ମୁମ୍ବାଇ: ବିରାଟ ବଡ଼ ବିଲ । ଆଗରେ ଅଢେଇ ଏକରର ଜମି । ଚାଷ କଲେ ଘର ଚଳିବ, ପେଟ ପୋଷାହେବ । ଚାଷ ପାଇଁ ପାଗ ଦେଲାଣି, ସମୟ ଆସିଗଲାଣି.. ସମସ୍ତେ ହଳ କରି ଚାଷ ବି ଆରମ୍ଭ କଲେଣି.. ହେଲେ ତାଙ୍କ ପାଖରେ ଟଙ୍କାଟିଏ ନାହିଁ ଚାଷ କରିବାକୁ । ନା ବୟସ ଅଛି ନା ଟଙ୍କା ଅଛି ମୂଲିଆ ଲଗେଇ ବିଲକୁ ଚାଷ କରିବାକୁ.. କେବେ ଖାଇଲେ କେବେ ପୁଣି ଉପାସ । ଆଉ ଏ ପରିସ୍ଥିତିରେ ଟଙ୍କା କାହୁଁ ଆସିବ ଚାଷ କରିବାକୁ ?

Advertisment

ଗରିବ ବୋଲି ଏତେ ସମସ୍ୟା, ଏତେ ଦହଗଞ୍ଜ । ଦୁନିଆରେ ଦରିଦ୍ର ହୋଇ ଜନ୍ମ ହେବା କଣ ପାପ ? ଯଦି ହଁ ତାହାଲେ ଭଗବାନ ଜନ୍ମ ଦିଅନ୍ତି କଣ ପାଇଁ.. ହଉ ଜୀବନ ଅଛି ଯେତେବେଳେ ଜିଇଁବାକୁ ତ ହେବ ଆଉ ଜିଇଁବା ପାଇଁ ଖାଇବାକୁ ପଡିବ, ପରିଶ୍ରମ କରିବାକୁ ପଡ଼ିବ ତେଣିକି ବୟସ ଯେତେ ହେଉ..

ଏମିତି ହିଁ ଭାବି ଗତ କିଛି ବର୍ଷ ହେବ ନିଜ ବିଲକୁ ନିଜେ ଏମିତି ବଳଦ ସାଜି ଚାଷ କରୁଛନ୍ତି ଏ ବୃଦ୍ଧ ଚାଷୀ । ଆଉ ତାଙ୍କୁ ସାହାଯ୍ୟ କରୁଛନ୍ତି ତାଙ୍କ ବୃଦ୍ଧା ପତ୍ନୀ । ଏଡେ ବଡ଼ ବିଲରେ ବଳଦ ଜାଗାରେ ବୃଦ୍ଧ ନିଜେ ବାନ୍ଧି ହୋଇ ଲଙ୍ଗଳକୁ ଟାଣୁଛନ୍ତି ଆଉ ତାଙ୍କ ପତ୍ନୀ ପଛରେ କାଠର ଦେଶୀ ଲଙ୍ଗଳ ଧରି ହଳ କରି କରି ଚାଲିଛନ୍ତି.. ଓଃ କି ଯନ୍ତ୍ରଣାଦାୟକ ଏ ଚିତ୍ର, କି ହୃଦୟବିଦାରକ ଏ ଘଟଣା । ଗରିବ ହେଲେ କଣ ସତରେ ଏମିତି ସହିବାକୁ ପଡେ । ମହାରାଷ୍ଟ୍ର ଲାଟୁରର ଏ ଦୃଶ୍ୟ ଏବେ ସାରା ଦେଶକୁ ଦୋହଲାଇ ଦେଇଛି ଆଉ ସରକାରଙ୍କ ଚାଷୀ ବିକାଶ ନୀତି ଉପରେ ପ୍ରଶ୍ନ ଚିହ୍ନ ଲଗାଇଛି ।

ମହାରାଷ୍ଟ୍ରର ୭୫ ବର୍ଷୀୟ ବୃଦ୍ଧ ଅମବାଦାସ ପାଓ୍ଵାର ଏବଂ ତାଙ୍କ ପତ୍ନୀ ମୁକ୍ତାବାଇ ଦୁହେଁ ଚାଷ ପାଇଁ ନିଜେ ହଳ କରୁଥିବା ଦୃଶ୍ୟ ସାମ୍ନାକୁ ଆସିଛି । ସେମାନେ ଅତି ଗରିବ ଶ୍ରେଣୀର ହୋଇଥିବା ବେଳେ ନା ତାଙ୍କ ପାଖରେ ଟଙ୍କା ଅଛି ନା ଟ୍ରାକ୍ଟର କିମ୍ବା ଲୋକ ଲଗାଇ ଚାଷ କରିବାକୁ ସାମର୍ଥ୍ୟ ଅଛି ତେଣୁ ସେମାନେ ବାଧ୍ଯ ହୋଇ ଏ ବୟସରେ ବି ସଂଘର୍ଷ କରି ଚାଷ କରୁଛନ୍ତି ଆଉ ପେଟ ପୋଷୁଛନ୍ତି । ସେମାନଙ୍କର ଗୋଟିଏ ପୁଅ ଶ୍ରମିକ ଭାବେ ସହରରେ କାମ କରେ । ଘରେ ତାଙ୍କର ବୋହୂ ଏବଂ ନାତିନାତୁଣି ଅଛନ୍ତି । ଯେଉଁମାନେ ମଧ୍ଯ ଏହି କାମରେ ସେମାନଙ୍କୁ ସାହାଯ୍ୟ କରନ୍ତି । 

ଗତ ଦୁଇ ବର୍ଷ ସେମାନେ ଏମିତି ବିନା ଚାଷ ଉପକରଣରେ ହଳ କରୁଥିବା ବେଳେ ସେମାନଙ୍କ ସ୍ଥିତି କେବେ ସୁଧୁରିବ ସେକଥା ଭାବି ଭାବି ଚିନ୍ତିତ ଅଛନ୍ତି ବୃଦ୍ଧ । ତେବେ ଗୋଟେ ପଟେ ଦେଶରେ ଋଣଭାର ସହି ନପାରି ଚାଷୀ ଆତ୍ମହତ୍ୟା କରୁଥିବା ବେଳେ ଚାଷ ସମୟରେ କୃଷକଙ୍କ ଆତ୍ମହତ୍ୟା ଜନିତ ଖବର ସାରା ଦେଶରୁ ଆସେ ଆଉ ଏତିକି ବେଳେ ନିଜ ପରିସ୍ଥିତି ଆଗରେ, ନିଜ ଦାରିଦ୍ରତା ଆଗରେ ମୁଣ୍ଡ ନନୁଆଁଇ, ସମୟର ପ୍ରତିକୂଳ ପରିସ୍ଥିତି ଆଗରେ ହାରି ନଯାଇ ଚାଷ କରୁଥିବା ଦୁଇ ବୃଦ୍ଧ ଦମ୍ପତି ଆତ୍ମହତ୍ୟା କରିବାକୁ ଚିନ୍ତା କରୁଥିବା ଚାଷୀଙ୍କ ପାଇଁ ପ୍ରେରଣା ପାଲଟିଛନ୍ତି ।

ସେମାନେ ଗରିବ ହୋଇପାରନ୍ତି ହେଲେ ଜୀବନକୁ ହାରି ଦେଇ ସେମାନେ ଭୀରୁ ସାଜିପାରିବେନି । ଆଜି ଗରିବ ଅଛନ୍ତି ହୁଏତ କାଲି କି ସ୍ଥିତି ବଦଳିଯାଇପାରେ କିନ୍ତୁ ଜୀବନକୁ ନିଜ ହାତରେ ନିଜେ ହତ୍ୟା କରିଦେଲେ କି ଲାଭ ମିଳିବ ବୋଲି ଏ ଦୃଶ୍ୟ ପ୍ରେରଣା ଦେଉଛି । ଦୁଇ ବୃଦ୍ଧ ଦମ୍ପତିଙ୍କ ଏ ନିଷ୍ଠା, ଦାରିଦ୍ର୍ୟତା ଭିତରେ ବଞ୍ଚିବାର ଆଶାକୁ ଆମେ ସଲାମ ଜଣାଉଛୁ.. ଜୟ କିଷାନ୍