୨୨ ହଜାର ପେଟ୍ରୋଲ ପମ୍ପରେ ଲଗାଯିବ ଇଲେକ୍ଟ୍ରିକ ଚାର୍ଜର

ନୂଆଦିଲ୍ଲୀ: ଦେଶରେ ବୈଦ୍ୟୁତିକ ଯାନକୁ ଅଧିକ ବିସ୍ତାର କରିବାକୁ ସରକାର ଏକାସାଙ୍ଗରେ ଅନେକ ଯୋଜନା ଉପରେ କାର୍ଯ୍ୟ କରୁଛନ୍ତି | ଯାନବାହାନର ମୂଲ୍ୟ ଉପରେ ରିହାତି ସହିତ ଇ-ଯାନ ପାଇଁ ଭିତ୍ତିଭୂମି ସୃଷ୍ଟି କରିବା ଭଳି ଯୋଜନା କରାଯାଇଛି | ଭାରୀ ଶିଳ୍ପ ମନ୍ତ୍ରୀ ମହେନ୍ଦ୍ର ନାଥ ପାଣ୍ଡେ ଆଜି ସୂଚନା ଦେଇଛନ୍ତି ଯେ ଅଟୋମୋବାଇଲ୍ ରିସର୍ଚ୍ଚ ଆସୋସିଏସନ୍ ଅଫ୍ ଇଣ୍ଡିଆ ଇ-ଯାନ ପାଇଁ ଦ୍ରୁତ ଚାର୍ଜର ବିକାଶ କରୁଛି ଏବଂ ପେଟ୍ରୋଲ ପମ୍ପରେ ଚାର୍ଜିଂ ଷ୍ଟେସନ୍ ସ୍ଥାପନ ପାଇଁ ମଧ୍ୟ ସରକାର ଯୋଜନା କରୁଛନ୍ତି।

ମନ୍ତ୍ରୀ ସୂଚନା ଦେଇଛନ୍ତି ଯେ ସମଗ୍ର ଦେଶରେ ଥିବା ୨୨ ହଜାର ପେଟ୍ରୋଲ ପମ୍ପରେ ଇ-ଯାନ ଚାର୍ଜର ସ୍ଥାପନ ପାଇଁ ତୈଳ ଏବଂ ପ୍ରାକୃତିକ ଗ୍ୟାସ ମନ୍ତ୍ରାଳୟ ସହିତ ଆଲୋଚନା କରାଯାଉଛି | ସେ ଏଥିପାଇଁ କୌଣସି ସମୟ ସୀମା ଉଲ୍ଲେଖ କରିନଥିଲେ ବି ସୂଚାଇ ଦେଇଛନ୍ତି ଯେ ଇ-ଯାନ ପାଇଁ ଭିତ୍ତିଭୂମି ସୃଷ୍ଟି କରିବା ହେଉଛି ସରକାରଙ୍କ ଅନ୍ୟତମ ପ୍ରାଥମିକତା।

ସେ ସୂଚନା ଦେଇଛନ୍ତି ଯେ ବର୍ତ୍ତମାନ ଏକ ରାଜପଥରେ ପ୍ରତ୍ୟେକ ୨୫ କିଲୋମିଟର ଦୂରତାରେ ଏକ ଚାର୍ଜିଂ ଷ୍ଟେସନ୍ ସ୍ଥାପନ କରିବାକୁ ଯୋଜନା ହୋଇଥିବାବେଳେ ସହରଗୁଡିକରେ ୩ କିଲୋମିଟର ବ୍ୟାସାର୍ଦ୍ଧରେ ଗୋଟିଏ ଚାର୍ଜିଂ ଷ୍ଟେସନ୍ ରହିବ | ପୁଣେ ଭିତ୍ତିକ ପ୍ରତିଷ୍ଠାନ ଚାର୍ଜର ପ୍ରୋଟୋଟାଇପ୍ ବିକଶିତ କରିସାରିଛି ଏବଂ ଚାର୍ଜର ଡିସେମ୍ବର ୨୦୨୨ ସୁଦ୍ଧା ପ୍ରସ୍ତୁତ ହୋଇଯିବ |