ପୁଣି ତେଜିଲା କୃଷି ଆଇନ୍ ଆନ୍ଦୋଳନ: କେନ୍ଦ୍ର କୃଷିମନ୍ତ୍ରୀଙ୍କ ବୟାନ ଉପରେ ଏପରି କିଛି କହିଲେ କୃଷକ ନେତା ଟିକାୟତ
ନୂଆଦିଲ୍ଲୀ: କେନ୍ଦ୍ର ସରକାରଙ୍କ ଦ୍ୱାରା ପାରିତ ୩ ଟି କୃଷି ଆଇନ ବିରୋଧରେ ଚାଲିଥିବା ଆନ୍ଦୋଳନ ପୁଣିଥରେ ଚର୍ଚ୍ଚାକୁ ଆସିଛି । କୃଷି ଆଇନ ପ୍ରତ୍ୟାହାର ହେବ ନାହିଁ କିନ୍ତୁ କୃଷକ ସଂଗଠନମାନଙ୍କ ସହ ଆଲୋଚନା କରିବାକୁ ସରକାର ପ୍ରସ୍ତୁତ । କେନ୍ଦ୍ର କୃଷିମନ୍ତ୍ରୀଙ୍କ ଏଭଳି ବୟାନ ପରେ ଏହାର ଜବାବ୍ ରଖିଛନ୍ତି କୃଷକ ନେତା ରାକେଶ ଟିକାୟତ । ସେ କହିଛନ୍ତି କି ସରକାର ଆନ୍ଦୋଳନକାରୀ କୃଷକମାନଙ୍କୁ ବାଡି ଠେଙ୍ଗାରେ ପିଟନ୍ତୁ ହେଲେ ବିନା ସର୍ତ୍ତରେ ଆଲୋଚନା କରିବାକୁ ପ୍ରସ୍ତୁତ ରୁହନ୍ତୁ ।
Sambad is now on WhatsApp
Join and get latest news updates delivered to you via WhatsApp
କୃଷକ ନେତା ରାକେଶ ଟିକାୟତ କହିଛନ୍ତି କି ସରକାର ଏବେ ଏବେ ଯେଉଁ ଆଲୋଚନା କରିବାକୁ ପ୍ରସ୍ତାବ ଦେଇଛନ୍ତି ତାହା ସର୍ତ୍ତମୂଳକ । ସରକାର ଆଲୋଚନା କରିବାକୁ ରାଜି ଅଛନ୍ତି କିନ୍ତୁ ଆଇନ ପ୍ରତ୍ୟାହାର ପ୍ରସ୍ତାବ ବ୍ୟତୀତ ଆଲୋଚନା ସମ୍ଭବ ନୁହେଁ ବୋଲି ଟିକାୟତ କହିଛନ୍ତି । କୃଷକ ସଂଗଠନ ପକ୍ଷରୁ କୌଣସି ସର୍ତ୍ତ ନାହିଁ, କିନ୍ତୁ ଯଦି ସରକାର ଆଇନ ପ୍ରତ୍ୟାହାର ନେଇ ଚର୍ଚ୍ଚା କରିବାକୁ ଚାହାନ୍ତି ତେବେ କୃଷକ ସଂଗଠନମାନେ ଆଲୋଚନା କରିବାକୁ ପ୍ରସ୍ତୁତ ଅଛନ୍ତି ବୋଲି ଟିକାୟତ କହିଛନ୍ତି ।
ଏହାସହ କେନ୍ଦ୍ର ସରକାରଙ୍କୁ ଆକ୍ଷେପ କରି ଟିକାୟତ କହିଛନ୍ତି କି ଏହି ସରକାର ଯଦି କୌଣସି ରାଜନୈତିକ ଦଳର ହୋଇଥାନ୍ତା ତେବେ ନିଶ୍ଚିତ ୮ ମାସ ଧରି ଆନ୍ଦୋଳନରେ ବସିଥିବା କୃଷକମାନଙ୍କ ସହ ଆଲୋଚନା କରିଥାନ୍ତା । କିନ୍ତୁ ବିଡମ୍ବନାର ବିଷୟ ଏହି ସରକାର କୌଣସି ରାଜନୈତିକ ଦଳର ନୁହେଁ ବରଂ କମ୍ପାନିମାନଙ୍କ ଇଙ୍ଗିତରେ ଚାଲୁଛି । ତେଣୁ କମ୍ପାନି ପ୍ରାୟୋଜିତ ସରକାର ବିରୋଧରେ ଲୋକମାନଙ୍କୁ ରାଜରାସ୍ତାକୁ ଉହ୍ଲାଇବାକୁ ପଡିବ ।
ଗତକାଲି ମଣ୍ଡି ମାଧ୍ୟମରେ କୃଷକଙ୍କ ନିକଟରେ ୧ ଲକ୍ଷ କୋଟି ପହଂଚାଇବାକୁ ସରକାର ଘୋଷଣା କରିବା ପରେ ଏହାକୁ ନେଇ ଟିକାୟତ କହିଛନ୍ତି କି ଆମେ ଦାବି କରୁଛୁ କି ସରକାର କୃଷକ ମାନଙ୍କ ଦ୍ୱାରା ଉତ୍ପାଦିତ ସାମଗ୍ରୀର ଉଚିତ୍ ମୂଲ୍ୟ ଦିଅନ୍ତୁ ଓ ୧ ଲକ୍ଷ କୋଟି ଯେଉଁଠି ଖର୍ଚ୍ଚ କରିବା କଥା କରନ୍ତୁ ।