର ରାଜଭବନକୁ ଯାଇଥିବାବେଳେ ଯେଉଁଦିନ ଦ୍ରୌପଦୀଙ୍କ କାର୍ଯ୍ୟକାଳ ସରିଥିଲା ଉଭୟ ପତି-ପତ୍ନୀ ତାଙ୍କୁ ବିମାନବନ୍ଦର ଯାଏଁ ବିଦାୟୀ ଦେବାକୁ ଆସିଥିଲେ | ଏସବୁ ଦୃଷ୍ଟିରୁ ଦ୍ରୌପଦୀଙ୍କ ପଲା ଭାରି ଥିବାର କୁହାଯାଉଛି |

ସମ୍ବନ୍ଧିତ ଖବର