ପାର୍ବଣ, ନିର୍ବାଚନ ଯୋଗୁଁ ପୁଣି କରୋନା ସଂକ୍ରମଣ ବଢିବା ଆଶଙ୍କା, ସ୍ଥିତି ଉପରେ ସତର୍କ ଦୃଷ୍ଟି ରଖିଛନ୍ତି କେନ୍ଦ୍ର ସରକାର
ନୂଆଦିଲ୍ଲୀ : କରୋନା ମହାମାରୀ ପାଇଁ କିଛି ମାସ ପୂର୍ବରୁ ଦେଶରେ ଲାଗୁ କଟକଣାକୁ ସରକାର କୋହଳ କରିଛନ୍ତି । ଇତି ମଧ୍ୟରେ ଦେଶରେ ବିହାର ନିର୍ବାଚନ ଓ କେତେକ ରାଜ୍ୟରେ ଉପନିର୍ବାଚନ ହୋଇଯାଇଛି । ଏହା ସହିତ ଦଶହରା, ଦୀପାବଳୀ ପରି ପାର୍ବଣରେ ଲୋକମାନେ ଅଂଶଗ୍ରହଣ କରିଛନ୍ତି । ଏସବୁ ଦ୍ବାରା ଦେଶରେ କରୋନା ସଂକ୍ରମଣ ସଂଖ୍ୟା ପୁଣି ବଢିବାର ଆଶଙ୍କା ସୃଷ୍ଟି ହୋଇଛି । କରୋନା ସଂକ୍ରମଣ ଉପରେ ଏସବୁ ଘଟଣା ଗୁଡ଼ିକର ପ୍ରଭାବ ଖୁବଶୀଘ୍ର ଜଣାପଡ଼ିବ ବୋଲି କହିଛନ୍ତି କେନ୍ଦ୍ର ସ୍ବାସ୍ଥ୍ୟ ସଚିବ ରାଜେଶ ଭୂଷଣ ।
Sambad is now on WhatsApp
Join and get latest news updates delivered to you via WhatsApp
ସ୍ବାସ୍ଥ୍ୟ ମନ୍ତ୍ରାଳୟର ଏକ ସାମ୍ବାଦିକ ସମ୍ମିଳନୀରେ ସେ କହିଛନ୍ତି ଯେ ଆମକୁ ନୂଆ ସଂକ୍ରମଣଗୁଡ଼ିକ ଉପରେ ସତର୍କତାର ସହ ନିଜର ରଖିବାକୁ ହେବ ।
ଦିଲ୍ଲୀରେ ଗତ କିଛି ଦିନ ହେଲା ପୁଣି ଥରେ କରୋନା ସଂକ୍ରମଣ ସଂଖ୍ୟା ବୃଦ୍ଧି ପାଇଚାଲିଛି । ଏହା ଫଳରେ ଉଭୟ ଦିଲ୍ଲୀ ଓ କେନ୍ଦ୍ର ସରକାରଙ୍କ ଚିନ୍ତା ବଢିଯାଇଛି । ଏହି ସ୍ଥିତିର ମୁକାବିଲା କରିବାକୁ କେନ୍ଦ୍ର ସରକାର ଜରୁରୀକାଳୀନ ଭିତ୍ତିରେ କେତେକ ପଦକ୍ଷେପ ନେଉଛନ୍ତି । ସେସବୁ ପଦକ୍ଷେପ ମଧ୍ୟରେ ରହିଛି ହସପିଟାଲରେ ଶଯ୍ୟା ସଂଖ୍ୟା ଓ ଆଇସିୟୁ ଶଯ୍ୟା ସଂଖ୍ୟା ବୃଦ୍ଧି, ଦୈନିକ ପରୀକ୍ଷା ସଂଖ୍ୟାକୁ ଦ୍ବିଗୁଣିତ କରିବା, କଣ୍ଟ୍ରାକ୍ଟ ଟ୍ରେସିଂ, କଣ୍ଟେନମେଣ୍ଟ ଜୋନ ଲାଗୁ କରିବା ଅନ୍ୟତମ ।
ଆସନ୍ତା କିଛି ଦିନ ମଧ୍ୟରେ ଆଇସିୟୁ ଶଯ୍ୟା ସଂଖ୍ୟା ୩୫୦୦ରୁ ୬୦୦୦କୁ ବୃଦ୍ଧି କରାଯିବ ବୋଲି ନିତି ଆୟୋଗର ସଦସ୍ୟ ଡ. ଭି.କେ.ପଲ କହିଛନ୍ତି ।