ବାଣ କାରଖାନାରେ ବିସ୍ଫୋରଣ, ୧୮ ମୃତ

ଗା‌ନ୍ଧୀନଗର: ଗୁଜରାଟର ବନାସକାଣ୍ଠା ଜିଲ୍ଲା ଅନ୍ତର୍ଗତ ଦିଶାରେ ଥିବା ଏକ ବାଣ କାରଖାନା ଓ ଗୋଦାମରେ ବିସ୍ଫୋରଣ ଘଟି ୧୮ ଜଣ ଶ୍ରମିକଙ୍କ ମୃତ୍ୟୁ ହୋଇଛି। ଜିଲ୍ଲାପାଳ ମିହିର ପଟେଲଙ୍କ ସୂଚନା ଅନୁଯାୟୀ, ଦୀପକ ଟ୍ରେଡର୍ସରେ ବିସ୍ଫୋରଣ ପରେ ଭୟାବହ ଅଗ୍ନିକାଣ୍ଡ ଘଟିଥିଲା ଏବଂ କାରଖାନାର ସ୍ଲାବ୍ ଭୁଶୁଡ଼ି ପଡ଼ିବାରୁ ଉଦ୍ଧାର କାର୍ଯ୍ୟରେ ବାଧା ସୃଷ୍ଟି ହୋଇଥିଲା।  ଆମ୍ବୁଲାନ୍ସ ଟିମ୍ ସହ ଦିଶା ପୌରାଞ୍ଚଳ ଅଗ୍ନିଶମ କର୍ମଚାରୀ ଘଟଣାସ୍ଥଳରେ ପହଞ୍ଚିଥିଲେ ଏବଂ ୬ ଘଣ୍ଟାର ପ୍ରୟାସ ପରେ ନିଆଁକୁ ଆୟତ୍ତ କରାଯାଇଛି। ବଏଲର ବିସ୍ଫୋରଣରୁ ଏହି ଅଗ୍ନିକାଣ୍ଡ ଘଟିଥିବା ପ୍ରାଥମିକ ତଦନ୍ତରୁ ଜଣାପଡ଼ିଛି । ବିସ୍ଫୋରଣର ତୀବ୍ରତା ଓ ନିଆଁ ଏତେ ଭୟଙ୍କର ଥିଲା ଯେ ସଂପୂର୍ଣ୍ଣ କାରଖାନା ଭସ୍ମୀଭୂତ ହୋଇଯାଇଛି।

ନିଆଁକୁ ଆୟତ୍ତ କରାଯିବା ପରେ କୁଲିଂ ଅପରେସନ‌୍ ଜାରି ରହିଛି। ଏହାକୁ ସଫା କରିବା ପାଇଁ କର୍ମଚାରୀମାନେ କାମ କରୁଛନ୍ତି। ଉଦ୍ଧାର କାର୍ଯ୍ୟରେ ସହାୟତା କରିବା ପାଇଁ ରାଜ୍ୟ ବିପର୍ଯ୍ୟୟ ମୁକାବିଲା ବାହିନୀ (ଏସ୍‌ଡିଆର୍‌ଏଫ୍‌)ର ଏକ ଟିମ୍ ମଧ୍ୟ ଘଟଣାସ୍ଥଳରେ ପହଞ୍ଚିଛନ୍ତି। ଗୁଜରାଟ ମୁଖ୍ୟମନ୍ତ୍ରୀ ଭୂପେନ୍ଦ୍ର ପଟେଲ ଏହି ଘଟଣାରେ ଗଭୀର ଦୁଃଖ ପ୍ରକାଶ କରିଛନ୍ତି। ମୃତକଙ୍କ ପରିବାରକୁ ୪ ଲକ୍ଷ ଟଙ୍କା ଓ ଆହତ ଶ୍ରମିକଙ୍କୁ ୫୦ ହଜାର ଟଙ୍କା ଲେଖାଏଁ କ୍ଷତିପୂରଣ ଦେବାକୁ ମୁଖ୍ୟମନ୍ତ୍ରୀ ଘୋଷଣା କରିଛନ୍ତି।  

ଏହି ଘଟଣାକୁ ହୃଦୟ ବିଦାରକ ବୋଲି ବର୍ଣ୍ଣନା କରି ମୁଖ୍ୟମନ୍ତ୍ରୀ ମୃତକଙ୍କ ପରିବାରବର୍ଗଙ୍କୁ ସମବେଦନା ଜଣାଇବା ସହ ଆହତଙ୍କ ଆଶୁ ଆରୋଗ୍ୟ କାମନା କରିଛନ୍ତି। ଆଜି ରାତି ସୁଦ୍ଧା ୧୮ ଜଣ ଶ୍ରମିକଙ୍କ ମୃତଦେହ ଧ୍ବଂସସ୍ତୂପ ଭିତରୁ ମିଳିଥିବା ବେଳେ ଏହି ସଂଖ୍ୟା ବଢ଼ିପାରେ ବୋଲି ଆଶଙ୍କା କରାଯାଉଛି। କାରଖାନାର ମାଲିକ ଦୀପକ ସିନ୍ଧି ଫେରାର ଥିବା ଜଣାପଡ଼ିଛି। ଘଟଣାସ୍ଥଳରେ ଦିଶା ତାଲୁକା ପୁଲିସ ଓ ପ୍ରାଶାସନିକ ଅଧିକାରୀମାନେ ଉଦ୍ଧାର କାର୍ଯ୍ୟର ତଦାରଖ କରୁଛନ୍ତି। ଅଗ୍ନିକାଣ୍ଡ ଯୋଗୁଁ କାରଖାନାର ସ୍ଲାବ୍ ଭୁଶୁଡ଼ି ପଡ଼ିଥିବାରୁ ଉଦ୍ଧାର କାର୍ଯ୍ୟ କଷ୍ଟକର ହୋଇପଡ଼ିଛି। ବର୍ତ୍ତମାନ ଆବର୍ଜନା ହଟାଇବା କାମ ଜାରି ରହିଛି।