ନିରବ ମୋଦି ବିରୋଧରେ ୧୨ ହଜାର ପୃଷ୍ଠାର ଚାର୍ଜସିଟ ଦାଖଲ କଲା ଇଡି
ମୁମ୍ବାଇ : ପ୍ରତିଭୂତି ନିର୍ଦ୍ଦେଶାଳୟ (ଇଡି) ପିଏନବି ଋଣଠକେଇର ମୁଖ୍ୟ ଅଭିଯୁକ୍ତ ନିରବ ମୋଦି ନାଁରେ ପ୍ରଥମ ଚାର୍ଜସିଟ ଦାଖଲ କରିଛି । ମୁମ୍ବାଇର ଏକ ସ୍ୱତନ୍ତ୍ର କୋର୍ଟରେ ପ୍ରାୟ ୧୨ ହଜାର ପୃଷ୍ଠାର ଏହି ଚାର୍ଜସିଟ ଦାଖଲ ହୋଇଛି । ପ୍ରିଭେନ୍ସନ ଅଫ ମନି ଲଣ୍ଡରିଂ ଆଇନ ଅନୁସାରେ ଏହି ଚାର୍ଜସିଟ ପ୍ରସ୍ତୁତ କରାଯାଇଛି । ଏହି ଠକେଇର ଅନ୍ୟତମ ଅଭିଯୁକ୍ତ ତଥା ନିରବ ମୋଦିଙ୍କ ମାମୁଁ ମେହୁଲ ଚୋକସୀଙ୍କ ବିରୋଧରେ ଏକ ଦ୍ୱିତୀୟ ଚାର୍ଜସିଟ ଦାଖଲ ହେବ ବୋଲି ଜଣାପଡିଛି । କିଛି ଦିନ ତଳେ ଇଡି ନିରବ ମୋଦିଙ୍କର ୮୫ କୋଟି ଟଙ୍କାର ହୀରା ଅଳଙ୍କାର ଜବତ କରିଥିଲା । ଏହା ପୂର୍ବରୁ ମଧ୍ୟ ୧୭୦ କୋଟିର ଅଲଙ୍କାର ଜବତ ହୋଇଥିଲା ।
Sambad is now on WhatsApp
Join and get latest news updates delivered to you via WhatsApp
ସୂଚନାଯୋଗ୍ୟ ଯେ ପ୍ରାୟ ୧୩ ହଜାର କୋଟି ଟଙ୍କାର ପିଏନବି ମହାଦୁର୍ନୀତିର ମୁଖ୍ୟ ନାୟକ କୁହାଯାଉଥିବା ନିରବ ମୋଦି ହଂକଂରେ ଥିବା ଗତ ମାର୍ଚ୍ଚ ମାସରେ ହିଁ ଜଣାପଡିଥିଲା । କିନ୍ତୁ ଇତି ମଧ୍ୟରେ ସେ ନ୍ୟୁୟର୍କ ଚାଲିଯାଇଥିବା ସଂଦେହ କରାଯାଉଛି । ନିରବ ମୋଦି ଓ ତାଙ୍କ ମାମୁଁ ମେହୁଲ ଚୋକସୀ ମିଳିତଭାବେ ଷଡ଼ଯନ୍ତ୍ର କରି ଜାଲ ଏଲଓୟୁ ମାଧ୍ୟମରେ ଏହି ଠକେଇ କରିଥିବା ଜଣାପଡିଛି । ପିଏନବି ଠକେଇ ମାମଲାର ସିବିଆଇ ତଦନ୍ତ କରୁଛି । କିନ୍ତୁ ଏହା ସହିତ ଇଡି ମଧ୍ୟ ଏକ ମନି ଲଣ୍ଡରିଂ ମାମଲା ରଜ୍ଜୁ କରିଥିଲା ।