ମୋତେ ଭୟ ନାହିଁ କିନ୍ତୁ ମୋ ପରିବାରର ଜୀବନ ବିପଦରେ

ନୂଆଦିଲ୍ଲୀ: ବଲିଉଡ ଷ୍ଟାର୍‌ ସଲମାନ ଖାନ୍‌ଙ୍କୁ ତୁହାକୁ ତୁହା ହତ୍ୟା ଧମକ ଦେବା ଏବଂ ଏପ୍ରିଲ ୧୪ ତାରିଖରେ ତାଙ୍କ ଘର ଉପରକୁ ହୋଇଥିବା ଗୁଳିମାଡ଼ ମାମଲାରେ ମୁମ୍ବାଇ ପୁଲିସର କ୍ରାଇମ ବ୍ରାଞ୍ଚ ସଙ୍ଗେସଙ୍ଗେ ଯାଞ୍ଚ ଆରମ୍ଭ କରି ଦୁଇଜଣ ଅଭିଯୁକ୍ତଙ୍କୁ ଗିରଫ କରିଥିଲା।

ଏହି ଗୁଳିମାଡ଼ ପରେ ଲରେନ୍ସ ବିଷ୍ଣୋଇ ଗ୍ୟାଙ୍ଗ ଚର୍ଚ୍ଚାର ପରିସରକୁ ଆସିଥିଲା। କାରଣ କିଛିବର୍ଷ ପୂର୍ବରୁ  ଲରେନ୍ସ ବିଷ୍ଣୋଇ ସଲମାନଙ୍କୁ ହତ୍ୟା କରିବାକୁ ଧମକ ଦେଇଥିଲା। ସଲମାନଙ୍କ ଘର ଉପରକୁ ଗୁଳି କରିବାକୁ ଅପରାଧୀ ବାଇକରେ ଆସିଥିଲେ। ଆଉ ନିର୍ଭୟରେ ସୁପରଷ୍ଟାରଙ୍କ ଘର ଉପରକୁ ଗୁଳି କରି ଘଟଣାସ୍ଥଳରୁ ଚମ୍ପଟ ମାରିଥିଲେ। ମୁମ୍ବାଇ ପୁଲିସ ଦୁଇ ଅଭିଯୁକ୍ତଙ୍କୁ ଗିରଫ କରିଥିଲା।  ଏହି ଗୁଳିକାଣ୍ଡ ଘଟଣାକୁ ନେଇ ମୁମ୍ବାଇ ପୁଲିସ ସଲମାନଙ୍କ ବୟାନ ରେକର୍ଡ କରିଥିଲା।

ସଲମାନ ଖାନଙ୍କ ଘରେ ହୋଇଥିବା ଗୁଳିକାଣ୍ଡ ଘଟଣାକୁ ନେଇ ଚାର୍ଜସିଟ ମୁମ୍ବାଇ ପୁଲିସର କ୍ରାଇମବ୍ରାଞ୍ଚ ଦାୟର କରିଛି। ଏଥିରେ ସୁପରଷ୍ଟାର ବୟାନ ଦେଇ କହିଥିଲେ, ‘୨୦୨୨ରେ ମୋର ବାପା ଘରେ ପଡ଼ିଥିବା ଏକ ଟେବୁଲରୁ ପାଇଥିବା ଚିଠିରେ ମୋତେ ଓ ମୋ ପରିବାରକୁ ହତ୍ୟା କରିବାକୁ ଧମକ ଦିଆଯାଇଥିଲା।

ସେହିପରି ୨୦୨୩ରେ ମୋତେ ମୋର ଅଫିସିଆଲ ଇମେଲ ଆଇଡିରେ ଲରେନ୍ସ ବିଷ୍ଣୋଇ ପକ୍ଷରୁ ହତ୍ୟା ଧମକ ମିଳିଥିଲା।  ଚଳିତବର୍ଷ ଜାନୁଆରିରେ ନକଲି ନାମ ଓ ପରିଚୟ ପତ୍ର ସହିତ ମୋର ଫାର୍ମହାଉସରେ ଦୁଇଜଣ ବ୍ୟକ୍ତି ପଶି ଯାଇଥିଲେ। ପରେ ଜଣାପଡ଼ିଥିଲା ଏହି ଦୁଇ ଅଭିଯୁକ୍ତ ଲରେନ୍ସ ବିଷ୍ଣୋଇ ଗ୍ରାମର ବାସିନ୍ଦା।

୨୦୨୪ ଏପ୍ରିଲ ୧୪ରେ ଘର ଉପରକୁ ଗୁଳିମାଡ଼ ହେବା ଘଟଣାରେ ଲରେନ୍ସ ବିଷ୍ଣୋଇ ଓ ତାର ଭାଇ ଅନମୋଲ ବିଷ୍ଣୋଇର ହାତ ଥିବା ନେଇ ସୋସିଆଲ ମିଡିଆ ଜରିଆରେ ସୂଚନା ଦେଇଥିଲେ।

ଲରେନ୍ସ ବିଷ୍ଣୋଇ ଅନେକ ଦିନ ହେବ ମୋତେ ଓ ମୋ ପରିବାକୁ ହତ୍ୟା କରିବାକୁ ଯୋଜନା କରି ଆସୁଛି। କିନ୍ତୁ ପ୍ରତିଥର ତାର ‌ଯୋଜନା ପଣ୍ଡ ହୋଇଯାଉଛି। ଲରେନ୍ସର ଏଭଳି ଆକ୍ରମଣକୁ ମୁଁ ଭୟ କରେ ନାହିଁ କିନ୍ତୁ ମୋର ପରିବାର ଜୀବନ ଯେ ବିପଦରେ ଅଛି ତାହାକୁ ନେଇ ମୋତେ ଭୟ ଲାଗି ରହୁଛି।’