ଢାକା ଯାଉଥିବାବେଳେ ପାଇଲଟଙ୍କୁ ହେଲା ହୃଦଘାତ, ନାଗପୁରରେ ଜରୁରୀ ଅଵତରଣ କଲା ବିମାନ
ନାଗପୁର: ଆକାଶରେ ଥିବାବେଳେ ପାଇଲଟଙ୍କୁ ହେଲା ହୃଦଘାତ | ଆଉ ହୃଦଘାତ ସତ୍ତ୍ୱେ ବି ସହ ପାଇଲଟ ସୁରକ୍ଷିତ ଭାବେ ବିମାନକୁ ଅଵତରଣ କରାଇଥିବାରୁ ଯାତ୍ରୀମାନେ ସୁରକ୍ଷିତ ଅଛନ୍ତି | ମହାରାଷ୍ଟ୍ରର ନାଗପୁର ବିମାନବନ୍ଦରରେ ଆଜି ମଧ୍ୟାହ୍ନରେ ଏକ ବାଂଲାଦେଶୀ ବିମାନ ଜରୁରୀ ଅଵତରଣ କରିଛି | ମିଳିଥିବା ସୂଚନା ମୁତାବକ ୧୨୬ ଜଣ ଯାତ୍ରୀଙ୍କୁ ନେଇ ବାଂଲାଦେଶର ବିମାନ ଏୟାରଲାଇନ୍ସର ଏକ ବିମାନ ମସ୍କାଟରୁ ଢାକା ଅଭିମୁଖେ ଯାଉଥିଲା ।
Sambad is now on WhatsApp
Join and get latest news updates delivered to you via WhatsApp
ବିମାନଟି ଭାରତ ଆକାଶରେ ଥିବାବେଳେ ପାଇଲଟଙ୍କୁ ହଠାତ ହୃଦଘାତ ହୋଇଥିଲା। ଏହି ସମୟ ମଧ୍ୟରେ ବିମାନଟି ରାୟପୁର ନିକଟରେ ଥିଲା ଏବଂ ଏହା ଜରୁରୀ ଅବତରଣ ପାଇଁ କୋଲକାତା ଏଟିସି(ଏୟାର ଟ୍ରାଫିକ କଣ୍ଟ୍ରୋଲ) ସହିତ ଯୋଗାଯୋଗ କରିଥିଲା | କୋଲକାତା ଏଟିସି ପକ୍ଷରୁ ବିମାନର ସହ ପାଇଲଟଙ୍କୁ ନାଗପୁର ବିମାନବନ୍ଦରରେ ଅବତରଣ କରିବାକୁ ପରାମର୍ଶ ଦିଆଯାଇଥିଲା। ଆଉ କୋଲକାତା ଏଟିସି ପକ୍ଷରୁ ନାଗପୁର ବିମାନବନ୍ଦରର ଏଟିସି ସହ ଯୋଗାଯୋଗ କରାଯାଇଥିଲା |
ନାଗପୁର ବିମାନବନ୍ଦର ଏଟିସି ପକ୍ଷରୁ ସବୁଜ ସଙ୍କେତ ମିଳିବା ପରେ ବିମାନଟି ୧୧.୪୦ ମିନିଟରେ ନାଗପୁରରେ ଅବତରଣ କରିଥିଲା। ଏହା ପରେ ପାଇଲଟଙ୍କୁ ତୁରନ୍ତ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ଆଉ ସୁରକ୍ଷିତ ଅଵତରଣ ପାଇଁ ଯାତ୍ରୀମାନେ ସହ ପାଇଲଟଙ୍କୁ ଧନ୍ୟବାଦ ଜଣାଇଛନ୍ତି |