ନୂଆଦିଲ୍ଲୀ: ପ୍ରତିବର୍ଷ ଭଳି ଚଳିତ ବର୍ଷ ମଧ୍ୟ ଦେଶର କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ ୨୦୨୨-୨୩ ବର୍ଷ ପାଇଁ କେନ୍ଦ୍ର ବଜେଟ୍ ଉପସ୍ଥାପନ କରିଛନ୍ତି, ଯେଉଁଥିରେ ଅନେକ ଗୁରୁତ୍ୱପୂର୍ଣ୍ଣ ପ୍ରତିଶ୍ରୁତି ଏବଂ ନିଷ୍ପତ୍ତି ନିଆଯାଇଛି। ବଜେଟ୍ ଅଧିବେଶନରେ ଅର୍ଥମନ୍ତ୍ରୀ ଘୋଷଣା କରିଛନ୍ତି ଯେ ଖୁବ୍ ଶୀଘ୍ର ଭାରତର ନାଗରିକମାନଙ୍କୁ ବିଦେଶ ଭ୍ରମଣ ପାଇଁ ଇ-ପାସପୋର୍ଟ ଯୋଗାଇ ଦିଆଯିବ। ଇ-ପାସପୋର୍ଟ ସହିତ ଆଗକୁ ବିଦେଶ ଭ୍ରମଣ ସହଜ ଏବଂ ଦ୍ରୁତ ହେବ ବୋଲି କହିଛନ୍ତି ଅର୍ଥମନ୍ତ୍ରୀ। ନାଗରିକଙ୍କ ସୁବିଧାକୁ ଦୃଷ୍ଟିରେ ରଖି ଏହି ପଦକ୍ଷେପ ନିଆଯାଇଛି ବୋଲି ଆଜି ନିର୍ମଳା ସୀତାରମଣ କହିଛନ୍ତି।
Sambad is now on WhatsApp
Join and get latest news updates delivered to you via WhatsApp
ସାଧାରଣ ପାସପୋର୍ଟ ଭଳି କାମ କରୁଥିବା ଇ-ପାସପୋର୍ଟକୁ ଚଳିତ ବର୍ଷ ଭାରତୀୟ ନାଗରିକଙ୍କୁ ଦିଆଯିବ, ଯେଉଁଥିରେ ଉନ୍ନତ ସୁରକ୍ଷା ବୈଶିଷ୍ଟ୍ୟ ସହିତ ଇଲେକ୍ଟ୍ରୋନିକ୍ ମାଇକ୍ରୋପ୍ରୋସେସର୍ ଚିପ୍ ଲାଗିଥିବା। ଏହି ଚିପରେ ଆବେଦନକାରୀଙ୍କ ବ୍ୟକ୍ତିଗତ ସୂଚନା ଗଚ୍ଛିତ ହେବ। ଯଦି କେହି ଚିପକୁ ବ୍ୟବହାର କରି ପାସପୋର୍ଟଧାରୀଙ୍କ ସହ ଜଡ଼ିତ ସୂଚନା ଚୋରି କରିବାକୁ ଚେଷ୍ଟା କରେ ତେବେ ସଙ୍ଗେ ସଙ୍ଗେ ଏହା ଆଲର୍ଟ କରାଇବ।
ପାସପୋର୍ଟର ପଛ ଭାଗରେ ରଖାଯାଇଥିବା ଏହି ଚିପରେ ୬୪ କିଲୋବାଇଟ୍ ଷ୍ଟୋରେଜ୍ ସ୍ପେସ୍ ରହିବ ଏବଂ ଏହା ଏକ ଏମ୍ବେଡ୍ ହୋଇଥିବା ଆଣ୍ଟେନା ସହିତ ଆସିବ। ପ୍ରଥମେ ଚିପ୍ ୩୦ଟି ଆନ୍ତର୍ଜାତୀୟ ଯାତ୍ରାର ତଥ୍ୟ ରଖିବାକୁ ସକ୍ଷମ ହେବ। ଇ-ପାସପୋର୍ଟ ଆସିବା ଦ୍ବାରା କେହି ଯାତ୍ରୀଙ୍କ ତଥ୍ୟ ଚୋରି କରିବାକୁ ସକ୍ଷମ ହେବେ ନାହିଁ। ଜର୍ମାନୀ, ବ୍ରିଟେନ ଏବଂ ଆମେରିକା ସମେତ ବିଶ୍ବର ୧୨୦ଟି ଦେଶରେ ଇ-ପାସପୋର୍ଟ ବ୍ୟବହାର କରାଯାଉଛି।