ସେପ୍ଟେମ୍ବର ୨୦୨୨ରେ କଂଗ୍ରେସକୁ ମିଳିପାରେ ନୂତନ ଅଧ୍ୟକ୍ଷ
ନୂଆଦିଲ୍ଲୀ: ସେପ୍ଟେମ୍ବର ୨୦୨୨ରେ କଂଗ୍ରେସକୁ ମିଳିପାରେ ନୂଆ ଅଧ୍ୟକ୍ଷ। କଂଗ୍ରେସ ଅଧ୍ୟକ୍ଷ ବାଛିବା ପାଇଁ ଆସନ୍ତା ବର୍ଷ ସେପ୍ଟେମ୍ବରରେ ନିର୍ବାଚନ ହେବାର ସମ୍ଭାବନା ରହିଛି ବୋଲି ଜଣାପଡ଼ିଛି। ଆଜି ନୂଆଦିଲ୍ଲୀରେ ସଦସ୍ୟତା ଅଭିଯାନ ନିମନ୍ତେ କାର୍ଯ୍ୟସୂଚୀ ନିର୍ଦ୍ଧାରଣ ଚୂଡ଼ାନ୍ତ କରିବା ଏବଂ ଆମୂଳଚୂଳ ସଙ୍ଗଠନୀୟ ନିର୍ବାଚନ ନିମନ୍ତେ ଦଳର ସର୍ବୋଚ୍ଚ ନିଷ୍ପତ୍ତି ଗ୍ରହଣକାରୀ ସଂଗଠନ ‘କଂଗ୍ରେସ୍ ଓ୍ଵାର୍କିଙ୍ଗ୍ କମିଟି’ର ଗୁରୁତ୍ୱପୂର୍ଣ୍ଣ ବୈଠକ ପରେ ଏଭଳି ସୂଚନା ମିଳିଛି।
Sambad is now on WhatsApp
Join and get latest news updates delivered to you via WhatsApp
୨୦୧୯ ଲୋକସଭା ନିର୍ବାଚନ ପରେ କଂଗ୍ରେସର ନିରାଶଜନକ ପ୍ରଦର୍ଶନ ପରେ ରାହୁଲ ଗାନ୍ଧୀ ଅଧ୍ୟକ୍ଷ ପଦରୁ ଇସ୍ତଫା ଦେବା ପରଠାରୁ ସୋନିଆ ଗାନ୍ଧୀ ଦଳର ମଧ୍ୟବର୍ତ୍ତୀକାଳୀନ ମୁଖ୍ୟ ଭାବରେ କାର୍ଯ୍ୟ କରିଆସୁଛନ୍ତି।
ବୈଠକରେ ପ୍ରାରମ୍ଭିକ ଅଭିଭାଷଣ ଦେଇ କାର୍ଯ୍ୟନିର୍ବାହୀ ଅଧ୍ୟକ୍ଷା ସୋନିଆ ଗାନ୍ଧୀ କହିଥିଲେ ଯେ, ସମଗ୍ର ସଙ୍ଗଠନ କଂଗ୍ରେସର ପୁନଃଉତ୍ଥାନ ଚାହେଁ। କିନ୍ତୁ, ଏଥିପାଇଁ ଆବଶ୍ୟକ ଏକତା। ଦଳର ସ୍ୱାର୍ଥକୁ ଶ୍ରେଷ୍ଠ ବୋଲି ମଧ୍ୟ ବିଚାର କରିବାକୁ ପଡ଼ିବ। ସର୍ବୋପରେ, ଏଥିପାଇଁ ଆତ୍ମନିୟନ୍ତ୍ରଣ ଏବଂ ଶୃଙ୍ଖଳା ମଧ୍ୟ ଆବଶ୍ୟକ କରେ।
ସେ ଆହୁରି ମଧ୍ୟ କହିଛନ୍ତି, କିଛି ଦିନ ତଳୁ ବିଧାନସଭା ନିର୍ବାଚନ ନିମନ୍ତେ ଆମର ପ୍ରସ୍ତୁତି ଆରମ୍ଭ ହୋଇଯାଇଛି। ଆମେ ବହୁ ଆହ୍ଵାନର ସମ୍ମୁଖୀନ ହେବା, ଏଥିରେ ସନ୍ଦେହ ନାହିଁ। କିନ୍ତୁ, ଆମେ ଯଦି ସମ୍ମିଳିତ, ଶୃଙ୍ଖଳିତ ହେବା ସହ କେବଳ ଦଳର ସ୍ୱାର୍ଥ ପ୍ରତି ଦୃଷ୍ଟି ଦେବା, ତେବେ ମୋର ଦୃଢ଼ବିଶ୍ୱାସ ଆମେ ଭଲ ପ୍ରଦର୍ଶନ କରିବା।
କୋଭିଡ୍-୧୯ ମହାମାରୀ ବ୍ୟାପିବା ପାରଠାରୁ ଏହା ହେଉଛି ‘ସିଡବ୍ଲୁ’ର ପ୍ରଥମ ପ୍ରତ୍ୟକ୍ଷ ବୈଠକ। ସୋନିଆ ଗାନ୍ଧୀ, ଲୋକସଭା ସଦସ୍ୟ ରାହୁଲ୍ ଗାନ୍ଧୀ ଏବଂ ସାଧାରଣ ସମ୍ପାଦିକା ପ୍ରିୟଙ୍କା ଗାନ୍ଧୀ ଭଦ୍ରାଙ୍କ ସମେତ ପୂର୍ବତନ କେନ୍ଦ୍ରମନ୍ତ୍ରୀ ପି ଚିଦମ୍ବରମ୍ ଏବଂ ଛତିଶଗଡ଼ ଏବଂ ପଞ୍ଜାବର ମୁଖ୍ୟମନ୍ତ୍ରୀଙ୍କ ଭଳି ବରିଷ୍ଠ ନେତାମାନେ ମଧ୍ୟ ଏହି ବୈଠକରେ ଭାଗ ନେଇଥିଲେ। ଏହା ବ୍ୟତିରେକେ, ‘ଜି-୨୩’ର କେତେକ ସଦସ୍ୟ ମଧ୍ୟ ଏହି ବୈଠକରେ ଉପସ୍ଥିତ ଥିଲେ।