ମୋଦୀଙ୍କ ଜି୭ ପୋଷାକରେ ପରିବେଶ-ଅନୁକୂଳ ବାର୍ତ୍ତା

ନୂଆଦିଲ୍ଲୀ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ରବିବାର ଜି୭ ସମ୍ମିଳନୀରେ ରିସାଇକିଲ୍‌ ସାମଗ୍ରୀରେ ନିର୍ମିତ ଏକ ଜ୍ୟାକେଟ୍ ପିନ୍ଧିଥିଲେ। ଏହା ମାଧ୍ୟମରେ ସେ ଏକ ପରିବେଶ-ଅନୁକୂଳ ବାର୍ତ୍ତା ପ୍ରଦାନ କରିଥିଲେ।

ବ୍ୟବହୃତ ପ୍ଲାଷ୍ଟିକ୍ ବୋତଲ ସଂଗ୍ରହ କରି ଏହାକୁ ଚୂର୍ଣ୍ଣ କରି ତରଳାଇ ରଙ୍ଗ ମିଶାଇ ସୂତା ଉତ୍ପାଦନ କରି ପୁନଃଚକ୍ରିତ କପଡା ତିଆରି ହୁଏ। ଏହି ପ୍ରକ୍ରିୟା ବିଭିନ୍ନ ଉତ୍ପାଦନ ସ୍ତରରେ ନିର୍ଗମନକୁ ବହୁତ କମ୍ କରିଥାଏ।

ହିରୋସିମାଠାରେ ଅନୁଷ୍ଠିତ ଜି୭ ଶିଖର ସମ୍ମିଳନୀରେ ‘ଏକାଧିକ ସଙ୍କଟକୁ ଦୂର କରିବା ପାଇଁ ଏକାଠି କାର୍ଯ୍ୟ କରିବା’ ଉପରେ ଏକ ଅଧିବେଶନରେ ପ୍ରଧାନମନ୍ତ୍ରୀ ମୋଦୀ ଭାଷଣ ଦେଇ ପ୍ରାକୃତିକ ସମ୍ପଦର ସଦୁପଯୋଗ ଏବଂ ନୂତନ ବିକାଶ ମଡେଲ ଉପରେ ଆଲୋକପାତ କରିଥିଲେ। ପ୍ରଧାନମନ୍ତ୍ରୀ କହିଥିଲେ ଯେ, ବିକାଶଶୀଳ ଦେଶର ପ୍ରଗତିରେ ବାଧା ସୃଷ୍ଟି ନ କରି ବିକାଶ ମଡେଲ ବିକାଶର ପଥ ପରିଷ୍କାର କରିବା ଉଚିତ। ସାରା ବିଶ୍ୱରେ ଜୈବିକ କୃଷିର ଏକ ନୂତନ ମଡେଲ ସୃଷ୍ଟି କରିବାକୁ ସେ ଗୁରୁତ୍ୱାରୋପ କରିଥିଲେ।