ଜୁଲାଇ ୧୯ରୁ ଇଂଲଣ୍ଡରୁ ହଟିବ ଲକଡାଉନ, ସଂକ୍ରମିତ ହେଲେ ଲୋକେ ନିଜକୁ କରିବେ ସଙ୍ଗରୋଧ
ନୂଆଦିଲ୍ଲୀ: ବିଶ୍ୱ କରୋନା ସହିତ ଲଢେଇ କରୁଛି । ଆଉ ଏହାରି ଭିତରେ ଇଂଲଣ୍ଡ ଏକ ବହୁତ ବଡ଼ ନିଷ୍ପତ୍ତି ନେବାକୁ ଯାଉଛି । ଆସନ୍ତା ସପ୍ତାହରୁ ଇଂଲଣ୍ଡ ଲକଡାଉନ୍ କଟକଣା ପ୍ରତ୍ୟାହାର କରିବା ନେଇ ଘୋଷଣା କରିଛି । ଏନେଇ ଇଂଲଣ୍ଡ ପ୍ରଧାନମନ୍ତ୍ରୀ ବୋରିସ ଜନସନଙ୍କ ଘୋଷଣା ପରେ ବିଭିନ୍ନ ଦେଶ ଏବେ ଏହି ନିଷ୍ପତ୍ତିକୁ ନେଇ ବିଚାର କରିବା ଆରମ୍ଭ କରିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଇଂଲଣ୍ଡ ବି ଏବେ କରୋନା ସହିତ ଲଢେଇ କରୁଥିବା ବେଳେ ଇଂଲଣ୍ଡରେ ଏବେ ବି ଦୈନିକ ୧୦୦୦ରୁ ୨୦୦୦ କରୋନା ପଜିଟିଭ୍ ଡାକ୍ତରଖାନାରେ ଭର୍ତ୍ତି ହେଉଛନ୍ତି । ଦୈନିକ ଶହେରୁ ଅଧିକ ଲୋକଙ୍କ ମୃତ୍ୟୁ ହେଉଛି । ତଥାପି ଏହା ଭିତରେ କରୋନାକୁ ନେଇ ବଡ଼ ନିଷ୍ପତ୍ତି ନେଇଛନ୍ତି ଇଂଲଣ୍ଡ ପ୍ରଧାନମନ୍ତ୍ରୀ ବୋରିସ ଜନସନ । ବର୍ତ୍ତମାନ କରୋନା କଟକଣାରେ ଆଉ ଲୋକଙ୍କୁ ଅଧିକ ଦିନ ନରଖିବା ପାଇଁ ଲକଡାଉନର କଠୋର କଟକଣାକୁ ଜୁଲାଇ ୧୯ ତାରିଖରୁ ପ୍ରତ୍ୟାହାର କରିବାକୁ ନିଷ୍ପତ୍ତି ନେଇଛନ୍ତି ବୋରିସ ଜନସନ ।
କରୋନା ସହିତ ଲଢେଇ ଭିତରେ ଇଂଲଣ୍ଡ ପ୍ରଧାନମନ୍ତ୍ରୀଙ୍କ ପଦକ୍ଷେପ ବଡ଼ ବାର୍ତ୍ତା ପ୍ରଦାନ କରୁଛି । କାରଣ କରୋନା କଟକଣାରେ ବିଶ୍ୱର ଅନେକ ଦେଶର ଅର୍ଥନୀତି ପ୍ରଭାବିତ ହେଲାଣି । କାମ ନଥିବାରୁ ଲୋକଙ୍କ ବଞ୍ଚିବା ବି କଷ୍ଟକର ହୋଇଗଲାଣି । ସଂଚିତ ଅର୍ଥ ସରିବା ପରେ କିପରି ମଣିଷ ବଞ୍ଚିବ ତାକୁ ନେଇ ଚିନ୍ତା । ଏପରି କିଛି କଷ୍ଟକର ପରିସ୍ଥିତିରେ ଇଂଲଣ୍ଡ ପ୍ରଧାନମନ୍ତ୍ରୀ କରୋନା କଟକଣାକୁ ପ୍ରତ୍ୟାହାର କରି ସତର୍କତାର ସହ ଜୀବନ ବଞ୍ଚିବାକୁ ଲୋକଙ୍କ ପାଇଁ ବାଟ ବାଛିବାକୁ ପସନ୍ଦ କରିଛନ୍ତି ।