କୋଇଲା ଚୋରାଚାଲାଣ ମାମଲା : ବରିଷ୍ଠ ମହିଳା ଆଇଏଏସ୍ ଅଧିକାରୀ ସୌମ୍ୟା ଚୌରାସିଆଙ୍କୁ ଗିରଫ କଲା ଇଡି
ରାୟପୁର: କୋଇଲା ଚୋରା ଚାଲାଣ ମାମଲାରେ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ଛତିଶଗଡ଼ର ଜଣେ ଶୀର୍ଷ ଅଧିକାରୀଙ୍କୁ ଗିରଫ କରିଛି। ଗିରଫ ହୋଇଥିବା ଏହି ଅଧିକାରୀଙ୍କ ନାମ ସୌମ୍ୟା ଚୌରାସିଆ ଏବଂ ସେ ମୁଖ୍ୟମନ୍ତ୍ରୀ ଭୂପେଶ ବାଘେଲଙ୍କ ନେତୃତ୍ୱାଧୀନ ପ୍ରଶାସନରେ ଉପସଚିବ ଭାବରେ କାର୍ଯ୍ୟ କରୁଥିଲେ।
Sambad is now on WhatsApp
Join and get latest news updates delivered to you via WhatsApp
ଗିରଫ ହୋଇଥିବା ସରକାରୀ ଅଧିକାରୀ ଏକ ବେଆଇନ ଖଣି ମାମଲାରେ କେନ୍ଦ୍ରୀୟ ଏଜେନ୍ସିଗୁଡ଼ିକର ରାଡାରରେ ଥିଲେ ଏବଂ ଇଡି ଦ୍ୱାରା ତଦନ୍ତ ଆରମ୍ଭ ହେବା ପୂର୍ବରୁ ଆୟକର ବିଭାଗ ତାଙ୍କ ସମ୍ପତ୍ତି ଉପରେ ଚଢାଉ କରିଥିଲା। ଆଜି ଇଡି ଦ୍ୱାରା ପଚରାଉଚରା ପାଇଁ ଡକାଯିବା ପରେ ତାଙ୍କୁ ଗିରଫ କରାଯାଇଥିଲା।
ସୂତ୍ରରୁ ପ୍ରକାଶ ଯେ ଗତ ଦୁଇ ମାସ ମଧ୍ୟରେ କେନ୍ଦ୍ରୀୟ ଅନୁସନ୍ଧାନ ଏଜେନ୍ସିମାନେ ସୌମ୍ୟଙ୍କୁ ଅନେକ ଥର ପଚରାଉଚରା କରିଥିଲେ। ଏଥିସହ ଇଡି ସର୍ଚ୍ଚ ଅପରେସନ୍ ମଧ୍ୟ କରିଥିଲା ଏବଂ ବେଆଇନ ଅର୍ଥ କାରବାର ନିରୋଧ ଆଇନ (ପିଏମଏଲଏ) ୨୦୦୨ ଅନୁଯାୟୀ ଆଜି ତାଙ୍କୁ ଗିରଫ କରିଥିଲା। ଗିରଫ ଅଧିକାରୀ ଏକ କୋଇଲା ଘୋଟାଲା ମାମଲାରେ ସଂପୃକ୍ତ ଥିଲେ। ଛତିଶଗଡ଼ରେ ପରିବହନ କରାଯାଉଥିବା ପ୍ରତ୍ୟେକ ଟନ୍ କୋଇଲା ପାଇଁ ପିଛା ୨୫ଟଙ୍କାର ବେଆଇନ ଶୁଳ୍କ ଆଦାୟ କରାଯାଇଥିବା ନେଇ ତାଙ୍କ ନାମରେ ଅଭିଯୋଗ ରହିଥିଲା।