ପାକିସ୍ତାନୀ ଡଙ୍ଗାରୁ ଜବତ ହେଲା ୨୮୦ କୋଟି ଟଙ୍କାର ଡ୍ରଗ୍ସ
ଅହମଦାବାଦ : ଗୁଜୁରାଟ ଉପକୂଳରୁ ପୁଣି ଧରା ପଡ଼ିଛି ବିପୁଳ ପରିମାଣର ଡ୍ରଗ୍ସ । ଏକ ପାକିସ୍ତାନୀ ଡଙ୍ଗାରେ ଆସୁଥିବା ପ୍ରାୟ ୨୮୦ କୋଟି ଟଙ୍କା ମୂଲ୍ୟର ପ୍ରାୟ ୫୬ କିଲୋଗ୍ରାମ ନିଶାଦ୍ରବ୍ୟ ବା ଡ୍ରଗ୍ସ ଜବତ ହୋଇଛି । ଗୁଜୁରାଟର ଆତଙ୍କବାଦ ନିରୋଧୀ ବାହିନୀ ଓ ଭାରତୀୟ କୋଷ୍ଟଗାର୍ଡ ପକ୍ଷରୁ ଏକ ମିଳିତ ଅପରେସନ କରାଯାଇଛି ଏସବୁ ଡ୍ରଗ୍ସ ଜବତ ହୋଇଛି । ଡଙ୍ଗାରେ ଥିବା ୧୨ ଜଣ ବ୍ୟକ୍ତିଙ୍କୁ ଗିରଫ କରାଯାଇଛି । ସେମାନଙ୍କ ମଧ୍ୟରୁ ୯ ଜଣ ପାକିସ୍ତାନୀ ବୋଲି ଜଣାପଡ଼ିଛି । ଏସବୁ ନିଶାଦ୍ରବ୍ୟ ବା ଡ୍ରଗ୍ସ ଆଫଗାନିସ୍ତାନରୁ ପାକିସ୍ତାନ ଦେଇ ଭାରତ ଆସୁଥିବା ସଂଦେହ କରାଯାଉଛି । ଏ ନେଇ ଅଧିକ ତଦନ୍ତ ଜାରି ରହିଛି ।
Sambad is now on WhatsApp
Join and get latest news updates delivered to you via WhatsApp
ସୂଚନାଯୋଗ୍ୟ ଯେ ଗତ ମେ ୨୬ ତାରିଖ ଦିନ ଗୁଜୁରାଟର ମୁଦ୍ରା ବନ୍ଦରରୁ ପ୍ରାୟ ୫୦୦ କୋଟି ଟଙ୍କା ମୂଲ୍ୟର କୋକେନ ଜବତ ହୋଇଥିଲା । ଏକ କଣ୍ଟେନରେ ଟାଲକମ ପାଉଡର ରୂପରେ ସେଗୁଡ଼ିକର ଚୋରା ଚାଲାଣ କରାଯାଉଥିବା ବେଳେ ଧରା ପଡ଼ିଥିଲା ।
ଗତ ବର୍ଷ ସେପ୍ଟେମ୍ବର ମାସରେ ଭାରତର ରାଜସ୍ବ ଗୁଇନ୍ଦା ନିର୍ଦ୍ଦେଶାଳୟ ପକ୍ଷରୁ ଗୁଜୁରାଟର ମୁନ୍ଦ୍ରା ବନ୍ଦରରୁ ଦୁଇଟି କଣ୍ଟେନରରେ ୨୧ ହଜାର କୋଟି ଟଙ୍କା ମୂଲ୍ୟର ପ୍ରାୟ ୩ ହଜାର କିଲୋଗ୍ରାମ ହେରୋଇନ ଚିହ୍ନଟ କରାଯାଇଥିଲା । ଏସବୁ ନିଶାଦ୍ରବ୍ୟ ଆଫଗାନିସ୍ତାନର କାନ୍ଦାହାରରୁ ପାକିସ୍ତାନ ଦେଇ ଆସିଥିବା ଜଣାପଡ଼ିଥିଲା ।