ଚୀନ : ଲୋକେ ଲକଡାଉନରେ ଥିବାବେଳେ ଆସିଲା ଭୂମିକମ୍ପ
ବେଜିଂ : ଦକ୍ଷିଣ-ପଶ୍ଚିମ ଚୀନରେ ସୋମବାରଦିନ ହୋଇଥିବା ଏକ ଭୂମିକମ୍ପ ଯୋଗୁଁ ଅତି କମରେ ୪୬ ଜଣ ଲୋକ ମୃତ୍ୟୁବରଣ କରିଛନ୍ତି । ଏହି ଭୂମିକମ୍ପର ତୀବ୍ରତା ରିକ୍ଟର ସ୍କେଲରେ ୬.୬ ଥିଲା ।
Sambad is now on WhatsApp
Join and get latest news updates delivered to you via WhatsApp
ଚୀନ ଭୂତାତ୍ତ୍ବିକ ସର୍ବେକ୍ଷଣ ସଂସ୍ଥାର ସୂଚନା ଅନୁସାରେ ଏହି ଭୂମିକମ୍ପର କେନ୍ଦ୍ରସ୍ଥଳ ସିଚୁଆନ ପ୍ରଦେଶର କାଂଗିଙ୍ଗ ସହରଠାରୁ ୪୩ କିଲୋମିଟର ଦକ୍ଷିଣପୂର୍ବ ଦିଗରେ ଭୂପୃଷ୍ଠରୁ ୧୦ କିଲୋମିଟର ଗଭୀରତାରେ ଥିଲା ।
ଏହି ଭୂମିକମ୍ପର ପ୍ରଭାବ ସିଚୁଆନ ପ୍ରଦେଶର ରାଜଧାନୀ ଚେଙ୍ଗଡୁରେ ବି ଅନୁଭୂତ ହୋଇଥିଲା । କରୋନା ସଂକ୍ରମଣ ଯୋଗୁଁ ଏହି ସହରର ଲକ୍ଷ ଲକ୍ଷ ଲୋକଙ୍କୁ କଠୋର ଲକଡାଉନରେ ରଖାଯାଇଛି । ଏପରିକି ଲୋକମାନଙ୍କ ଘରୁ ବାହାରିବା ଉପରେ କଟକଣା ଲଗାଯାଇଛି । ବାହାରକୁ ବାହାରିବା ଉପରେ କଟକଣା ଲଗାଯାଇଥିବାରୁ ଭୂମିକମ୍ପ ଆସିବା ପରେ ଲୋକମାନେ ନିଜ ନିଜ ଅଗଣାକୁ ଚାଲିଆସିଥିଲେ । ଏହି ଭୂମିକମ୍ପ ପ୍ରଭାବରେ ଚେଙ୍ଗଡୁର ଅନେକ ଘର କ୍ଷତିଗ୍ରସ୍ତ ହୋଇଛି । ଏହା ଫଳରେ ଲକଡାଉନରେ ଥିବା ଲୋକମାନଙ୍କ ସ୍ଥିତି ଦୟନୀୟ ହୋଇପଡ଼ିଛି ।
ଚୀନର ରାଷ୍ଟ୍ରାୟତ୍ତ ଗଣମାଧ୍ୟମର ସୂଚନା ଅନୁସାରେ ଏହି ଭୂମିକମ୍ପପରେ କେତେକ ଛୋଟ ତୀବ୍ରତାର ଭୂମିକମ୍ପ ମଧ୍ୟ ଆସିଥିଲା । ପୂର୍ବ ତିବ୍ବତରେ ଏକ ୪.୬ ତୀବ୍ରତାର ଭୂମିକମ୍ପ ଅନୁଭୂତ ହୋଇଥିଲା । ତେବେ ଏସବୁ କମ ତୀବ୍ରତାର ଭୂମିକମ୍ପରେ କେହି ମୃତାହତ ହୋଇଥିବାର ଖବର ହସ୍ତଗତ ହୋଇନାହିଁ ।