ତାଲିମ ଇଭିଏମ୍ ପରିବହନ : ବାରାଣାସୀ ଏଡିଏମଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିର୍ଦ୍ଦେଶ
ନୂଆଦିଲ୍ଲୀ : ଭୋଟ ଗଣତି କେନ୍ଦ୍ରକୁ ଇଲେକ୍ଟ୍ରୋନିକ ଭୋଟିଂ ମେସିନ (ଇଭିଏମ) ପରିବହନ କରାଯାଉଛି ବୋଲି ସମାଜବାଦୀ ପାର୍ଟି ନେତା ଅଖିଳେଶ ଯାଦବ ଅଭିଯୋଗ କରିବାର ଦିନକ ପରେ ବାରାଣାସୀ କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି ନିର୍ବାଚନ ଆୟୋଗ । ନିୟମ ଉଲ୍ଲଙ୍ଘନ କରିବା ଅଭିଯୋଗରେ ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିବା ଜଣାଯାଇଛି ।
Sambad is now on WhatsApp
Join and get latest news updates delivered to you via WhatsApp
ଗଣମାଧ୍ୟମ ରିପୋର୍ଟ ଅନୁସାରେ ନିୟମ ଉଲ୍ଲଙ୍ଘନ କରି ଇଭିଏମ ପରିବହନ କରୁଥିବାରୁ ବାରାଣାସୀ ଏଡିଏମ ଏନକେ ସିଂଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବାକୁ ନିର୍ବାଚନ କମିସନ ଉତ୍ତରପ୍ରଦେଶର ମୁଖ୍ୟ ନିର୍ବାଚନ ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି ।
ଗତକାଲି (ମଙ୍ଗଳବାର) ଏକ ସାମ୍ବାଦିକ ସମ୍ମିଳନୀ କରି ଅଖିଳେଶ ଇଭିଏମଗୁଡ଼ିକର ସୁରକ୍ଷା ନେଇ ପ୍ରଶ୍ନ ଉଠାଇଥିଲେ । ସ୍ଥାନୀୟ ପ୍ରାର୍ଥୀମାନଙ୍କୁ ସୂଚୀନ ନ କରି ବାରାଣାସୀ ଜିଲ୍ଲା ପ୍ରଶାସନ ପକ୍ଷରୁ ଇଭିଏମଗୁଡ଼ିକୁ ସ୍ଥାନାନ୍ତର କରାଯାଉଥିବା ସେ ଏକ ଭିଡିଓ ଜାରି କରିଥିଲେ । ଏହା ଭୋଟ ଚୋରି ବୋଲି ସେ ସିଧାସଳଖ ଅଭିଯୋଗ କରିଥିଲେ ।
ତେବେ ଏହାର ଜବାବ ଦେଇ ନିର୍ବାଚନ କମିସନ କହିଥିଲେ ଯେ ପରିବହନ ହେଉଥିବା ଇଭିଏମଗୁଡ଼ିକ ଭୋଟ ପାଇଁ ବ୍ୟବହାର କରାଯାଇନଥିଲା । ଭୋଟ ଗଣତି ସଂପର୍କରେ ଅଧିକାରୀମାନଙ୍କୁ ତାଲିମ ଦେବାକୁ ସେଗୁଡ଼ିକ ବ୍ୟବହାର କରାଯାଇଥିଲା । ଏହା ସହିତ କେତେକ ରାଜନୈତିକ ଦଳ ଅଯଥାରେ ଗୁଜବ ସୃଷ୍ଟି କରୁଥିବା ଉତ୍ତରପ୍ରଦେଶ ରାଜ୍ୟ ମୁଖ୍ୟ ନିର୍ବାଚନ ଅଧିକାରୀ କହିଥିଲେ ।