ନୂଆଦିଲ୍ଲୀ : ବେଆଇନ ଅର୍ଥ କାରବାର ଅଭିଯୋଗରେ ଗିରଫ ହୋଇଥିବା ଦିଲ୍ଲୀ ସରକାରଙ୍କ ମନ୍ତ୍ରୀ ସତ୍ୟେନ୍ଦ୍ର ଜୈନଙ୍କୁ ଜେରା କରିବା ବେଳେ ନାକେଦମ ହୋଇଯାଇଛି ପ୍ରବର୍ତ୍ତନ ନିର୍ଦ୍ଦେଶାଳୟ ( ଇଡି) । ଜେରା ବେଳେ ସେ କହୁଛନ୍ତି ଯେ ତାଙ୍କର କରୋନା ହୋଇଥିଲା, ସେଥିପାଇଁ ତାଙ୍କର ଆଉ କିଛି ମନେ ନାହିଁ ।
Sambad is now on WhatsApp
Join and get latest news updates delivered to you via WhatsApp
ଇଡି ପକ୍ଷରୁ କୁହାଯାଇଛି ଯେ ଜେରା ବେଳେ ଯେତେବେଳେ ତାଙ୍କୁ କେତେକ କାଗଜପତ୍ର ସମ୍ପର୍କରେ ପଚରା ଯାଇଥିଲା, ତାହାର ଉତ୍ତରରେ ଜୈନ କହିଥିଲେ ଯେ ତାଙ୍କୁ କରୋନା ସଂକ୍ରମଣ ହୋଇଥିଲା । ଏହି କାରଣରୁ ତାଙ୍କର ମେମୋରି (ସ୍ମୃତିଶକ୍ତି) ଚାଲିଯାଇଛି, ଆଉ କିଛି ମନେ ପଡ଼ୁନାହିଁ । ଏପରି ଉତ୍ତର ଶୁଣି ଇଡି ଅଧିକାରୀମାନେ ତାଜୁବ ହୋଇଯାଇଥିଲେ ।
ଆୟଠାରୁ ଅଧିକ ସମ୍ପତ୍ତି ଜବତ ଓ ମନି ଲଣ୍ଡ୍ରିଙ୍ଗ (ବେଆଇନ ଅର୍ଥ କାରବାର) ଅଭିଯୋଗରେ ଗତ ମେ ୩୦ରେ ଇଡି ସତ୍ୟେନ୍ଦ୍ର ଜୈନଙ୍କୁ ଗିରଫ କରିଥିଲା । ଏହା ସହିତ ଇଡି ପକ୍ଷରୁ ସତ୍ୟେନ୍ଦ୍ର ଜୈନ ଓ ତାଙ୍କ ସହଯୋଗୀଙ୍କ ଘରେ ଚଢଉ କରି ନଗଦ ଟଙ୍କା ଓ ସୁନା ଅଳଙ୍କାର ଜବତ କରାଯାଇଥିଲା । ଏହା ସହିତ କେତେକ ଆପତ୍ତିଜନକ କାଗଜପତ୍ର ଜବତ କରାଯାଇଥିଲା । ତାଙ୍କ ପତ୍ନୀ ଓ ଝିଅଙ୍କ ନାମରେ ୧୬ କୋଟିର ଠକେଇ ଅଭିଯୋଗ ମଧ୍ୟ ରହିଛି । ତେବେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ ଏହାକୁ ଖଣ୍ଡନ କରିଛନ୍ତି । ରାଜନୈତିକ ପ୍ରତିଶୋଧ ପାଇଁ କେନ୍ଦ୍ର ସରକାର ଇଡିକୁ ବ୍ୟବହାର କରୁଥିବା କେଜ୍ରିଓ୍ବାଲ କହିଛନ୍ତି ।