ଇଲେକ୍ଟୋରାଲ ବଣ୍ଡ୍ ତଥ୍ୟ ପ୍ରକାଶ ମାମଲା: ଏସ୍‌ବିଆଇ ବିରୋଧରେ ଅବମାନନା ପ୍ରକ୍ରିୟା ପାଇଁ ଆବେଦନ

ନୂଆଦିଲ୍ଲୀ: ୨୦୧୯ ଏପ୍ରିଲ ୧୨ ତାରିଖରୁ ଭାରତୀୟ ଷ୍ଟେଟ ବ୍ୟାଙ୍କ (ଏସ୍‌ବିଆଇ) ପକ୍ଷରୁ ଭାରତୀୟ ନିର୍ବାଚନ କମିସନଙ୍କ ନିକଟରେ କିଣାଯାଇଥିବା ଇଲେକ୍ଟୋରାଲ ବଣ୍ଡ (ଇବି)ର ବିବରଣୀ ଦାଖଲ କରିବାର ସମୟସୀମା ଶେଷ ହେବାର ଗୋଟିଏ ଦିନ ପରେ ଆସୋସିଏସନ୍ ଫର୍ ଡେମୋକ୍ରାଟିକ୍ ରିଫର୍ମସ୍ (ଏଡିଆର୍) ଗୁରୁବାର ସୁପ୍ରିମ୍‌କୋର୍ଟଙ୍କ ଦ୍ୱାରସ୍ଥ ହୋଇଛି। ଆଇନଜୀବୀ ପ୍ରଶାନ୍ତ ଭୂଷଣ ପ୍ରଧାନ ବିଚାରପତିଙ୍କ ନିକଟରେ ଯୁକ୍ତି ଉପସ୍ଥାପନ କରିଥିଲେ ଯେ ଅଦାଲତଙ୍କ ନିର୍ଦ୍ଦେଶ ଅନୁଯାୟୀ ଏସ୍‌ବିଆଇ ନିର୍ଦ୍ଦିଷ୍ଟ ସମୟସୀମା ମଧ୍ୟରେ ତଥ୍ୟ ପ୍ରଦାନ କରି ନ ଥିବାରୁ ଏହା ବିରୋଧରେ ଅଦାଲତ ଅବମାନନା ପ୍ରକ୍ରିୟା ଆରମ୍ଭ କରାଯାଉ।

ତେବେ ମାର୍ଚ୍ଚ ୪ ତାରିଖରେ ଏସ୍‌ବିଆଇ ଇବି ତଥ୍ୟ ପ୍ରଦାନ ପାଇଁ ସମୟସୀମା ଜୁନ୍ ୩୦ ତାରିଖ ପର୍ଯ୍ୟନ୍ତ ସମୟ ବୃଦ୍ଧି କରିବା ଲାଗି ଆବେଦନ କରି ଦର୍ଶାଇଥିଲା ଯେ ଡାଟାକୁ ଡିକୋଡ୍ କରିବା ଏବଂ ଦାନ ସହିତ ଦାତାମାନଙ୍କୁ ମିଳାଇବା ଏକ ଜଟିଳ ପ୍ରକ୍ରିୟା। ଯଦି ଏହି ଆବେଦନକୁ ଅନୁମତି ମିଳେ, ତେବେ ଚଳିତ ବର୍ଷ ଏପ୍ରିଲରୁ ମେ ମାସ ମଧ୍ୟରେ ହେବାକୁ ଥିବା ଆଗାମୀ ଲୋକସଭା ନିର୍ବାଚନ ପରେ ହିଁ ଦାତା ଓ ଦାନ ଗ୍ରହଣକାରୀଙ୍କ ତଥ୍ୟ ପ୍ରକାଶ ପାଇବ। ବ୍ୟାଙ୍କ ଦର୍ଶାଇଛି ଯେ ୨୨,୨୧୭ ଇବିର ବିବରଣୀ ଡିକୋଡ୍ କରିବାର ଆବଶ୍ୟକତା ରହିଛି, ଯେଉଁଥିରେ ୪୪,୪୩୪ (ଜାରି କରାଯାଇଥିବା ଇବି ସଂଖ୍ୟାର ଦୁଇଗୁଣ) ସୂଚନା ସେଟ୍ ଡିକୋଡିଂ, କମ୍ପାଇଲିଂ ଏବଂ ତୁଳନା କରିବା କାର୍ଯ୍ୟ ଅନ୍ତର୍ଭୁକ୍ତ କାରଣ ବଣ୍ଡ୍‌ର କ୍ରେତା ଓ ଗ୍ରହୀତାଙ୍କ ସମ୍ପର୍କିତ ବିବରଣୀ ଦୁଇଟି ଅଲଗା ସ୍ଥାନରେ ରଖାଯାଇଛି।

ଫେବ୍ରୁଆରି ୧୫ରେ ୫ ଜଣିଆ ଖଣ୍ଡପୀଠ କେନ୍ଦ୍ର ସରକାରଙ୍କ ୨୦୧୮ ଇବି ରାଜନୈତିକ ପାଣ୍ଠି ଯୋଜନାକୁ ଅସାମ୍ବିଧାନିକ ଘୋଷଣା କରି କହିଥିଲେ ଯେ ଭୋଟରଙ୍କ ସୂଚନା ଅଧିକାରକୁ ଅସାମାନ୍ୟ ଢଙ୍ଗରେ ଉଲ୍ଲଂଘନ କରିବା ଯୁକ୍ତିଯୁକ୍ତ ନୁହେଁ। ପ୍ରଧାନ ବିଚାରପତି ଚନ୍ଦ୍ରଚୂଡ଼ଙ୍କ ନେତୃତ୍ୱରେ ଗଠିତ ଖଣ୍ଡପୀଠ ସେହି ସମୟରେ ଏକମାତ୍ର ନିର୍ଦ୍ଦିଷ୍ଟ ଇବି ପ୍ରଦାନକାରୀ ବ୍ୟାଙ୍କ ଏସ୍‌ବିଆଇକୁ ତୁରନ୍ତ ଇବି ଜାରି କରିବା ବନ୍ଦ କରିବାକୁ ନିର୍ଦ୍ଦେଶ ଦେଇଥିଲେ ଏବଂ ୨୦୧୯ ଏପ୍ରିଲ ୧୨ରୁ କିଣାଯାଇଥିବା ଇବିର ବିବରଣୀ ମାର୍ଚ୍ଚ ୬ ସୁଦ୍ଧା ନିର୍ବାଚନ କମିସନଙ୍କ ନିକଟରେ ଦାଖଲ କରିବାକୁ କହିଥିଲେ। ରାଜନୈତିକ ଦଳଗୁଡ଼ିକୁ ମିଳିଥିବା ସମସ୍ତ ପାଣ୍ଠିକୁ ମାର୍ଚ୍ଚ ୧୩ ତାରିଖ ସୁଦ୍ଧା ଇସିଆଇର ୱେବସାଇଟରେ ରଖି ସାର୍ବଜନୀନ କରାଯିବ ବୋଲି ଆଦେଶ ଦିଆଯାଇଥିଲା। ଏସବିଆଇ ଅବଧି ବୃଦ୍ଧି ପାଇଁ ଅନୁରୋଧ କରିବା ପରେ ଏଡିଆର ଗୁରୁବାର ଏକ ଅବମାନନା ଆବେଦନ ଦାଖଲ କରି ଏସବିଆଇର ସମ୍ପ୍ରସାରଣ ଅନୁରୋଧକୁ ‘ଦୁର୍ଭାଗ୍ୟଜନକ’ ଏବଂ ଆଗାମୀ ଲୋକସଭା ନିର୍ବାଚନ ପୂର୍ବରୁ ସ୍ୱଚ୍ଛତା ପ୍ରୟାସକୁ ବିଫଳ କରିବାକୁ ଉଦ୍ୟମ ବୋଲି ଦର୍ଶାଇଛି।