ନୂଆଦିଲ୍ଲୀ: ପ୍ରାକୃତିକ ବିପର୍ଯ୍ୟୟ ପ୍ରବଣ ଓଡିଶାରେ ବାତ୍ୟା ନାଁ ଶୁଣିଲେ ରାଜ୍ୟବାସୀଙ୍କ ମନରେ ଛନକା ପଶେ । କାରଣ ପ୍ରତିବର୍ଷ ବଙ୍ଗୋପସାଗରରେ ସୃଷ୍ଟି ହେଉଥିବା ଲଘୁଚାପ ଅଧିକ ଘନୀଭୂତ ହୋଇ ବାତ୍ୟାର ରୂପ ନେଉଛି ଏବଂ ସମୁଦ୍ର ଉପକୂଳବର୍ତୀ ରାଜ୍ୟଗୁଡିକରେ ବ୍ୟାପକ କ୍ଷୟକ୍ଷତି କରୁଛି । ଚଳିତ ବର୍ଷର ପ୍ରଥମ ବାତ୍ୟା ତୌତେ ଗୁଜରାଟ ଆଡେ ଚାଲିଯାଇଛି । ହେଲେ ବଙ୍ଗୋପସାଗରରେ ଆଉ ଏକ ଲଘୁଚାପ ଦାନା ବାନ୍ଧୁଥିବା ନେଇ ସଂକେତ ମିଳୁଛି ।
Sambad is now on WhatsApp
Join and get latest news updates delivered to you via WhatsApp
କେନ୍ଦ୍ର ଭୂ-ବିଜ୍ଞାନ ମନ୍ତ୍ରାଳୟର ସଚିବ ମାଧବନ ରାଜୀବନ ଏକ ଟ୍ୱିଟ କରି ତୌତେର ସଠିକ ଆକଳନ ପାଇଁ ଭାରତୀୟ ପାଣିପାଗ ବିଭାଗକୁ ଶୁଭେଚ୍ଛା ଜଣାଇଛନ୍ତି । ତୌତେର ସ୍ଥିତି, ଏହାର ଗତି ସହ ଲ୍ୟାଣ୍ଡଫଲ ସ୍ଥାନ ଓ ସମୟ ବାବଦରେ ଏକ ଦମ୍ ଠିକ ଆକଳନ କରୁଥିବାରୁ ଆଇଏମଡିକୁ ଧନ୍ୟବାଦ ଜଣାଇଛନ୍ତି ମାଧବନ ରାଜୀବନ । ହେଲେ ବଙ୍ଗୋପସାଗରରେ ଆଗାମୀ ୨୩ ତାରିଖ ବେଳକୁ ଆଉ ଏକ ଲଘୁଚାପ ସୃଷ୍ଟି ହେଉଥିବା ନେଇ ସେ ସଂକେତ ଦେଇଛନ୍ତି ।
ବିଶ୍ୱସ୍ତ ସୂତ୍ରରୁ ମିଳିଥିବା ସୂଚନା ଅନୁସାରେ ଏହି ଲଘୁଚାପ ଅଧିକ ଘନୀଭୂତ ହୋଇ ଆଗାମୀ ୨୬ କିମ୍ବା ୨୭ ତାରିଖ ବେଳକୁ ବାତ୍ୟାର ରୂପ ନେଇପାରେ । ଏପରିକି ଏହା ଓଡିଶା ଉପକୂଳ ଆଡକୁ ଅଗ୍ରସର ହେବ ବୋଲି ଅନୁମାନ କରାଯାଉଛି । ତେବେ ଲଘୁଚାପ ସୃଷ୍ଟି ହେବାପରେ ଏନେଇ ସଠିକ ଆକଳନ କରିହେବ ଏବଂ ଏହାର ଗୁରୁତ୍ୱ ଓ ଗତିବିଧି ବିଷୟରେ ଅଧିକ ଜଣାପଡିବ ବୋଲି ସୂଚନା ମିଳିଛି ।