ପାକିସ୍ତାନୀ ବୋଟରୁ ୬୦୦ କୋଟିର ଡ୍ରଗ୍ସ ଜବତ

ପୋରବନ୍ଦର: ନାର୍କୋଟିକ୍ସ କଣ୍ଟ୍ରୋଲ ବ୍ୟୁରୋ ଅଫ୍ ଇଣ୍ଡିଆ (ଏନସିବି) ଏବଂ ଗୁଜରାଟ ଏଟିଏସର ଏକ ଟିମ୍ ରବିବାର ଏକ ମିଳିତ ଅପରେସନ କରି ବିପୁଳ ପରିମାଣର ଡ୍ରଗ୍ସ ଜବତ କରିଛନ୍ତି। ଏଥିସହ ଡଙ୍ଗାରୁ ୧୪ ଜଣ ପାକିସ୍ତାନୀ ନାଗରିକ ଧରା ପଡ଼ିଛନ୍ତି। ସମୁଦ୍ର ଦେଇ ପାକିସ୍ତାନରୁ ୬୦୦ କୋଟି ଟଙ୍କାର ଡ୍ରଗ୍ସ ଆସୁଥିବାବେଳେ ମଧ୍ୟ ଗୁପ୍ତ ସୂଚନା ଆଧାରରେ ଏହା ଉପରେ ଚଢଉ କରାଯାଇଥିଲା। ଏହା ପୂର୍ବରୁ ଫେବ୍ରୁଆରି ଓ ମାର୍ଚ୍ଚ ଶେଷ ସପ୍ତାହରେ ଏଟିଏସ୍ ତଟରକ୍ଷୀ ବାହିନୀ ସହ ମିଶି ବିପୁଳ ପରିମାଣର ଡ୍ରଗ୍ସ ଜବତ କରିଥିଲା।

ଭାରତୀୟ ତଟରକ୍ଷୀ ବାହିନୀ 'ଏକ୍ସ'ର ଏକ ପୋଷ୍ଟରେ ଲେଖିଛି, 'ଗତ ମାସରେ ମିଳିଥିବା ଇଣ୍ଟରସେପ୍ଟ ଉପରେ କାର୍ଯ୍ୟାନୁଷ୍ଠାନ ନିଆଯାଇଥିଲା। ରାତାରାତି ଏକ ନାର୍କୋ ବିରୋଧୀ ଅଭିଯାନରେ ଭାରତୀୟ ତଟରକ୍ଷୀ ବାହିନୀ ଏହାର ଜାହାଜ 'ରାଜରତନ' ସହ ଗୁଜରାଟ ଏଟିଏସ୍ ଏବଂ ଏନସିବି ସହ ମିଳିତ ଭାବେ ଏହି ଅପରେସନ କରିଥିଲେ, ଯାହାଫଳରେ ପୋରବନ୍ଦରର ପଶ୍ଚିମରେ ଆରବ ସାଗରରେ ପାକିସ୍ତାନୀ ଡଙ୍ଗାକୁ ଧରାଯାଇଥିଲା । ଏଥିରେ ୧୪ ଜଣ ପାକିସ୍ତାନୀ କର୍ମଚାରୀ ଏବଂ ପ୍ରାୟ ୮୬ କିଲୋଗ୍ରାମ ଚୋରା ସାମଗ୍ରୀ ଥିଲା। ଏହି ଔଷଧର ମୂଲ୍ୟ ୬୦୦ କୋଟି ଟଙ୍କା।