ବିଦ୍ୟୁତ ବଞ୍ଚାଇବା ପାଇଁ ବାଂଲାଦେଶରେ ବଢ଼ିଲା ସ୍କୁଲ ଛୁଟି, ବ୍ୟାଙ୍କ-ଅଫିସରେ କମିଲା କାର୍ଯ୍ୟ ସମୟ

ଢାକା: ବାଂଲାଦେଶରେ ଏବେ ବିଜୁଳି ସଙ୍କଟ ଦେଖାଦେଇଛି | ଆଉ ବିଦ୍ୟୁତ୍ ବ୍ୟବହାରକୁ ହ୍ରାସ କରିବା ପାଇଁ ବିଦ୍ୟାଳୟର ସାପ୍ତାହିକ ଛୁଟି ଦିନକ ପରିବର୍ତ୍ତେ ଦୁଇ ଦିନକୁ ବୃଦ୍ଧି କରାଯାଇଛି | ସେହିପରି ସରକାରୀ କାର୍ଯ୍ୟାଳୟ ଏବଂ ବ୍ୟାଙ୍କଗୁଡିକର କାର୍ଯ୍ୟ ସମୟ ଏକ ଘଣ୍ଟା ହ୍ରାସ କରାଯାଇଛି। ୟୁକ୍ରେନ-ଋଷ ଯୁଦ୍ଧ ହେତୁ ଇନ୍ଧନ ମୂଲ୍ୟ ବୃଦ୍ଧି ମଧ୍ୟରେ ବାଂଲାଦେଶ ଏହି ପଦକ୍ଷେପ ନେଇଛି। ମିଳିଥିବା ସୂଚନା ମୁତାବକ ବାଂଲାଦେଶ କ୍ୟାବିନେଟ ସଚିବ ଖାଣ୍ଡକର ଅନୱାରୁଲ ଇସଲାମ ସୋମବାର କହିଛନ୍ତି ଯେ ବାଂଲାଦେଶର ଅଧିକାଂଶ ସ୍କୁଲ ଶୁକ୍ରବାର ଦିନ ବନ୍ଦ ରହେ ଏବଂ ଶନିବାର ଦିନ ମଧ୍ୟ ବନ୍ଦ ରହିବ। ସେ କହିଛନ୍ତି ଯେ ସରକାରୀ କାର୍ଯ୍ୟାଳୟ ଏବଂ ବ୍ୟାଙ୍କଗୁଡିକ ସେମାନଙ୍କର ଦୈନନ୍ଦିନ କାର୍ଯ୍ୟ ସମୟକୁ ଆଠ ଘଣ୍ଟାରୁ ସାତ ଘଣ୍ଟାକୁ ହ୍ରାସ କରିବେ |

କିନ୍ତୁ ଘରୋଇ କାର୍ଯ୍ୟାଳୟଗୁଡ଼ିକୁ ନିଜସ୍ୱ କାର୍ଯ୍ୟସୂଚୀ ସ୍ଥିର କରିବାକୁ ଅନୁମତି ଦିଆଯିବ। ଗତ ସପ୍ତାହରେ ବିଦ୍ୟୁତ ମୂଲ୍ୟ ବିରୋଧରେ ବିରୋଧ ପ୍ରଦର୍ଶନ କରାଯାଇଥିଲା। ଏସବୁକୁ ନଜରରେ ରଖି ସରକାର ସମସ୍ତ ଡିଜେଲ ଭିତ୍ତିକ ବିଦ୍ୟୁତ୍ ଉତ୍ପାଦନ କେନ୍ଦ୍ରକୁ ସ୍ଥଗିତ ରଖିବା ପରେ ଦୈନିକ ବିଦ୍ୟୁତ୍ ଉତ୍ପାଦନକୁ ୧୦୦୦ ମେଗାୱାଟକୁ ହ୍ରାସ କରିଛନ୍ତି |

ଆଉ ଏଥିପାଇଁ ଦେଶରେ କ୍ରମାଗତ ବିଦ୍ୟୁତ କାଟ କରିବାକୁ ପଡୁଛି । ଉଲ୍ଲେଖ ଥାଉ କି ୟୁକ୍ରେନ ଯୁଦ୍ଧ କାରଣରୁ ଇନ୍ଧନ ଯୋଗାଣ ବ୍ୟାଘାତ ହୋଇଛି | ଆଉ ଗତ ମାସରେ ଇନ୍ଧନ ମୂଲ୍ୟ ୫୦ ପ୍ରତିଶତରୁ ଅଧିକ ବୃଦ୍ଧି କରାଯାଇଥିଲା। ଏସବୁ ସମସ୍ୟାକୁ ଦୃଷ୍ଟିରେ ରଖି ଏକ ସ୍ୱତନ୍ତ୍ର ବ୍ୟବସ୍ଥାରେ ରୁଷରୁ ଶସ୍ତା ଇନ୍ଧନ ପାଇବା ପାଇଁ ବିକଳ୍ପ ଖୋଜାଯାଉଛି ବୋଲି ସରକାର କହିଛନ୍ତି।