ନିର୍ବାଚନ କମିସନଙ୍କ ନୋଟିସ୍‌: ଦୁଇଟି ଭୋଟର ପରିଚୟପତ୍ର ପାଇଁ ଅଡ଼ୁଆରେ ତେଜସ୍ୱୀ ଯାଦବ!

ପାଟନା: ବିହାର ବିଧାନସଭାରେ ବିରୋଧୀ ଦଳ ନେତା ତେଜସ୍ୱୀ ପ୍ରସାଦ ଯାଦବ ଆରଏବି ୨୯୧୬୧୨୦ ନମ୍ବରର ଭୋଟର ପରିଚୟପତ୍ର ସୋମବାର ବିଳମ୍ବିତ ସନ୍ଧ୍ୟା ପର୍ଯ୍ୟନ୍ତ ଉପଲବ୍ଧ ହୋଇନାହିଁ। ତେଜସ୍ବୀଙ୍କୁ ଏହି ଭୋଟର ପରିଚୟପତ୍ର ନିର୍ବାଚନ କମିସନଙ୍କ ଠାରେ ଦାଖଲ କରିବା ପାଇଁ ନିର୍ଦ୍ଦେଶ ହୋଇଥିଲା। ଜିଲ୍ଲା ପ୍ରଶାସନ ପକ୍ଷରୁ ଜାତୀୟ ଗଣମାଧ୍ୟମକୁ ମିଳିଥିବା ସୂଚନା ଅନୁଯାୟୀ, ମୂଳ କପି ଉପଲବ୍ଧ ନହେବା ପର୍ଯ୍ୟନ୍ତ, ଅନ୍ୟ କୌଣସି ଭୋଟର ପରିଚୟପତ୍ର ପାଇଁ ଫର୍ମ ୬ରେ ଆବେଦନ କରାଯାଇଥିଲା କି ନାହିଁ ତାହା ଯାଞ୍ଚ କରିବା ସମ୍ଭବ ହେବ ନାହିଁ।

ସୂଚନାଯୋଗ୍ୟ, ଗତ ରବିବାର ଦିନ ଦୀଘା ବିଧାନସଭା ନିର୍ବାଚନମଣ୍ଡଳୀର ନିର୍ବାଚନ ପଞ୍ଜୀକରଣ ଅଧିକାରୀ ରାଷ୍ଟ୍ରୀୟ ଜନତା ଦଳ (ଆରଜେଡି) ନେତା ତେଜସ୍ବୀଙ୍କୁ ଏକ ଚିଠି ଲେଖି ଭିଡିଓରେ ତାଙ୍କ ଦ୍ୱାରା ଉଲ୍ଲେଖ କରାଯାଇଥିବା ଇପିଆଇସି ନମ୍ବର ‘ଆରଏବି ୨୯୧୬୧୨୦’ର ମୂଳ କପି ପ୍ରଦାନ କରିବାକୁ ଅନୁରୋଧ କରିଥିଲେ।

ଜିଲ୍ଲା ନିର୍ବାଚନ ଅଧିକାରୀ ସହ ଡିଏମ୍ ଡକ୍ଟର ତ୍ୟାଗରାଜନ ଏସଏମ କହିଛନ୍ତି ଯେ ସ୍ୱତନ୍ତ୍ର ସଘନ ସଂଶୋଧନ ପ୍ରକ୍ରିୟା ଚାଲିଛି। ଏହି କ୍ରମରେ, ଭୋଟରମାନେ Voters.ECI.GOV.INରେ ଏହାକୁ ଯାଞ୍ଚ କରୁଛନ୍ତି ଏବଂ ଦାବି ଏବଂ ଆପତ୍ତି ଦାଖଲ କରୁଛନ୍ତି। ଡକ୍ୟୁମେଣ୍ଟ ଅନଲାଇନରେ ଅପଲୋଡ୍ ହୋଇନଥିବା ସୂଚନା ଭ୍ରାମକ। 

ଭୋଟରମାନେ ଅନଲାଇନରେ କିମ୍ବା ବୁଥ ଲେଭେଲ ଅଫିସର (ବିଏଲ୍‌ଓ) ମାଧ୍ୟମରେ ଆବଶ୍ୟକ ପ୍ରମାଣପତ୍ର ଦାଖଲ କରିପାରିବେ। ସେ ସୂଚନା ଦେଇଥିଲେ ଯେ ସ୍ୱତନ୍ତ୍ର ସଘନ ସଂଶୋଧନ ଅଧୀନରେ ପ୍ରାପ୍ତ ଗଣନା ଫର୍ମ ମଧ୍ୟରୁ ୯୧.୬୯ ପ୍ରତିଶତ ଭୋଟରଙ୍କ ନାମ ପ୍ରକାଶିତ ଡ୍ରାଫ୍ଟ ଭୋଟର ତାଲିକାରେ ଅନ୍ତର୍ଭୁକ୍ତ। ୮.୩୧ ପ୍ରତିଶତ ଭୋଟରଙ୍କ ଗଣନା ଫର୍ମ ଗ୍ରହଣ କରାଯାଇ ନାହିଁ।

ସେମାନଙ୍କର ତାଲିକା ସମସ୍ତ ସ୍ୱୀକୃତିପ୍ରାପ୍ତ ରାଜନୈତିକ ଦଳଗୁଡ଼ିକୁ ଉପଲବ୍ଧ କରାଯାଇଛି। BLO ଦ୍ୱାରା ଗଣନା ଫର୍ମ ପ୍ରଦାନ କରାଯାଇ ନଥିବା ଭୋଟରଙ୍କ ତାଲିକା ଅନୁପସ୍ଥିତ, ମୃତ, ସ୍ଥାୟୀ ଭାବରେ ସ୍ଥାନାନ୍ତରିତ ଇତ୍ୟାଦି ବର୍ଗରେ ବୁଥ୍ ସ୍ତରୀୟ ଏଜେଣ୍ଟମାନଙ୍କୁ ଦିଆଯାଇଛି।