ମତଦାନ ଦିବସର ୭୨ ଘଣ୍ଟା ପୂର୍ବରୁ ନିର୍ବାଚନ ମଣ୍ଡଳୀରେ ବାଇକ୍ ରାଲି ଉପରେ ନିଷେଧାଦେଶ ଜାରି କଲେ ନିର୍ବାଚନ କମିସନ
ନୂଆଦିଲ୍ଲୀ: ମତଦାନ ଦିବସର ୭୨ ଘଣ୍ଟା ପୂର୍ବରୁ ସମସ୍ତ ନିର୍ବାଚନ ମଣ୍ଡଳୀରେ ବାଇକ୍ ରାଲି ଉପରେ ଆଜି (ସୋମବାର) ନିଷେଧାଦେଶ ଜାରି କରିଛନ୍ତି ନିର୍ବାଚନ କମିସନ। ପୂର୍ବରୁ କେବଳ ମତଦାନ ଦିନ ବାଇକ୍ ରାଲି ବାରଣ ଥିଲା। ତେବେ, ଏସଂକ୍ରାନ୍ତରେ ଆଗତ ରିପୋର୍ଟ, ମତାମତ ଓ ପ୍ରସ୍ତାବଗୁଡିକ ଉପରେ ବିଚାର କରିବା ପରେ ଆଜି କମିସନ ନିଷ୍ପତ୍ତି ନେଇଛନ୍ତି ଯେ ମତଦାନ ଦିବସର ୭୨ ଘଣ୍ଟା ପୂର୍ବରୁ ମତଦାନ ହେବାକୁ ଥିବା ନିର୍ବାଚନ ମଣ୍ଡଳୀରେ କୌଣସି ସ୍ଥାନରେ ବାଇକ୍ ରାଲି ପାଇଁ ଅନୁମତି ଦିଆଯିବ ନାହିଁ।
ଆଗାମୀ ୨୭ ତାରିଖ ଠାରୁ ଅନୁଷ୍ଠିତ ହେବାକୁ ଥିବା ପଶ୍ଚିମବଙ୍ଗ, କେରଳ, ତାମିଲନାଡୁ, ଆସାମ ଏବଂ ପୁଡୁଚେରିର ମୁଖ୍ୟ ନିର୍ବାଚନ ଅଧିକାରୀମାନଙ୍କୁ ଦିଆଯାଇଥିବା ଏକ ନିର୍ଦ୍ଦେଶନାମାରେ କମିସନ ଦର୍ଶାଇଛନ୍ତି ଯେ କେତେକ ସ୍ଥାନରେ ବାଇକ୍ ସମାଜ ବିରୋଧୀ ଉପାଦାନମାନଙ୍କ ଦ୍ୱାରା ବ୍ୟବହୃତ ହୁଏ। ତେଣୁ, ମତଦାନ ଦିନ କିମ୍ବା ମତଦାନର ଅବ୍ୟବହିତ ପୂର୍ବରୁ ବାଇକ୍ ରାଲି ନାମରେ ଭୋଟରଙ୍କୁ ଭୟଭୀତ କରାଯିବାର ଆଶଙ୍କା ଓ ସମ୍ଭାବନା ରହିଛି।
ସେଥିପାଇଁ ବାଇକ୍ ରାଲିକୁ ବିରୋଧ କରି ଆସିଥିବା ରିପୋର୍ଟ ଓ ପ୍ରସ୍ତାବ ଉପରେ ବିଚାର କରିବା ପରେ କମିସନ ନିଷ୍ପତ୍ତି ନେଇଛନ୍ତି ଯେ ମତଦାନ ତାରିଖର ୭୨ ଘଣ୍ଟା ପୂର୍ବରୁ ମତଦାନର ସମ୍ମୁଖୀନ ହେବାକୁ ଯାଉଥିବା ନିର୍ବାଚନ ମଣ୍ଡଳୀର କୌଣସି ସ୍ଥାନରେ ବାଇକ୍ ରାଲି ଅନୁମତି ଦିଆଯିବ ନାହିଁ।
ଏନେଇ କମିସନ ମୁଖ୍ୟ ନିର୍ବାଚନ ଅଧିକାରୀଙ୍କ ସମେତ ରାଜନୈତିକ ଦଳ ଏବଂ କମିସନଙ୍କ ପର୍ଯ୍ୟବେକ୍ଷକଙ୍କ ସମେତ ସମ୍ପୃକ୍ତ ସମସ୍ତ ହିତାଧିକାରୀଙ୍କୁ ଜଣାଇଦେଇଛନ୍ତି।
