ରାହୁଲଙ୍କ ଦାୟିତ୍ବହୀନ ବୟାନକୁ ଅଣଦେଖା କରୁଛୁ : ନିର୍ବାଚନ କମିସନ

ନୂଆଦିଲ୍ଲୀ : ଶୁକ୍ରବାର ଦିନ ଭାରତର ନିର୍ବାଚନ କମିସନ କଂଗ୍ରେସ ନେତା ରାହୁଲ ଗାନ୍ଧୀଙ୍କ ଦ୍ୱାରା ଲଗାଯାଇଥିବା ଭୋଟର ଚୋରି ଅଭିଯୋଗକୁ ପ୍ରତ୍ୟାଖ୍ୟାନ କରିଛନ୍ତି।  କମିସନ ନିର୍ବାଚନ ଅଧିକାରୀମାନଙ୍କୁ ନିରପେକ୍ଷ ଏବଂ ସ୍ୱଚ୍ଛ ଭାବରେ କାମ କରିବାକୁ ଏବଂ ଦାୟିତ୍ୱହୀନ ବୟାନକୁ ଅଣଦେଖା କରିବାକୁ କହିଛନ୍ତି। କମିସନ ଆହୁରି ମଧ୍ୟ କହିଛନ୍ତି ଯେ ରାହୁଲ ଗାନ୍ଧି କୌଣସି ପତ୍ରର ଜବାବ ଦେଉନାହାନ୍ତି, କିନ୍ତୁ ପ୍ରତିଦିନ ନୂଆ ନୂଆ ଅଭିଯୋଗ କରିଚାଲିଛନ୍ତି । ଧମକ ସତ୍ତ୍ବେ ନିରପେକ୍ଷ ନିର୍ବାଚନ କରିବାକୁ ବଦ୍ଧପରିକର ବୋଲି କମିସନ କହିଛନ୍ତି ।

କଂଗ୍ରେସ ସାଂସଦ ରାହୁଲ ଗାନ୍ଧୀ ଶୁକ୍ରବାର (୧ ଅଗଷ୍ଟ, ୨୦୨୫) ସଂସଦ ଭବନ ପରିସରରେ ନିର୍ବାଚନ କମିସନଙ୍କ ଉପରେ ଭୋଟ ଚୋରିର ଅଭିଯୋଗ ଆଣି କହିଛନ୍ତି ଯେ ଆମ ପାଖରେ ଏହାର ଦୃଢ଼ ପ୍ରମାଣ ଅଛି। ବିହାର ଏସଆଇଆର ବିଷୟରେ ସେ କହିଛନ୍ତି, "ନିର୍ବାଚନ କମିସନ ଏହି ଭୋଟ ଚୋରିରେ ଜଡିତ ଏବଂ ମୁଁ ଏହା ହାଲୁକା ଭାବରେ କହୁନାହିଁ। ମୁଁ ଏହା ଦୃଢ଼ ପ୍ରମାଣ ସହିତ କହୁଛି। ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି ଯେ ନିର୍ବାଚନ କମିସନରେ ଉପରରୁ ତଳ ପର୍ଯ୍ୟନ୍ତ ଯିଏ ବି ଏହି କାମରେ ଜଡିତ, ଆମେ ସେମାନଙ୍କୁ ଛାଡିବୁ ନାହିଁ।"