‘ମୋ ଜମି ମୋତେ ଫେରାଇଦିଅ’ କହି ବାରମ୍ବାର ସରକାରୀ ଅଫିସ ଦୌଡୁଛନ୍ତି ପୂର୍ବ ସୈନିକ
ଜମି ମାଫିଆଙ୍କ କବଜାରେ ଦେଶ ପାଇଁ ଲଢ଼ିଥିବା ସୈନିକଙ୍କ ଜମି
ପୂର୍ଣ୍ଣିଆ: ଦେଶ ପାଇଁ ଲଢ଼ିଥିବା ସୈନିକଙ୍କୁ ତାଙ୍କ ସେବା ପାଇଁ ସରକାର ଦେଇଥିଲେ ଖଣ୍ଡେ ଜମି | ଆଉ ସାହସିକତା ପୁରସ୍କାର ପାଇଥିବା ଅବସରପ୍ରାପ୍ତ ଯବାନଙ୍କୁ ମିଳିଥିବା ଜମିକୁ ଏବେ କବଜା କରିନେଇଛନ୍ତି କିଛି ଜମି ମାଫିଆ | ନିଜ ଜମି ଖଣ୍ଡିକ ଫେରିପାଇବା ପାଇଁ ବାରମ୍ବାର ସରକାରଙ୍କ ପାଖରେ ଗୁହାରି କରୁଛନ୍ତି ଜଣେ ପୂର୍ବତନ ସୈନିକ | ଏଭଳି ଏକ ଦୁଃଖଦପୂର୍ଣ୍ଣ ଖବର ବିହାର ଜିଲ୍ଲାର ପୂର୍ଣ୍ଣିଆରୁ ଆସିଛି | ମିଳିଥିବା ସୂଚନା ମୁତାବକ ବିହାର ସମସ୍ତିପୁରରେ ରୁହନ୍ତି ଶତ୍ରୁଘ୍ନ ଗିରି | ୧୯୬୨ ଏବଂ ୧୯୭୧ ଯୁଦ୍ଧରେ ଶତ୍ରୁଘ୍ନ ସାହସର ସହ ଲଢ଼ିଥିବାବେଳେ ତାଙ୍କୁ ଦୁଇଟି ସାମରିକ ପଦକ ପ୍ରଦାନ କରାଯାଇଥିଲା। ୧୯୮୪ ମସିହାରେ କେନ୍ଦ୍ର ସରକାର ପୂର୍ଣ୍ଣିଆରେ ତାଙ୍କୁ ଜମି ପ୍ରଦାନ କରିଥିଲେ |
Sambad is now on WhatsApp
Join and get latest news updates delivered to you via WhatsApp
ଅବସର ପରେ ସୈନିକ ଜଣକ କିଭଳି ଜୀବନ ବିତାଇବେ ସେହି ଉଦ୍ଦେଶ୍ୟରେ ଜମି ଦିଆଯାଇଥିବାବେଳେ କିଛି ବର୍ଷ ହେଲା ଜମି ମାଫିଆ ଏହି ଜମିକୁ କବଜା କରିନେଇଛନ୍ତି | ଆଉ ଏହି ଅବସରପ୍ରାପ୍ତ ସୈନିକ ଜଣକ ତାଙ୍କ ଜମି ଫେରିପାଇବା ପାଇଁ ବାରମ୍ବାର ସରକାରୀ ଅଫିସ ଦୌଡ଼ିଥିଲେ ବି କୌଣସି ସୁଫଳ ମିଳିପାରିନାହିଁ |
ନିଜ ଜମି ଖଣ୍ଡିକ ଫେରିପାଇବା ପାଇଁ ଆଜି ଶତ୍ରୁଘ୍ନ ଗିରି ପୂର୍ଣ୍ଣିଆର ଜିଲ୍ଲାପାଳ ଏବଂ ଏସପିଙ୍କୁ ଭେଟିଥିଲେ। ଉଭୟ ଅଧିକାରୀ ପୁଣି ଥରେ ଏହି ଘଟଣାର ତଦନ୍ତ କରି ଜମି ଫେରାଇବାକୁ ପ୍ରତିଶୃତି ଦେଇଥିଲେ । ତେବେ ଏହି ଘଟଣାକୁ ନେଇ ବେଶ ଭାବପ୍ରବଣ ହୋଇପଡିଛନ୍ତି ଶତ୍ରୁଘ୍ନ ଗିରି | ଜୀବନର ବାର୍ଦ୍ଧକ୍ୟ ସମୟରେ ବି ନିଜ ଜମି ଖଣ୍ଡିକ ଫେରିପାଇବା ପାଇଁ ସେ ସଂଘର୍ଷ କରୁଥିବାର ବଖାଣିଥିଲେ | ଜମି ଫେରିପାଇବା ପାଇଁ ସମସ୍ତିପୁରରୁ ପୂର୍ଣ୍ଣିଆ ବାରମ୍ବାର ଦୌଡୁଥିବାରୁ ସେ ହତାଶ ହୋଇଯାଇଥିବାର କହିଛନ୍ତି |