ମୋଦୀଙ୍କ ଷ୍ଟାଇଲରେ ଉଦ୍ଧବଙ୍କ ଉପରେ ବରଷିବେ ଏକନାଥ
ମୁମ୍ବାଇ: ମୁମ୍ବାଇରେ ଆୟୋଜିତ ହେବାକୁ ଥିବା ଦଶହରା ମେଳା ପୂର୍ବରୁ ମହାରାଷ୍ଟ୍ରର ରାଜନୈତିକ ବାତାବରଣ ଉତ୍ତପ୍ତ ହୋଇଛି। ଉଦ୍ଧବ ଠାକୁର ଦାଦରର ଶିବାଜୀ ପାର୍କରେ ଦଶହରା ସମାବେଶ କରିବାକୁ ଯାଉଥିବାବେଳେ ବାନ୍ଦ୍ରାସ୍ଥିତ ବିକେସି ଗ୍ରାଉଣ୍ଡରେ ମୁଖ୍ୟମନ୍ତ୍ରୀ ଏକନାଥ ସିନ୍ଦେ ଦଶହରା ରାଲି କରିବାକୁ ଯାଉଛନ୍ତି | ଆଉ ରାଲି ପାଇଁ ରାଜ୍ୟର ବିଭିନ୍ନ ସ୍ଥାନରୁ କର୍ମୀମାନେ ମୁମ୍ବାଇ ଆସୁଛନ୍ତି। କୌଣସି ଅଘଟଣକୁ ରୋକିବା ପାଇଁ ବହୁ ସଂଖ୍ୟାରେ ପୁଲିସ ଫୋର୍ସ ମୁତୟନ କରାଯାଇଛି। ଆସନ୍ତାକାଲି ବାନ୍ଦ୍ରା-କୁର୍ଲା କମ୍ପ୍ଲେକ୍ସର ସେଣ୍ଟ୍ରାଲ ଗ୍ରାଉଣ୍ଡରେ ମୁଖ୍ୟମନ୍ତ୍ରୀ ଏକନାଥ ସିନ୍ଦେଙ୍କ ଦଳର ଦଶହରା ସମାବେଶ ଅନୁଷ୍ଠିତ ହେବ। ଏହି ଦଶହରା ସମାବେଶ କେବଳ ସମଗ୍ର ରାଜ୍ୟର ନୁହେଁ ବରଂ ସମଗ୍ର ଦେଶର ଦୃଷ୍ଟି ଆକର୍ଷଣ କରିଛି। ଶିବସେନାର ସିନ୍ଦେ ଗ୍ରୁପ୍ର ଏହି ଦଶହରା ସମାବେଶ ଅପରାହ୍ନ ୪ଟାରେ ଶିବସେନାର ନୂତନ ଗୀତ ସହିତ ଆରମ୍ଭ ହେବ |
Sambad is now on WhatsApp
Join and get latest news updates delivered to you via WhatsApp
ନେତାଙ୍କ ଭାଷଣ ଅପରାହ୍ନ ୫.୩୦ରୁ ଆରମ୍ଭ ହେବ। ମଞ୍ଚରେ ମୁଖ୍ୟମନ୍ତ୍ରୀ ଏକନାଥ ସିନ୍ଦେଙ୍କୁ ସ୍ୱାଗତ କରାଯିବ। ସମସ୍ତ ଶିବସେନା ମନ୍ତ୍ରୀମାନେ ମୁଖ୍ୟମନ୍ତ୍ରୀ ଏକନାଥ ସିନ୍ଦେଙ୍କୁ ୧୨ ଫୁଟର ରୂପା ଖଣ୍ଡା ପ୍ରଦାନ କରିବେ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଯେଭଳି ପ୍ରାୟ ସମୟ ରାତି ୮ଟାରେ ସିଧା ପ୍ରସାରଣରେ ଭାଷଣ ଦେଇ ଦେଶବାସୀଙ୍କୁ ଅନେକ ଥର ଆଶ୍ଚର୍ଯ୍ୟ କରିଛନ୍ତି, ବର୍ତ୍ତମାନ ମୁଖ୍ୟମନ୍ତ୍ରୀ ଏକନାଥ ସିନ୍ଦେ ମଧ୍ୟ ରାତି ୮ଟାରେ ତାଙ୍କ ଭାଷଣ ଦେବାକୁ ଯାଉଛନ୍ତି। ଏଭଳି ପରିସ୍ଥିତିରେ ଏକନାଥ ସିନ୍ଦେ ପୁଣିଥରେ ଉଦ୍ଧବ ଠାକରେଙ୍କୁ ଝଟକା ଦେବେ ବୋଲି କଳ୍ପନାଜଳ୍ପନା ଚାଲିଛି। ମହାରାଷ୍ଟ୍ର ରାଜନୀତିରେ ସସପେନ୍ସ ବୃଦ୍ଧି ପାଇଛି। ଏକନାଥ ସିନ୍ଦେ ନିକଟରେ କହିଥିଲେ ଯେ ଅନେକ ଲୋକ ଆମ ସହ ଆସିବାକୁ ପ୍ରସ୍ତୁତ ଅଛନ୍ତି। ସେମାନେ ଦଶହରା ରାଲିରେ ଆମ ସହ ଯୋଗ ଦେବେ | ଦଶହରା ରାଲିରେ ପ୍ରାୟ ତିନି ଲକ୍ଷ କର୍ମୀ ସାମିଲ ହେବେ ବୋଲି ମୁଖ୍ୟମନ୍ତ୍ରୀ ସିନ୍ଦେ କହିଛନ୍ତି।