ହାଓ୍ବାଇ : ସୋମବାରଦିନ ହାଓ୍ବାଇର ମୌନାଲୋଆ ଆଗ୍ନେୟଗିରିରୁ ଅଗ୍ନି ଉଦଗୀରଣ ଆରମ୍ଭ ହେବା ପରେ ଏକ ବିରଳ ଘଟଣା ଘଟିଛି । ତାହା ହେଉଛି ଦୁଇଟି ଆଗ୍ନେୟଗିରିରୁ ଏକାସମୟରେ ଅଗ୍ନି ଉଦଗୀରଣ । ମୌନାଲୋଆଠାରୁ ମାତ୍ର ୨୧ କିଲୋମିଟର ଦୂରରେ ଥିବା କିଲାଇ ଆଗ୍ନେୟଗିରିରୁ ଗତ କିଛି ବର୍ଷ ହେଲା ଅଗ୍ନି ଉଦଗୀରଣ ହୋଇଚାଲିଛି ।
Sambad is now on WhatsApp
Join and get latest news updates delivered to you via WhatsApp
ହାଓ୍ବାଇ ଭୋଲକାନୋ ନ୍ୟାସନାଲ ପାର୍କର ସୂଚନା ଅନୁସାରେ ଏହି ବିରଳ ଘଟଣାକୁ ଦେଖିବାକୁ ଅନେକ ପର୍ଯ୍ୟଟକ ଆସିବାର ସମ୍ଭାବନା ରହିଛି ।
ପାଖାପାଖି ଥିବା ଦୁଇଟି ଆଗ୍ନେୟଗିରି ସକ୍ରିୟ ହେବା ବିରଳ ହେଲେ ବି ପୂର୍ବରୁ ଥରେ ଏହାର ନଜିର ରହିଛି । ତାହା ହେଉଛି ୨୦୦୫ରେ ରୁଷର କାମଚଟକା ମାଳଭୂମିରେ ଥିବା ଦୁଇଟି ଆଗ୍ନେୟଗିରି- କ୍ଲିଉଚେକସ୍କି ଓ ସିଭେଲୁକରୁ ଏକା ସମୟରେ ଉଦଗୀରଣ ହୋଇଥିଲା ।
ମୌନା ଲୋଆକୁ ପୃଥିବୀର ବୃହତ୍ତମ ଆଗ୍ନେୟଗିରି ବୋଲି କୁହାଯାଏ । ମୌନା ଲୋଆର ଉଚ୍ଚତା ସମୁଦ୍ର ପତ୍ତନରୁ ପ୍ରାୟ ୪୧୬୯ ମିଟର । ସ୍ଥାନୀୟ ପ୍ରଶାସନ ଅନୁସାରେ ବର୍ତ୍ତମାନ ଲାଭା କେବଳ ପର୍ବତର ଉପର ଅଂଚଳରେ ସୀମିତ ରହିଛି । ତେବେ ପ୍ରଶାସନ ପକ୍ଷରୁ ଜାରି ସତର୍କସୂଚନାରେ କୁହାଯାଇଛି ଯେ, ପୂର୍ବରୁ ହୋଇଥିବା ଉଦଗୀରଣକୁ ଲକ୍ଷ୍ୟ କରି କୁହାଯାଇପାରେ ଯେ, ଲାଭା ଯେକୌଣସି ସମୟରେ ତଳକୁ ଗତି କରି ଜନବସତିରେ ପ୍ରବେଶ କରିପାରେ । ଏଣୁ ଲୋକମାନେ ସତର୍କ ରହିବା ଉଚିତ ।