କରୋନା ଭାଇରସ ପ୍ରଭାବ : ଫେବ୍ରୁଆରି ପରେ ଦେଶରେ ପାରାସିଟାମଲ, ଇବ୍ରୁପ୍ରୋଫେନ ପରି ଔଷଧର ଅଭାବ ଦେଖାଯିବ
ନୂଆଦିଲ୍ଲୀ : ଚୀନରେ ବ୍ୟାପିଥିବା କରୋନା ଭାଇରସ ସଂକ୍ରମଣ ଯୋଗୁଁ ସାରା ବିଶ୍ୱ ଅର୍ଥନୀତି ପାଇଁ ବିପଦ ଘନେଇ ଆସୁଛି । ଏହାକୁ ନେଇ ଭାରତୀୟ ଶିଳ୍ପଜଗତରେ ମଧ୍ୟ ଚିନ୍ତା ପ୍ରକାଶ ପାଇଛି । ଚୀନରୁ ବାଣିଜ୍ୟକାରବାର ପ୍ରଭାବିତ ହୋଇଥିବାରୁ ଆଗାମୀ ଦିନରେ ଦେଶରେ ବିଭିନ୍ନ ଔଷଧର ଅଭାବ େଦେଖାଯିବ ବୋଲି ଆଶଙ୍କା ପ୍ରକାଶ ପାଇଛି ।
Sambad is now on WhatsApp
Join and get latest news updates delivered to you via WhatsApp
ଭାରତୀୟ ଶିଳ୍ପ ସଂଗଠନ ଫିକ୍କି ପକ୍ଷରୁ କୁହାଯାଇଛି ଯେ କରୋନା ଭାଇରସ ସଂକ୍ରମଣ ଯୋଗୁଁ ଚୀନ ସହିତ କାରବାର ପ୍ରଭାବିତ ହୋଇଥିବାରୁ ଦେଶରେ ଆଗାମୀ ଦିନରେ ଅନେକ ଔଷଧର ଅଭାବ ଦେଖାଦେବ ଓ ମୂଲ୍ୟବୃଦ୍ଧି ହେବ । ବିଶେଷକରି ସ୍ଥିତିରେ ଉନ୍ନତି ନହେଲେ ଚଳିତ ମାସ ପରେ ଦେଶରେ ପାରାସିଟାମଲ, ଇବ୍ରୁପ୍ରୋଫେନ ଆଦି ସାଧାରଣ ଔଷଧର ଅଭାବ ଦେଖାଦେବ । ଏହାର କାରଣ ହେଉଛି ଏସବୁ ଔଷଧ ତିଆରିରେ ଲାଗୁଥିବା କଞ୍ଚାମାଲ ଚୀନରୁ ଆସିଥାଏ । କେତେକ କଞ୍ଚାମାଲ କରୋନା ଭାଇରସ ବ୍ୟାପିଥିବା ସହର ଉହାନରୁ ମଧ୍ୟ ଆସିଥାଏ । କିନ୍ତୁ କରୋନା ଭାଇରସ ସଂକ୍ରମଣ ଯୋଗୁଁ ଏବେ ଚୀନରୁ କୌଣସି ଜାହାଜ ଆସୁନାହିଁ । ତେବେ ସରକାର କହିଛନ୍ତି ଯେ ଦେଶରେ ଯଥେଷ୍ଟ ପରିମାଣରେ ଔଷଧ ଗଚ୍ଛିତ ରହିଛି । ଏଣୁ ବିବ୍ରତ ହେବାର କୌଣସି କାରଣ ନାହିଁ । କେବଳ ଔଷଧ ନୁହେଁ, ମୋବାଇଲ ଫୋନଗୁଡ଼ିକର ମଧ୍ୟ ମୂଲ୍ୟବୃଦ୍ଧି ହେବାର ସମ୍ଭାବନା ଦେଖାଗଲାଣି ।