ଭୋପାଳ: ବିବାହ ହେଲା, କନ୍ୟାପକ୍ଷରୁ ସମ୍ପର୍କୀୟ ଆସିଲେ | ହାତଗଣ୍ଠି ବି ପଡିଲା କିନ୍ତୁ ସବୁ ଥିଲା ନକଲି | କଥାଟି ଶୁଣିବାକୁ ଆଶ୍ଚର୍ଯ୍ୟ ଲାଗୁଥିଲେ ବି ଏକଥା ଏକଦମ ସତ | ମଧ୍ୟପ୍ରଦେଶର ଅଗର ମାଲୱାରେ ଏଭଳି ଏକ ଘଟଣା ଘଟିଛି | ଏହି ଗ୍ରାମରେ ଜଣେ ଯୁବକଙ୍କୁ ବିବାହ ନାମରେ ୭ ଜଣ ଲୋକ ଠକିବା ଭଳି ଅପରାଧ କରିଛନ୍ତି। ଏହି ଅଭିଯୁକ୍ତମାନେ ଯୁବକଙ୍କ ନକଲି ବିବାହ କରାଇ ଏକ ଲକ୍ଷ ୮୦ ହଜାର ଟଙ୍କା ନେଇ ଫେରାର ହୋଇଯାଇଥିଲେ | ଏହାପରେ ଯୁବକ ଜଣକ ପୁଲିସ ଷ୍ଟେସନକୁ ଯାଇ ଅଭିଯୋଗ କରିଥିଲେ। ଯୁବକଙ୍କ ଅଭିଯୋଗକୁ ଭିତ୍ତି କରି ପୁଲିସ ଏକ ମାମଲା ରୁଜୁ କରି ବର୍ତ୍ତମାନ ଅଭିଯୁକ୍ତମାନଙ୍କୁ ଖୋଜୁଛି |
Sambad is now on WhatsApp
Join and get latest news updates delivered to you via WhatsApp
ପୁଲିସ ପକ୍ଷରୁ ମିଳିଥିବା ସୂଚନା ଅନୁଯାୟୀ ସିରପୋଇ ଗ୍ରାମର ବଦ୍ରିଲାଲଙ୍କ ଅଭିଯୋଗ ମୁତାବକ ତାଙ୍କ ଭାଇ ବିନୋଦଙ୍କ ବିବାହ ବେତୁଲରେ ରହୁଥିବା ଜଣେ ଯୁବତୀଙ୍କ ସହିତ ସ୍ଥିର ହୋଇଥିଲା | ତେବେ ଯୁବତୀଙ୍କ ଘର ପକ୍ଷରୁ କୁହାଯାଇଥିଲା ଯେ କିଛି ସମସ୍ୟା ଥିବାରୁ ୧ ଲକ୍ଷ ୮୦ ହଜାର ଟଙ୍କା ଦେବାକୁ ପଡିବ | ଆଉ ବିନୋଦଙ୍କ ପରିବାର ଝିଅ ଘର କଥାରେ ବିଶ୍ୱାସ କରି ୧ ଲକ୍ଷ ୮୦ ହଜାର ଟଙ୍କା ମଧ୍ୟ ଦେଇଥିଲେ | ଏହା ପରେ ବିବାହ ମଧ୍ୟ ହୋଇଥିଲା | ତେବେ ବିବାହ ପରେ କନ୍ୟା ଜଣକ ଫେରାର ହୋଇଯାଇଥିଲେ |
ଯେତେବେଳେ କନ୍ୟାଙ୍କ ବାବଦରେ ବୁଝିବା ପାଇଁ ତାଙ୍କର ସମ୍ପର୍କୀୟଙ୍କୁ ଯୋଗାଯୋଗ କରାଯାଇଥିଲା ସେମାନେ ମଧ୍ୟ ଆଉ ଫୋନ ଉଠାଇନଥିଲେ | ଏହାପରେ ବିନୋଦଙ୍କ ପରିବାର ଲୋକ ଯେତେବେଳେ କନ୍ୟା ଘରେ ପହଞ୍ଚିଥିଲେ ସେତେବେଳେ ସବୁ ସତ ସାମ୍ନାକୁ ଆସିଥିଲା | କନ୍ୟା ଘର ଓ ସମ୍ପର୍କୀୟମାନେ ସେହି ଭଡା ଘର ଛାଡ଼ିଦେଇ ଫେରାର ହୋଇଯାଇଥିଲେ | ଏହା ପରେ ଯୁବକଙ୍କ ପରିବାର ଏବେ ପୁଲିସ ଷ୍ଟେସନରେ ଏନେଇ ଅଭିଯୋଗ କରିଛନ୍ତି | ଏହି ମାମଲାରେ ପୁଲିସ କନ୍ୟା ସହ ତାଙ୍କର ୬ ଜଣ ସମ୍ପର୍କୀୟଙ୍କୁ ଖୋଜୁଛି |