ବିସ୍ଫୋରକ ହେଉଛି ନିଟ୍ ପେପର ଲିକ୍ ବିବାଦ: ବିହାର ପରେ ମହାରାଷ୍ଟ୍ରର ସଂପୃକ୍ତି

ଦୁଇ ଶିକ୍ଷକଙ୍କୁ ଜେରା କଲା ଏଟିଏସ୍‌, ୩ ଅଭିଯୁକ୍ତଙ୍କୁ ଜେରା କଲା ସିବିଆଇ

ମୁମ୍ବାଇ: ବିହାର ଏକମାତ୍ର ରାଜ୍ୟ ନୁହେଁ ଯେଉଁଠାରେ ଡାକ୍ତରୀ ପ୍ରବେଶିକା ପରୀକ୍ଷା (ନିଟ୍) ସମୟରେ ଅନିୟମିତତା ଦେଖିବାକୁ ମିଳିଥିଲା। ମହାରାଷ୍ଟ୍ର ପୁଲିସ ପେପର ଲିକ୍ ମାମଲାରେ ଦୁଇ ଜଣ ଶିକ୍ଷକଙ୍କୁ ପଚରାଉଚରା କରିବା ପରେ ଏହି ରାଜ୍ୟର ମଧ୍ୟ ସମ୍ପୃକ୍ତି ଥିବା ଜଣାପଡ଼ିଛି। ନିଟ୍ ପେପର ଲିକ୍ ମାମଲାରେ ସମ୍ପୃକ୍ତ ଥିବା ସନ୍ଦେହରେ ନାନ୍ଦେଡ ଆଣ୍ଟି ଟେରରିଷ୍ଟ ସ୍କ୍ୱାଡ୍ (ଏଟିଏସ୍) ସଞ୍ଜୟ ତୁକାରାମ ଯାଦବ ଓ ଜଲିଲ ଉମରଖାନ ପଠାନଙ୍କୁ ଅଟକ ରଖିଥିଲା। ସେମାନେ ଜିଲ୍ଲା ପରିଷଦ ବିଦ୍ୟାଳୟରେ ଅଧ୍ୟାପନା କରୁଥିଲେ ଏବଂ ଲାଟୁରରେ ଘରୋଇ କୋଚିଂ ସେଣ୍ଟର ମଧ୍ୟ ଚଳାଉଥିଲେ। ଦୀର୍ଘ ସମୟ ଜେରା ପରେ ସେମାନଙ୍କୁ ଛାଡ଼ି ଦିଆଯାଇଛି ଏବଂ ଆବଶ୍ୟକ ପଡ଼ିଲେ ପୁଣି ଡକାଯିବ ବୋଲି ଜଣାପଡ଼ିଛି।

ନିଟ୍ ଓ ୟୁଜିସି-ନେଟ୍‌ ଭଳି ଦୁଇଟି ସାର୍ବଜନୀନ ପରୀକ୍ଷା ଭାରତୀୟ ଶୈକ୍ଷିକ ଓ ରାଜନୈତିକ ଜଗତରେ ହଇଚଇ ସୃଷ୍ଟି କରିଛି ଏବଂ ଉଭୟ କେନ୍ଦ୍ର ଓ ରାଜ୍ୟ ସ୍ତରର କର୍ତ୍ତୃପକ୍ଷ ପ୍ରଶ୍ନପତ୍ର ଲିକ୍‌ର ତଦନ୍ତ କରୁଛନ୍ତି। ଛାତ୍ରଛାତ୍ରୀଙ୍କ ସ୍ୱାର୍ଥରକ୍ଷା ପାଇଁ ସରକାର ପ୍ରତିଶ୍ରୁତି ଦେଇଥିବାରୁ ଗତ ରାତିରେ ନିଟ୍ ପେପର ଲିକ୍ ଘଟଣାର ତଦନ୍ତ ଭାର ସିବିଆଇକୁ ହସ୍ତାନ୍ତର କରାଯାଇଥିଲା। ୟୁଜିସି-ନେଟ୍ ଅନିୟମିତତାର ମଧ୍ୟ ଏହା ତଦନ୍ତ କରୁଛି, ଯେଉଁଥିରେ ଡାର୍କ ନେଟ୍‌ରେ ପ୍ରଶ୍ନପତ୍ର ଲିକ୍ ହୋଇ ବିକ୍ରି ହେଉଥିଲା। ନିଟ୍ ୟୁଜି ପରୀକ୍ଷାର ଗୋଟିଏ ରାତି ପୂର୍ବରୁ ପ୍ରଶ୍ନପତ୍ର ଲିକ୍ କରିଥିବା ୪ ଜଣଙ୍କୁ ବିହାର ପୁଲିସ ଗିରଫ କରିଛି। ଲିକ୍ ହୋଇଥିବା ପ୍ରଶ୍ନପତ୍ର ଛାତ୍ରଛାତ୍ରୀଙ୍କୁ ବିକ୍ରି କରୁଥିବା ଏବଂ ପରୀକ୍ଷାର୍ଥୀଙ୍କ ପାଇଁ ପରୀକ୍ଷା ଦେବା ଲାଗି ପ୍ରକ୍ସି ପରୀକ୍ଷାର୍ଥୀଙ୍କୁ ଯୋଗାଉଥିବା ‘ସଲ୍‌ଭର ଗ୍ୟାଙ୍ଗ୍’ର ଭୂମିକାକୁ ନେଇ ପୁଲିସ ଏବେ ତଦନ୍ତ କରୁଛି। ଅନ୍ୟପକ୍ଷରେ ନିଟ୍ ଅନିୟମିତତାର ତଦନ୍ତ ପାଇଁ ସରକାର ଗତକାଲି ପରୀକ୍ଷା ସଂସ୍ଥା ମୁଖ୍ୟଙ୍କୁ ବଦଳାଇ ଏକ ଉଚ୍ଚସ୍ତରୀୟ କମିଟି ଗଠନ କରିଛନ୍ତି। ପେପର୍ ଲିକ୍ ଓ ଅନ୍ୟାନ୍ୟ ପରୀକ୍ଷା ଦୁର୍ନୀତିକୁ ରୋକିବା ପାଇଁ ଏକ ନୂଆ ଆଇନ ଲାଗି ମଧ୍ୟ ବିଜ୍ଞପ୍ତି ପ୍ରକାଶ ପାଇଛି।

ନୂଆଦିଲ୍ଳୀ/ପାଟଣା: ବିଶ୍ବବିଦ୍ୟାଳୟ ଅନୁଦାନ ଆୟୋଗର ଜାତୀୟ ଯୋଗ୍ୟତା ପରୀକ୍ଷା (ୟୁଜିସି-ନେଟ୍‌)ର ତଦନ୍ତ ଦାୟିତ୍ବ ସିବିଆଇ ଗ୍ରହଣ କରିଛି। ଏହାପରେ ଶନିବାର ଉତ୍ତରପ୍ରଦେଶ କୁଶିନଗରର କୋଚିଂସେଣ୍ଟର ମାଲିକଙ୍କ ଦୁଇ ସହଯୋଗୀ ଓ ଜଣେ ପରୀକ୍ଷାର୍ଥୀଙ୍କୁ ସିବିଆଇ ଜେରା କରିଛି। ଆଜି ଜଣେ ବରିଷ୍ଠ ପୁଲିସ ଅଧିକାରୀ ତଦନ୍ତ ସମ୍ପର୍କରେ ସୂଚନା ଦେଇ କହିଛନ୍ତି ଯେ ଶୁକ୍ରବାର ରାତିରୁ କୁଶିନଗର ଜିଲ୍ଲାରେ ସିବିଆଇ ଟିମ୍‌ ଡେରା ପକାଇଛି। ପଡରୌନା ପୁଲିସ ଥାନାରେ ସନ୍ଦିଗ୍ଧଙ୍କୁ ଆଣି ଜେରା କରୁଛି। ସୂଚନାଯୋଗ୍ୟ, ଜୁନ୍‌ ୧୮ ତାରିଖରେ ଜାତୀୟ ପରୀକ୍ଷଣ ସଂସ୍ଥାନ (ଏନ୍‌ଟିଏ) ଦ୍ବାରା ଯୁଜିସି-ନେଟ୍‌ ୨୦୨୪ ପରୀକ୍ଷା ଆୟୋଜିତ ହୋଇଥିଲା। ପରୀକ୍ଷା ପ୍ରଶ୍ନପତ୍ର ‘ଡାର୍କୱେବ୍‌’ରେ ଲିକ୍‌ ହେବା ପରେ ଏହାକୁ ଜୁନ୍‌ ୧୯ ତାରିଖରେ ବାତିଲ କରାଯାଇଥିଲା। ବୁଧବାର, କେନ୍ଦ୍ର ସରକାର ଏହାର ତଦନ୍ତ ଦାୟିତ୍ବ ସିବିଆଇକୁ ହସ୍ତାନ୍ତର କରିଥିଲା। ଗୁରୁବାର, ସିବିଆଇ ଏନେଇ ଅଜଣାଲୋକଙ୍କ ବିରୋଧରେ ଏକ ମାମଲା ରୁଜୁ କରିଥିଲେ। ତଦନ୍ତର ପ୍ରଥମ ପର୍ଯ୍ୟାୟରେ କୋଚିଂ ସେଣ୍ଟରର ମାଲିକଙ୍କୁ ଜେରା କରିବାକୁ ଯାଇଥିଲା, କିନ୍ତୁ ତାଙ୍କୁ ପାଇପାରିନଥିଲା। ଏହାପରେ କୋଚିଂ ସେଣ୍ଟର ମାଲିକଙ୍କ ଦୁଇ ସହଯୋଗୀଙ୍କୁ ଉଠାଇ ନେଇ ପଚରାଉଚୁରା କରିଛି।

ସମ୍ବନ୍ଧିତ ଖବର