ସ୍ବତନ୍ତ୍ର ଖଲିସ୍ଥାନ ଦେଶ ଗଠନକୁ ସବୁ ଶିଖ ସମର୍ଥନ କରନ୍ତି : ଆକାଲ ତଖତ ପ୍ରମୁଖ

ଚଣ୍ଡିଗଡ଼ :  ପଞ୍ଜାବରେ ଖଲିସ୍ଥାନ ଆନ୍ଦୋଳନ ସପକ୍ଷରେ ସମର୍ଥନ ବଢିବାରେ ଲାଗିଛି । ଆଜି ଏହାକୁ ସମର୍ଥନ କରିଛନ୍ତି ଅକାଳ ତଖତର ଜଠେଦାର ଜ୍ଞାନୀ ହରପ୍ରିତ ସିଂ । ସେ କହିଛନ୍ତି ଯେ ଯଦି ଭାରତ ସରକାର ସ୍ବତନ୍ତ୍ର ଖଲିସ୍ତାନ ଦେଶ ଲାଗି ପ୍ରସ୍ତାବ ଦିଅନ୍ତି ତେବେ ତାକୁ ଗ୍ରହଣ କରାଯିବ ।

ଅକାଲ ତଖତର ଜଠେଦାର ହେଉଛନ୍ତି ଶିଖମାନଙ୍କ ସର୍ବୋଚ୍ଚ ଧାର୍ମିକ ପଦବୀର ଆସିନ ବ୍ୟକ୍ତି । ଆଜି ଏକ ସାମ୍ବାଦିକ ସମ୍ମିଳନୀରେ ସେ କହିଛନ୍ତି ଯେ ସ୍ବତନ୍ତ୍ର ଖଲିସ୍ତାନ ଗଠନ ପାଇଁ କେଉଁ ଶିଖ ଚାହିଁବ ନାହିଁ । କିନ୍ତୁ ଯଦି ଭାରତ ସରକାର ଏଥିପାଇଁ ପ୍ରସ୍ତାବ ଦେବେ ତାହାକୁ ଗ୍ରହଣ କରାଯିବ । ଅପରେସନ ବ୍ଲୁ ଷ୍ଟାରର ୩୬ ତମ ବାର୍ଷିକୀ ଉପଲକ୍ଷେ ଅନୁଷ୍ଠିତ ଏକ ସମ୍ବାଦିକ ସମ୍ମିଳନୀରେ ସେ ଏହା କହିଛନ୍ତି ।

ଏହି ବାର୍ଷିକ ପାଳନ ଉପଲକ୍ଷେ ସ୍ବର୍ଣ୍ଣ ମନ୍ଦିରରେ ହୋଇଥିବା ଏକ ସମାରୋହରେ ମଧ୍ୟ ସ୍ବତନ୍ତ୍ର ଖଲିସ୍ଥାନ ଦେଶ ସପକ୍ଷରେ ସ୍ଲୋଗାନ ଦିଆଯାଇଥିଲା । ଏହି ସ୍ଲୋଗାନରେ କୌଣସି ଖରାପ ନାହିଁ ବୋଲି ସେ କହିଛନ୍ତି । ସେ କହିଛନ୍ତି ଯେ ଗୁରୁ ନାନକ ଦେବ ବେଗମପୁରାର ଭିତ୍ତିପ୍ରସ୍ତର ସ୍ଥାପନ କରିଥିଲେ । ଗୁରୁ ହରଗୋବିନ୍ଦ ଅକାଲ ତଖତ ସ୍ଥାପନ କରିଥିଲେ, ଯାହାକି ଏକ ସାର୍ବଭୌମ ସଂସ୍ଥା । ଏଣୁ ସ୍ବତନ୍ତ୍ର ଖଲିସ୍ଥାନ ଦେଶ ଗଠନକୁ ପ୍ରତି ଶିଖ ଗ୍ରହଣ କରିବେ ବା ସମର୍ଥନ କରିବେ ବୋଲି ସେ କହିଛନ୍ତି ।