ପାନାଜୀ: ଗୋଆରେ ଦୀର୍ଘ ସମୟ ଧରି ଟ୍ରାଫିକ୍ ଜାମ୍ ହେବା ଫଳରେ ଲୋକେ ଅସ୍ତବ୍ୟସ୍ତ ହୋଇପଡିଛନ୍ତି | ରାଜଧାନୀ ପାନାଜୀସ୍ଥିତ ଜୁଆରି ନଦୀ ଉପରେ ନିର୍ମିତ ବ୍ରିଜ ଉପରେ ଏକ ଦୁର୍ଘଟଣା ଘଟିବା ପରେ ଜାତୀୟ ରାଜପଥରେ ୩ ଘଣ୍ଟା ଧରି ଜାମ ହୋଇଥିଲା । ଏହି କାରଣରୁ ଅନେକ ଲୋକ ସେମାନଙ୍କର ଫ୍ଲାଇଟ୍ ମଧ୍ୟ ମିସ୍ କରିଥିବା ସୂଚନା ମିଳିଛି | ଦକ୍ଷିଣ ଗୋଆକୁ ସଂଯୋଗ କରୁଥିବା ଜାତୀୟ ରାଜପଥରେ ଟ୍ରାଫିକ ଜାମ୍ ଯୋଗୁଁ ଘଣ୍ଟାଘଣ୍ଟା ଧରି ଯାନବାହନ ଅଟକି ରହିଥିଲା, ଫଳରେ ବିମାନ ବନ୍ଦର ଯାଉଥିବା ଲୋକେ ଫ୍ଲାଇଟ୍ ମିସ୍ କରିଥିଲେ।
Sambad is now on WhatsApp
Join and get latest news updates delivered to you via WhatsApp
ଜଣେ ବରିଷ୍ଠ ପୋଲିସ୍ ଅଧିକାରୀ ସୂଚନା ଦେଇ କହିଛନ୍ତି ଯେ, ପାନଜୀଠାରୁ ପ୍ରାୟ ୧୫ କିଲୋମିଟର ଦୂରରେ ଥିବା ଜୁଆରୀ ବ୍ରିଜରେ ଏକ ଟେମ୍ପୋ ସହ ଏକ ଏସୟୁଭିର ଧକ୍କା ହୋଇଥିଲା। ସକାଳେ ଏହି ଦୁର୍ଘଟଣା ଘଟିଥିଲା । ଏହାପରେ ସେ ରାସ୍ତାରେ ଯାନବାହନ ଚଳାଚଳ ବନ୍ଦ ହୋଇଯାଇଥିଲା। ୪୫ ମିନିଟ୍ ପାଇଁ ଏକ ଟ୍ରାଫିକ୍ ଜାମ୍ ଥିଲା, ଯାହା ପରେ ଉଭୟ ଯାନକୁ କ୍ରେନ୍ ସାହାଯ୍ୟରେ ଟାଣି ନିଆଯାଇଥିଲା । କିନ୍ତୁ ଜାତୀୟ ରାଜପଥରେ ଗାଡିଗୁଡିକର ଏକ ଲମ୍ବା ଲାଇନ ହୋଇଯାଇଥିଲା । ଅନେକ ଗାଡି ତିନି ଘଣ୍ଟାରୁ ଅଧିକ ସମୟ ଧରି ଅଟକି ରହିଥିଲା ।
ଟ୍ରାଫିକ୍ ଜାମରେ ନିଜ ପିଲାମାନଙ୍କ ସହ ଅଟକି ଯାଇଥିବା ରିଏଲ୍ ଇଷ୍ଟେଟ୍ ପ୍ରଫେସନାଲ କେଦାର ମ୍ୟାପେକ୍ସେନକର କହିଛନ୍ତି, ‘ଆମେ ମାଡଗାଓଁରୁ ପାନଜୀ ଯାଉଥିଲୁ। କିନ୍ତୁ ଜାମ ଯୋଗୁଁ ଏଠାରେ ତିନି ଘଣ୍ଟାରୁ ଅଧିକ ସମୟ ଧରି ଅଟକି ରହିଛୁ। ଜାମ୍ ଯୋଗୁ ବ୍ରିଜ ପାର ହେବାର କୌଣସି ସମ୍ଭାବନା ନ ଥିବାରୁ ଆମେ ଘରକୁ ଫେରିବାକୁ ସ୍ଥିର କଲୁ।’
ଏଥି ସହ ପାନାଜୀରୁ ବିମାନବନ୍ଦରକୁ ଯାଉଥିବା ଅବିତ ନାରଭେକର କହିଛନ୍ତି ଯେ, ଟ୍ରାଫିକ ଜାମରେ ଅଟକି ରହିଥିବାରୁ ସେ ବିମାନ ବନ୍ଦରରେ ଠିକ୍ ସମୟରେ ପହଞ୍ଚି ପାରିବେ ନାହିଁ। ସେ ତାଙ୍କର ଫ୍ଲାଇଟ୍ ମିସ୍ କରିବେ । ଏଥିସହିତ ବିମାନବନ୍ଦର କର୍ତ୍ତୃପକ୍ଷଙ୍କ ଜଣେ ବରିଷ୍ଠ ଅଧିକାରୀଙ୍କ ସହ ଯୋଗାଯୋଗ କରିବାବେଳେ ବିମାନବନ୍ଦରରେ ବିଳମ୍ବରେ ପହଞ୍ଚିବା ନେଇ କୌଣସି ଅଭିଯୋଗ ଆସି ନଥିବା ସେ କହିଛନ୍ତି।