ନୂଆଦିଲ୍ଲୀ: କଂଗ୍ରେସ ସାଂସଦ  ତଥା ଲୋକସଭାର ବିରୋଧୀ ଦଳ ନେତା ରାହୁଲ ଗାନ୍ଧୀ ଅଭିଯୋଗ କରିଛନ୍ତି ଯେ ନିର୍ବାଚନ କମିସନ ସିଧାସଳଖ ବଡ଼ ଧରଣର ଭୋଟର ଜାଲିଆତି କାର୍ଯ୍ୟକ୍ରମରେ ସମ୍ପୃକ୍ତ। କଂଗ୍ରେସ ପାଖରେ ଏନେଇ ପ୍ରମାଣ ରହିଛି ଏବଂ ଏହା ପ୍ରଘଟ କରାଯିବା ପରେ ‘ପରମାଣୁ ବୋମା’ ଭଳି ଫୁଟିବ। ଆମେ ନିର୍ବାଚନ କମିସନ୍‌ର କାହାରିକୁ ବି ଛାଡ଼ିବୁ ନାହିଁ ବୋଲି ରାହୁଲ ଆଜି ଚେତାବନୀ ଦେଇଛନ୍ତି। ବିହାର ଏସ୍‌ଆଇଆର (ସ୍ବତନ୍ତ୍ର ଭୋଟର ତାଲିକା ସଂ‌ଶୋଧନ) ସଂକ୍ରାନ୍ତରେ ସାମ୍ବାଦିକମାନଙ୍କୁ ଟିପ୍ପଣୀ ଦେଇ ରାହୁଲ ଗାନ୍ଧୀ ଅଭିଯୋଗ କରିଥିଲେ ଯେ ‘ଭୋଟ୍‌ ଚୋରି’ର ଉଦ୍ଦେଶ୍ୟ ହେଉଛି ବିଜେପିକୁ ଫାଇଦା ଦେବା।  କିନ୍ତୁ ନିର୍ବାଚନ କମିସନ୍‌ ଆଜି ରାହୁଲଙ୍କ ସମସ୍ତ ଅଭିଯୋଗକୁ ଭିତ୍ତିହୀନ କହି ଖଣ୍ଡନ କରିଛନ୍ତି।  ନିର୍ବାଚନ କମିସନ୍‌ ଆଜି ରାହୁଲଙ୍କ ଉପରେ ଏକ ୫ ସୂତ୍ରୀ ଆକ୍ରମଣ କରିଛନ୍ତି।  ରାହୁଲ ଅତ୍ୟନ୍ତ ବେପରୁଆ ଟିପ୍ପଣୀ ଦେଉଛନ୍ତି ଯାହା ସଂପୂର୍ଣ୍ଣ ଭିତ୍ତହୀନ ଓ ନିନ୍ଦନୀୟ। ତାଙ୍କ ସହ ଯୋଗାଯୋଗ କରିବାପାଇଁ ବାରମ୍ବାର‌ ଚେଷ୍ଟା କରାଯାଇଥିଲେ ମଧ୍ୟ ସେ ପ୍ରତିଥର ଅଣଦେଖା କରିଛନ୍ତି ବୋଲି କମିସନ ଦାବି କରିଛନ୍ତି। 

ଚିଠିର ଜବାବ ନଦେଇ ନିର୍ବାଚନ କମିସନ କର୍ମଚାରୀଙ୍କୁ ଧମକାଉଛନ୍ତି

Advertisment

କମିସନଙ୍କ ଅନୁଯାୟୀ ୨୦୨୫ ଜୁନ୍‌ ୧୨ ତାରିଖରେ ନିର୍ବାଚନ କମିସନ ରାହୁଲଙ୍କ ପାଖକୁ ମେଲ୍‌ ପଠାଇଥିଲେ।  କିନ୍ତୁ ସେ ଆସିନଥିଲେ।   ଜୁନ୍‌ ୧୨ ତାରିଖରେ କମିସନ୍‌ ରାହୁଲଙ୍କ ନିକଟକୁ ଚିଠି ପଠାଇ‌ଥିଲେ। କିନ୍ତୁ କୌଣସି ଜବାବ ମିଳିନଥିଲା।   କୌଣସି ପ୍ରସଙ୍ଗରେ ବି ରାହୁଲ ଗାନ୍ଧୀ ନିର୍ବାଚନ କମିସନ୍‌ଙ୍କ ନିକଟକୁ କେବେ କିଛି ଚିଠି ପଠାଇନାହାନ୍ତି।  ଏହା  ଆଶ୍ଚର୍ଯ୍ୟଜନକ ଯେ ରାହୁଲ ଗାନ୍ଧୀ ଅତ୍ୟନ୍ତ ବେପରୁଆ ଅଭିଯୋଗ କରୁଛନ୍ତି ଏବଂ ଏବେ ନିର୍ବାଚନ କମିସନ୍‌ ଓ କର୍ମଚାରୀମାନଙ୍କୁ ଧମକାଇବା ଆରମ୍ଭ କରିଛନ୍ତି।  ଉଲ୍ଲେଖଯୋଗ୍ୟ,  ରାହୁଲ ଗାନ୍ଧୀ ଆଜି ସଂସଦ ବାହାରେ ସାମ୍ବାଦିକମାନଙ୍କୁ ଟିପ୍ପଣୀ ଦେଇ କହିଥିଲେ ଯେ ନିର୍ବାଚନ କମିସନ ‘ଭୋଟ୍‌ ଚୋରି’ରେ ସମ୍ପୃକ୍ତ ଏବଂ ଏହା ବିଜେପି ପାଇଁ କାମ କରୁଛି।  କମିସନ ଭୋଟ୍‌ ଚୋରିରେ ସମ୍ପୃକ୍ତି ଥିବା ନେଇ ଆମ ପାଖରେ ପ୍ରମାଣ ଅଛି  ଏବଂ  ଦଳ ପକ୍ଷରୁ ୬ ମାସ ଧରି ତଦନ୍ତ  ପରେ ଏହି ପ୍ରମାଣ ହାସଲ ହୋଇଛି। ରାହୁଲ କହିଛନ୍ତ, ଖୁବ୍‌ଶୀଘ୍ର ଆମେ ଏ ବାବଦ ପ୍ରମାଣ ସାର୍ବଜନୀନ କରିବୁ।