ସରପଞ୍ଚ ନିର୍ବାଚନରେ ଲଢ଼ୁଛନ୍ତି ତିନି ପତ୍ନୀ, କାହା ପାଇଁ ପ୍ରଚାର କରିବେ? ଚିନ୍ତାରେ ସ୍ୱାମୀ
ଇନ୍ଦୋର: ମଧ୍ୟପ୍ରଦେଶରେ ଏବେ ପଞ୍ଚାୟତ ନିର୍ବାଚନ ଚାଲିଥିବାବେଳେ ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି | ମଧ୍ୟପ୍ରଦେଶର ସିଙ୍ଗ୍ରାଉଲି ଜିଲ୍ଲାର ଜଣେ ପଞ୍ଚାୟତ ସମିତି ସଦସ୍ୟଙ୍କର ତିନିଜଣ ପତ୍ନୀ ଏଥର ପଞ୍ଚାୟତ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରୁଛନ୍ତି। ସମାନ ପଞ୍ଚାୟତରୁ ସରପଞ୍ଚ ନିର୍ବାଚନରେ ଦୁଇଜଣ ପତ୍ନୀ ମୁହାଁମୁହିଁ ହୋଇଥିବାବେଳେ ତୃତୀୟ ପତ୍ନୀ ଜଣକ ଜିଲ୍ଲା ପରିଷଦ ସଦସ୍ୟ ଭାବରେ ନିର୍ବାଚନ ମଇଦାନକୁ ଓହ୍ଲାଇଛନ୍ତି | ତେବେ କେଉଁ ପତ୍ନୀଙ୍କ ପାଇଁ ନିର୍ବାଚନ ପ୍ରଚାର କରିବେ ସେହି ଚିନ୍ତାରେ ପଞ୍ଚାୟତ ସମିତି ସଦସ୍ୟ ଜଣକ ବର୍ତ୍ତମାନ କେବଳ ଘର ନୁହେଁ ଗାଁ ଛାଡି କୁଆଡେ ଚାଲିଯାଇଛନ୍ତି |
Sambad is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ମୁତାବକ ସିଙ୍ଗ୍ରାଉଲି ଜିଲ୍ଲାର ଘୋଙ୍ଗ୍ରା ପଞ୍ଚାୟତର ପଞ୍ଚାୟତ ସମିତି ସଦସ୍ୟ ସୁଖରାମ ସିଂଙ୍କର ତିନିଜଣ ପତ୍ନୀ ଅଛନ୍ତି। ସୁଖରାମଙ୍କ ପ୍ରଥମ ପତ୍ନୀ ଦେବସର ଜିଲ୍ଲାପରିଷଦ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରୁଛନ୍ତି। ଦ୍ୱିତୀୟ ପତ୍ନୀ କୁସୁମକାଲୀ ଏବଂ ତୃତୀୟ ପତ୍ନୀ ଗୀତା ସିଂ ପିପରଖଡ ଗ୍ରାମପଞ୍ଚାୟତରେ ସରପଞ୍ଚ ପଦବୀ ପାଇଁ ନାମାଙ୍କନପତ୍ର ଦାଖଲ କରିଛନ୍ତି। ବର୍ତ୍ତମାନ କୁସୁମକାଲୀ ସରପଞ୍ଚ ଥିବାବେଳେ ତାଙ୍କୁ ଟକ୍କର ଦେବାକୁ ଗୀତା ସିଂଙ୍କ ପ୍ରାର୍ଥୀ ପତ୍ର ଦାଖଲ କରିଛନ୍ତି | ଉଭୟ ଚାଁହୁଛନ୍ତି ଯେ ସୁଖରାମ ସେମାନଙ୍କ ପାଇଁ ପ୍ରଚାର କରନ୍ତୁ। ବର୍ତ୍ତମାନ ଅସୁବିଧା ଏତେ ବଢିଯାଇଛି ଯେ ସୁଖରାମ କିଛି ଦିନ ପାଇଁ ଛୁଟି ନେଇ କୁଆଡେ ଚାଲିଯାଇଛନ୍ତି।
ଏହି ଘଟଣାକୁ ନେଇ ଅନ୍ୟ ଜଣେ ସରପଞ୍ଚ ପ୍ରାର୍ଥୀ ହିନ୍ଦୁ ଅଧିନିୟମ ବିରୁଦ୍ଧରେ ଦୁଇ ପତ୍ନୀଙ୍କ ନାମାଙ୍କନ ଖାରଜ କରିବାକୁ କହିଛନ୍ତି | ତେବେ ଏପର୍ଯ୍ୟନ୍ତ ନାମାଙ୍କନପତ୍ର ଖାରଜ କରାଯାଇ ନାହିଁ। ଦେବସର ଏସଡିଏମ ଆକାଶ ସିଂ କହିଛନ୍ତି ଯେ କୌଣସି ପତ୍ନୀ ଅଭିଯୋଗ କରିନାହାଁନ୍ତି। ଯେତେବେଳେ ପତ୍ନୀମାନଙ୍କର କୌଣସି ଅସୁବିଧା ନାହିଁ, ସେତେବେଳେ କାର୍ଯ୍ୟାନୁଷ୍ଠାନ ନିଆଯିବ ନାହିଁ | ଯଦି ଅଭିଯୋଗ ଆସେ, ତେବେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ |