ସଂସଦରେ ଅର୍ଥନୈତିକ ସର୍ଭେ ରିପୋର୍ଟ ଉପସ୍ଥାପିତ : ବିକାଶ ହାର ୬ରୁ ୬.୫ ପ୍ରତିଶତ ମଧ୍ୟରେ ରହିବ
ନୂଆଦିଲ୍ଲୀ: ପରମ୍ପରା ଅନୁସାରେ ସାଧାରଣ ବଜେଟ ଉପସ୍ଥାପନ ପୂର୍ବରୁ ସଂସଦରେ ଉପସ୍ଥାପିତ ହୋଇଛି ଅର୍ଥନୈତିକ ସର୍ଭେ ରିପୋର୍ଟ । କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ ଆଜି ପାର୍ଲାମେଣ୍ଟରେ ଏହି ରିପୋର୍ଟ ଉପସ୍ଥାପନ କରିଛନ୍ତି । ୨୦୨୦-୨୧ ଆର୍ଥିକ ବର୍ଷ ପାଇଁ ବିକାଶ ହାର ୬ରୁ ୬.୫ ପ୍ରତିଶତ ଭିତରେ ରହିବ ବୋଲି ଅର୍ଥନୈତିକ ସର୍ଭେ ରିପୋର୍ଟରେ ଆକଳନ କରାଯାଇଛି । ଏଥିରେ ପ୍ରଦତ୍ତ ତଥ୍ୟ ଅନୁସାରେ ଦେଶର ଅର୍ଥନୀତି ନିମ୍ନତମ ବିନ୍ଦୁରେ ପହଞ୍ଚିଥିବା ଦେଖାଯାଇଛି।
Sambad is now on WhatsApp
Join and get latest news updates delivered to you via WhatsApp
ଚଳିତ ଆର୍ଥିକ ବର୍ଷର ଦ୍ବିତୀୟ ତ୍ରୈମାସିକରେ ଦେଶର ମୋଟ ଘରୋଇ ଉତ୍ପାଦ (ଜିଡିପି)ର ଅଭିବୃଦ୍ଧି ହାର ୪.୫% ରହିଥିଲା, ଯାହାକି ୨୦୧୩ ମସିହା ପରେ ସର୍ବନିମ୍ନ ଅଭିବୃଦ୍ଧି ହାର ବୋଲି ଜଣାପଡ଼ିଛି। ସେହିପରି ଜାତୀୟ ପରିସଂଖ୍ୟାନ କାର୍ଯ୍ୟାଳୟ ଅନୁସାରେ ୨୦୧୯-୨୦ ଆର୍ଥିକ ବର୍ଷରେ ଭାରତର ଜିଡିପିରେ ମାତ୍ର ୫% ହାରରେ ଅଭିବୃଦ୍ଧି ଘଟିବ। ଏହା ୨୦୦୮-୦୯ ଆର୍ଥିକ ବର୍ଷ ପରେ ସବୁଠାରୁ କମ୍ ବୋଲି ସୂଚନା ମିଳିଛି।
ଅନୈତିକ ସର୍ଭେ ରିପୋର୍ଟ ଉପସ୍ଥାପନ ପରେ ବିରୋଧୀ ଦଳ ସରକାରଙ୍କୁ ସମାଲୋଚନା କରି ହୋହାଲ୍ଲା ଓ ପାଟିତୁଣ୍ଡ କରିଥିଲେ । ଏହା ପରେ ବାଚସ୍ପତି ଆସନ୍ତାକାଲି ଦିନ ୧୧ଟା ଯାଏ ଲୋକସଭାକୁ ମୁଲତବୀ ରଖିଛନ୍ତି । ସଂସଦରେ ଆର୍ଥିକ ସର୍ଭେକ୍ଷଣ ରିପୋର୍ଟ ଆଗତ ହେବା ଆଗରୁ ସଂସଦ ଭବନ ପରିସରରେ ସଫଳତାର ସହ ଗୃହ କାମରେ ସହଯୋଗ କରିବାକୁ ଅପିଲ କରିଛନ୍ତି ପ୍ରଧାନମନ୍ତ୍ରୀ । ବିଶେଷ କରି ଏହି ଅଧିବେଶନରେ ଆର୍ଥିକ ସ୍ଥିତି ଓ ନୀତିକୁ ନେଇ ଚର୍ଚ୍ଚା ହେବ ବୋଲି କହିଛନ୍ତି ପ୍ରଧାନମନ୍ତ୍ରୀ ।