ଦିଲ୍ଲୀରେ ଚାଷୀଙ୍କ ତୁମୁଳ କାଣ୍ଡ: ଲାଲକିଲ୍ଲାକୁ ଧସେଇ ପଶିଲେ, ପୁଲିସ ସହ ମୁହାଁମୁହିଁ, ଲାଠିଚାଳନା

ନୂଆଦିଲ୍ଲୀ: କୃଷି ଆଇନ୍‌ ପ୍ରତ୍ୟାହାର ଦାବିରେ ଆନ୍ଦୋଳନରତ କୃଷକମାନଙ୍କର ଟ୍ରାକ୍ଟର ରାଲିକୁ କେନ୍ଦ୍ରକରି ଆଜି ରାଜଧାନୀ ଦିଲ୍ଲୀରେ ଉତ୍ତେଜନାମୂଳକ ପରିସ୍ଥିତି ସୃଷ୍ଟି ହୋଇଛି। ବିଭିନ୍ନ ସ୍ଥାନରେ ଆନ୍ଦୋଳନରତ ଚାଷୀ ଓ ପୁଲିସ୍ ମୁହାଁମୁହିଁ ହୋଇଛନ୍ତି। ଆନ୍ଦୋଳନକାରୀ ସେମାନଙ୍କ ପ୍ରଦର୍ଶନ ଲାଗି ପୁଲିସ ପ୍ରଶାସନ ପକ୍ଷରୁ ନିର୍ଦ୍ଦିଷ୍ଟ କରାଯାଇଥିବା ଅଞ୍ଚଳ ଅତିକ୍ରମ କରି ଦିଲ୍ଲୀ ଭିତରକୁ ପଶି ଆସିଥିଲେ। ଏହାପରେ ସେମାନଙ୍କୁ ନିୟନ୍ତ୍ରଣ କରିବା ପାଇଁ ପୁଲିସ୍‌କୁ ମୃଦୁଲାଠିଚାଳନା ସହ ଲୁହବୁହା ଗ୍ୟାସ ପ୍ରୟୋଗ କରିବାକୁ ପଡ଼ିଛି।

ହଜାର ହଜାର ସଂଖ୍ୟାରେ ଆନ୍ଦୋଳନରତ କୃଷକ ଆଜି ଅପରାହ୍ନରେ ରାଜଧାନୀ ଦିଲ୍ଲୀର ଲାଲକିଲ୍ଲା (ରେଡ ଫୋର୍ଟ) କମ୍ପ୍ଲେକ୍ସରେ ପ୍ରବେଶ କରିବାକୁ ଉଦ୍ୟମ କରୁଥିବା ବେଳେ ପୁଲିସ୍‌ ସେମାନଙ୍କୁ ଅଟକାଇବା ପାଇଁ ଯିବାରୁ ଗଣ୍ଡଗୋଳିଆ ପରିସ୍ଥିତି ସୃଷ୍ଟି ହୋଇଥିଲା। ଲାଲକିଲ୍ଲାର ଏକ ଫ୍ଲାଗପୋଲ ଉପରକୁ ଆନ୍ଦୋଳନକାରୀ କୃଷକମାନେ ଚଢ଼ି ଯାଇଥିବା ମଧ୍ୟ ଦେଖିବା ପାଇଁ ମିଳିଥିଲା। ଯେଉଁଠାରୁ ସ୍ୱାଧୀନତା ଦିବସରେ ପ୍ରଧାନମନ୍ତ୍ରୀ ଦେଶକୁ ସମ୍ବୋଧିତ କରିଥାଆନ୍ତି ସେଇ ସ୍ଥାନକୁ ଚଢ଼ି ଯାଇ ଚାଷୀମାନେ ପତାକା ଉଡାଇଥିଲେ । ଏହି ଘଟଣାରେ ପୁଲିସ୍‌ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରି ସେମାନଙ୍କୁ ସେଠାରୁ ହଟାଇଥିଲା।

ଏହା ପୂର୍ବରୁ, ଆଜି ସକାଳେ କୃଷକମାନେ ବ୍ୟାରିକେଡ୍‌ ଭାଙ୍ଗି ଦିଲ୍ଲୀରେ ପ୍ରବେଶ କରିଥିଲେ। ଆନ୍ଦୋଳନକାରୀ ସେମାନଙ୍କ ଲାଗି ଉଦ୍ଦିଷ୍ଟ ମାର୍ଗରେ ଟ୍ରାକ୍ଟର ରାଲିରେ ଆସି ବ୍ୟାରିକେଡ୍‌ ଭାଙ୍ଗି ଦିଲ୍ଲୀ ସହର ମଧ୍ୟକୁ ପ୍ରବେଶ କରିବାକୁ ଚେଷ୍ଟା କରିଥିଲେ। ପୁଲିସ୍‌ ସେମାନଙ୍କୁ ଅଟକାଇବାକୁ ଗଲାବେଳେ ଏଇଠାରୁ ହିଁ ପୁଲିସ୍‌ ସହ ସେମାନଙ୍କର ସଂଘର୍ଷ ଆରମ୍ଭ ହୋଇଥିଲା। ବିଭିନ୍ନ ଦିଗରୁ ଆସି ସେମାନେ ପୁଲିସ ସହିତ ସଂଘର୍ଷ ଆରମ୍ଭ କରିବା ସହ ପୁଲିସ୍‌ ଉପରକୁ ପଥର ଫିଙ୍ଗିଥିବା ପ୍ରତ୍ୟକ୍ଷଦର୍ଶୀଙ୍କ ଠାରୁ ପ୍ରକାଶ। ପ୍ରସଙ୍ଗକ୍ରମେ ଉଲ୍ଲେଖଯୋଗ୍ୟ, ଆଜି ଦେଶର ୭୨ତମ ଗଣତନ୍ତ୍ର ଦିବସ ପାଳନ କରାଯାଉଥିବାରୁ ଦିଲ୍ଲୀ ରାଜପଥରେ ଅନୁଷ୍ଠିତ ବାର୍ଷିକ ପରେଡ ପରେ କୃଷକମାନଙ୍କୁ ନିର୍ଦ୍ଦିଷ୍ଟ ମାର୍ଗରେ ଟ୍ରାକ୍ଟର ରାଲି କରିବାକୁ ଅନୁମତି ଦିଆଯାଇଥିଲା। ହେଲେ ପରେଡ ଆରମ୍ଭ ହେବା ପୂର୍ବରୁ ହଜାର ହଜାର ସଂଖ୍ୟାରେ କୃଷକ ପାଦରେ ଚାଲି ଚାଲି ଆସି ଜାତୀୟ ରାଜଧାନୀ ମଧ୍ୟକୁ ପ୍ରବେଶ କରି ଯାଇଥିଲେ। ସକାଳ ୮ଟା ପୂର୍ବରୁ ଦିଲ୍ଲୀ ସୀମାନ୍ତରେ ପ୍ରବଳ ଜନସମାଗମ ହୋଇଯାଇଥିଲା। ଏପରିକି କେନ୍ଦ୍ରୀୟ ଦିଲ୍ଲୀର ଆଇଟିଓରେ ଏକ ପୁଲିସ ବସ୍‌କୁ ମଧ୍ୟ ଆନ୍ଦୋଳନକାରୀ ଅପହରଣ କରିନେଇଥିବା ଅଭିଯୋଗ ହୋଇଛି। କୃଷକମାନେ ପରେଡ ଆରମ୍ଭ ହେବାର କିଛି ଘଣ୍ଟା ପରେ ଆଜି ଅପରାହ୍ନରେ ୨୦ରୁ ଅଧିକ ଟ୍ରାକ୍ଟର ସହ ଐତିହାସିକ ଲାଲକିଲ୍ଲା ଦୁର୍ଗ ମଧ୍ୟକୁ ପ୍ରବେଶ କରିଥିଲେ। ସେମାନେ ଜାତୀୟ ପତାକା ଦେଖାଇ ଟ୍ରାକ୍ଟର ଚଳାଉଥିବା ବେଳେ କେତେଜଣ ବିକ୍ଷୋଭକାରୀ ଲାଲକିଲ୍ଲାରେ ଚଢ଼ି ବିଭିନ୍ନ ସ୍ଲୋଗାନ ଦେଉଥିବାର ଦେଖାଯାଇଥିଲା।

ଅନ୍ୟପକ୍ଷରେ ଆନ୍ଦୋଳନର କେନ୍ଦ୍ରସ୍ଥଳ ହରିୟାଣା ନିକଟ ସିଙ୍ଗୁ ସୀମାରେ କୃଷକମାନେ ବାରିକେଡ୍‌ ଭାଙ୍ଗି ଦିଲ୍ଲୀ ସୀମା ଭିତରେ ପ୍ରବେଶ କରି ବିଭିନ୍ନ ସ୍ଥାନରେ ଏକାଠି ହୋଇଥିଲେ। ବିକ୍ଷୋଭକାରୀମାନେ ଆନ୍ଦୋଳନ ଶାନ୍ତିପୂର୍ଣ୍ଣ ହେବ ବୋଲି ପ୍ରତିଶ୍ରୁତି ଦେଇଥିଲେ ମଧ୍ୟ ବାଟରେ ଏକ ବସ୍‌କୁ ଭଙ୍ଗାରୁଜା କରିଥିବା ସୂଚନା ରହିଛି। ଟ୍ରାକ୍ଟର ରାଲି ଆୟୋଜନ କରିବା ପାଇଁ କୃଷକମାନଙ୍କ ପାଇଁ ତିନିଟି ମାର୍ଗକୁ ଦିଲ୍ଲୀ ପୁଲିସ ପକ୍ଷରୁ ଚିହ୍ନଟ କରାଯାଇଥିଲା। ସିଙ୍ଗୁ ସୀମାରୁ ୬୩ କିଲୋମିଟର, ଟିକ୍ରି ସୀମାଠାରୁ ୬୨.୫ କିଲୋମିଟର ଏବଂ ଉତ୍ତରପ୍ରଦେଶ ଓ ଦିଲ୍ଲୀକୁ ବିଭକ୍ତ କରୁଥିବା ଗାଜିପୁର ସୀମାଠାରୁ ୬୮ କିଲୋମିଟର ଦୂର ପର୍ଯ୍ୟନ୍ତ ରାସ୍ତାକୁ ଟ୍ରାକ୍ଟର ରାଲି ଲାଗି ଚିହ୍ନିତ ହୋଇଥିଲା । ହେଲେ, ଆନ୍ଦୋଳନକାରୀ କୃଷକ ଯୋଜନାବଦ୍ଧ ମାର୍ଗଠାରୁ ୨୦ କିଲୋମିଟର ଦୂରରେ ଥିବା ଦିଲ୍ଲୀର ଲାଲକିଲ୍ଲାରେ ପହଞ୍ଚି ବିରୋଧ ପ୍ରଦର୍ଶନ କରିଥିଲେ।

ରାଲି ବେଳେ ଓଲଟିଲା ଟ୍ରାକ୍ଟର, ଜଣେ କୃଷକ ମୃତ
ନୂଆଦିଲ୍ଲୀ: ଦିଲ୍ଲୀର ସୀମାନ୍ତରେ ହଜାର ହଜାର କୃଷକ ବ୍ୟାରିକେଡ୍‌ ଭାଙ୍ଗି ପୁଲିସ ସହ ସଂଘର୍ଷ କରି ଜାତୀୟ ରାଜଧାନୀ ମଧ୍ୟକୁ ପ୍ରବେଶ ପାଇଁ ଉଦ୍ୟମ କଲାବେଳେ ହିଂସା ସୃଷ୍ଟି ହେବା ସହ ପରିସ୍ଥିତି ଉତ୍ତେଜନାମୂଳକ ହୋଇପଡ଼ିଛି। ଆଜି ଆନ୍ଦୋଳନରତ କୃଷକମାନେ ସରକାରଙ୍କର ନୂତନ କୃଷି ନିୟମ ବିରୋଧରେ ଟ୍ରାକ୍ଟର ରାଲି ବାହାର କରିଥିଲେ। ତେବେ, ନିର୍ଦ୍ଧାରିତ ମାର୍ଗ ଛାଡ଼ି ବ୍ୟାରିକେଡ୍‌ ଭାଙ୍ଗି କୃଷକମାନେ ଦିଲ୍ଲୀ ସହର ମଧ୍ୟକୁ ପ୍ରବେଶ କରିବା ପାଇଁ ଉଦ୍ୟମ କରୁଥିବା ବେଳେ ପୁଲିସ୍‌ ସେମାନଙ୍କୁ ବାଧା ଦେଇଥିଲା। ଏଇଠୁ ଆରମ୍ଭ ହୋଇଥିଲା ହିଂସା ଓ ବିଶୃଙ୍ଖଳା। ଆନ୍ଦୋଳନକାରୀ କୃଷକମାନେ ପୁଲିସ୍‌ ଉପରକୁ ଟେକା ପଥର ଫିଙ୍ଗିଥିଲେ। ପରେ ପୁଲିସ୍‌ ପରିସ୍ଥିତିକୁ ନିୟନ୍ତ୍ରଣକୁ ଆଣିବା ପାଇଁ ସେମାନଙ୍କ ଉପରେ ଲୁହବୁହା ଗ୍ୟାସ୍‌ ପ୍ରୟୋଗ କରିଥିଲା। ନାଙ୍ଗଲୋଇରେ ବ୍ୟାରିକେଡ୍‌ ଭାଙ୍ଗି କେନ୍ଦ୍ରୀୟ ଦିଲ୍ଲୀ ଅଭିମୁଖେ ଯାତ୍ରା କରିବାକୁ ଗୋଟିଏ ଟ୍ରାକ୍ଟରରେ କିଛି ଚାଷୀ ଉଦ୍ୟମ କରୁଥିବା ବେଳେ ଭାରସାମ୍ୟ ହରାଇ ଟ୍ରାକ୍ଟରଟି ଓଲଟି ପଡ଼ିଥିଲା। ଏହି ଘଟଣାରେ ଜଣେ ଆନ୍ଦୋଳନକାରୀ ଚାଷୀଙ୍କ ମୃତ୍ୟୁ ଘଟିଥିଲା ଓ ଅନ୍ୟ କେତେ ଜଣ ଆହତ ହୋଇଥିଲେ।