ବିଜେପି ପାଇଁ ଲଡୁ, ଝାଡୁ ପାଇଁ ରସଗୋଲା: କିଛି ଏଭଳି ଉପହାର ଦେଲା ଏକଜିଟ ପୋଲ
ନୂଆଦିଲ୍ଲୀ: ୫ଟି ରାଜ୍ୟ ପାଇଁ ଆଜି ବିଭିନ୍ନ ସଂସ୍ଥା ପକ୍ଷରୁ ଏକଜିଟ ପୋଲ ବା ବୁଥ ବାହୁଡା ମତ ପ୍ରକାଶ ପାଇଛି | ତେବେ ଆଜିର ଏହି ଫଳାଫଳ(ଆକଳନ ସୂତ୍ର) ଅନୁଯାୟୀ ଉତ୍ତରପ୍ରଦେଶରେ ବିଜେପି ପୁଣିଥରେ ସରକାର ଗଠନ କରିପାରେ ବୋଲି ଅଧିକାଂଶ ସଂସ୍ଥା ଆକଳନ କରିଥିବାବେଳେ ୟୁପି ପାଇଁ ଯୋଗୀ ଉପଯୋଗୀ ବୋଲି ଏକଜିଟ ପୋଲରେ ପ୍ରକାଶ ପାଇଛି | ଉତ୍ତରପ୍ରଦେଶର ସମୁଦାୟ ୪୦୩ଟି ଆସନରୁ ମ୍ୟାଜିକ ନମ୍ବର ୨୦୨ଠାରୁ ବିଜେପି ଅଧିକ ଆସନ ପାଇବ ବୋଲି ଅଧିକାଂଶ ସଂସ୍ଥା ଆକଳନ କରିଛନ୍ତି | ତେବେ ବଡ କଥା ହେଉଛି ଯେ ଏଥର ପଞ୍ଜାବରେ ଅପ୍ରତ୍ୟାଶିତ ଭାବେ ଆମ ଆଦମୀ ପାର୍ଟି ସରକାର ଗଠନ କରିପାରେ ବୋଲି ଏକଜିଟ ପୋଲରେ ଦର୍ଶାଯାଇଛି | ଦିଲ୍ଲୀ ପରେ ଆମ ଆଦମୀ ପାର୍ଟି ଦ୍ଵିତୀୟ ରାଜ୍ୟ ଭାବେ ପଞ୍ଜାବରେ ସରକାର ଗଠନ କରିବ ବୋଲି ବୁଥ ବାହୁଡା ମତରେ ଦର୍ଶାଯାଇଛି |
Sambad is now on WhatsApp
Join and get latest news updates delivered to you via WhatsApp
ପଞ୍ଜାବରେ ସମୁଦାୟ ୧୧୭ଟି ଆସନ ମଧ୍ୟରୁ ମ୍ୟାଜିକ ନମ୍ବର ଥିବା ୫୯ ଆସନରୁ ଆମ ଆଦମୀ ପାର୍ଟି ଯଥେଷ୍ଟ ଅଧିକ ଆସନ ପାଇବ ବୋଲି ଏକଜିଟ ପୋଲରେ ଆକଳନ କରାଯାଇଛି | କ୍ୟାପଟେନ ଅମରିନ୍ଦର ସିଂଙ୍କ ସହ ମିଶି ବିଜେପି ନିର୍ବାଚନ ବୈତରଣୀ ପାର ହେବାର ଯେଉଁ ସ୍ୱପ୍ନ ଦେଖିଥିଲା ତାହା ସଫଳ ହୋଇନଥିବାର ଆକଳନ କରାଯାଇଥିବା ବେଳେ ମଣିପୁର ବିଜେପି ପାଇଁ ଖୁସି ଆଣିପାରେ ବୋଲି ଏକଜିଟ ପୋଲରେ ଦର୍ଶାଯାଇଛି | ମଣିପୁରରେ ବିଜେପି କଂଗ୍ରେସ ନେତୃତ୍ୱାଧୀନ ମେଣ୍ଟ ଓ ଆଞ୍ଚଳିକ ଦଳକୁ ପରାସ୍ତ କରିପାରେ ବୋଲି ଆକଳନ କରାଯାଇଛି |
ସେହିପରି ଗୋଆରେ ବିଜେପି ଓ କଂଗ୍ରେସ ମଧ୍ୟରେ ଝୁଲା ସରକାର ହୋଇପାରେ ବୋଲି ଏକଜିଟ ପୋଲରେ ଦର୍ଶାଯାଇଛି | ଉତ୍ତରାଖଣ୍ଡରେ ପୁଣି ବିଜେପି ସରକାର ଆସିବାର କିଛି ସଂସ୍ଥା ଆକଳନ କରିଥିବାବେଳେ ଆଉ କିଛି ସଂସ୍ଥା ଝୁଲା ସରକାର ହୋଇପାରେ ବୋଲି ଆକଳନ କରିଛନ୍ତି | ତେବେ ଆଜି ପ୍ରକାଶ ପାଇଥିବା ଏକଜିଟ ପୋଲରେ ଆମ ଆଦମୀ ପାର୍ଟିକୁ ରସଗୋଲା ଭଳି ଅଧିକ ମିଠା ଓ ବିଜେପିକୁ ଲଡୁ ଭଳି କମ ମିଠା ଦେଇଛନ୍ତି ଆକଳନକାରୀ ସଂସ୍ଥା | କାରଣ ଆମ ଆଦମୀ ପାର୍ଟି ପଞ୍ଜାବ ପାଇଁ ଯେଭଳି ପରିଶ୍ରମ କରିଥିଲା ଏବଂ ବିଜେପି ଓ କଂଗ୍ରେସ ଝାଡ଼ୁକୁ ରୋକିବା ପାଇଁ ଯେଭଳି କୌଶଳ ଆପଣାଇଥିଲେ ସେଥିରେ ଫେଲ ହୋଇଥିବାର ଆକଳନ କରାଯାଇଛି | ତେବେ ହାତୀ କାହା ମୁଣ୍ଡରେ ସୁନା କଳସ ଢ଼ାଳିବ ତାହା ତ ଆସନ୍ତା ମାର୍ଚ୍ଚ ୧୦ ତାରିଖରେ ଜଣାପଡିବ |