ସ୍କୁଲରୁ ମିଳିଥିବା ସାଇକେଲକୁ କରିଦେଲେ ଇଲେକ୍ଟ୍ରିକ ସ୍କୁଟର, ବିଏମଡ଼ବ୍ଲ୍ୟୁ କାରରେ ବୁଲୁଛନ୍ତି ଏହି କୃଷକଙ୍କ ପୁଅ

ରାଞ୍ଚି: ସ୍କୁଲରୁ ମିଳିଥିବା ସାଇକେଲକୁ ଇଲେକ୍ଟ୍ରିକ ସ୍କୁଟରରେ ବଦଳାଇଦେଲେ ଜଣେ ଯୁବକ | ଆଉ ଏହି ପରିବର୍ତ୍ତନ ପରେ ଏବେ ତାଙ୍କ ପାଖକୁ ଅର୍ଡର ପରେ ଅର୍ଡର ଆସିବାରେ ଲାଗିଛି | ଝାଡ଼ଖଣ୍ଡର ସରାଇକେଲା ଥାନା ଅନ୍ତର୍ଗତ ବାସୁରଡା ଗାଁର ବାସିନ୍ଦା କାମଦେବ ପାନ୍ ଜଣେ କୃଷକଙ୍କ ପୁଅ ହୋଇଥିବା ବେଳେ ପାଞ୍ଚ ଭାଇଭଉଣୀଙ୍କ ମଧ୍ୟରୁ ସେ ସବୁଠାରୁ ସାନ। ଗାଁର ଏକ ସରକାରୀ ବିଦ୍ୟାଳୟରେ ଅଧ୍ୟୟନ କରୁଥିବା କାମଦେବଙ୍କ ପାଖରେ ଯଦିଓ କୌଣସି ପ୍ରମୁଖ ଇଞ୍ଜିନିୟରିଂ କଲେଜରେ ଡିଗ୍ରୀ ନାହିଁ, ତଥାପି ସେ ମୁମ୍ବାଇର ଏକ ପ୍ରତିଷ୍ଠିତ ମୋଟର କମ୍ପାନିରେ କାର୍ଯ୍ୟ କରନ୍ତି ଏବଂ ଏଠାରେ ଇଞ୍ଜିନିୟରମାନଙ୍କ ସହିତ ଇ-ବାଇକ୍ ଡିଜାଇନ୍ କରନ୍ତି |

କାମଦେବ କହିଛନ୍ତି, “ଆଜି ଦାମୀ ବିଏମଡବ୍ଲୁ କାରରେ ଯାତ୍ରା କରୁଛି ଏବଂ ତାଜ ପରି ଏକ ବଡ ହୋଟେଲରେ ରହିପାରିବି । ଏହିପରି ଜୀବନ ମୋ ପାଇଁ ଏକ ସ୍ୱପ୍ନ ପରି ଥିଲା |ଯଦିଓ ମୁଁ ଘରେ ରହେ ନାହିଁ, ଅନେକ ଗଣମାଧ୍ୟମ ବ୍ୟକ୍ତି ମୋ ଗାଁକୁ ମୋ ପିତାମାତାଙ୍କ ସାକ୍ଷାତକାର ନେବାକୁ ଆସନ୍ତି’ | ତେବେ ଆପଣ ଭାବୁଥିବେ ଏହା କିପରି ସମ୍ଭବ ହେଲା? ବାସ୍ତବରେ କାମଦେବଙ୍କ କଠିନ ପରିଶ୍ରମ ଏବଂ ଦୃଢ ଇଚ୍ଛା ଶକ୍ତି ଯୋଗୁଁ ଏସବୁ ସମ୍ଭବ ହେଲା | ବାସ୍ତବରେ, ପିଲାଦିନରୁ ତାଙ୍କର ମେସିନ୍ ପ୍ରତି ଏକ ଆକର୍ଷଣ ରହିଆସିଥିଲା | ସେ ଚାଷ ହେଉ କିମ୍ବା ଦୈନନ୍ଦିନ ଜୀବନରେ ନୂଆ ନୂଆ ସାମଗ୍ରୀ ନିର୍ମାଣ କରିବାରେ ରୁଚି ରଖୁଥିଲେ | ଆଉ ତାଙ୍କର ସବୁଠାରୁ ସଫଳ ଉଦ୍ଭାବନ ହେଉଛି ତାଙ୍କ ଦ୍ୱାରା ନିର୍ମିତ ଗୋ ଗୋ ବାଇକ( GO-GO BIKE )| ଏହା ଏକ ଇଲେକ୍ଟ୍ରିକ୍-ସାଇକେଲ୍, ଯାହାର ଏକ ମୋଟର ଅଛି ଏବଂ ପେଡାଲ୍ ମାଧ୍ୟମରେ ମଧ୍ୟ ଚାର୍ଜ କରାଯାଇପାରିବ | ଥରେ ଚାର୍ଜ ହୋଇଗଲେ, ଏହା ଏକ ସାଧାରଣ ସାଇକେଲରୁ ଏକ ଇ-ସାଇକେଲରେ ପରିଣତ ହୁଏ | ୨୦୦୯ରେ ଜାପାନର ୟୋ-ୟୋ ବାଇକ୍ ଠାରୁ ପ୍ରେରଣା ନେଇ ସେ ନିଜ ସ୍କୁଲରୁ ପାଇଥିବା ସାଇକେଲରେ ଏକ ମୋଟର ଲଗାଇ ଏକ ଇ-ବାଇକ୍ ତିଆରି କରିବାକୁ ନିଷ୍ପତ୍ତି ନେଇଥିଲେ | ତେବେ ତାଙ୍କ ପାଖରେ ଇଣ୍ଟରନେଟ୍ ସୁବିଧା କିମ୍ବା ଅନ୍ୟ କୌଣସି ସାଧନ ନଥିଲା | ଏହା ସତ୍ତ୍ୱେ ସେ ୨୦୧୨ରେ ସେ ଏକ ଇ-ସାଇକେଲର ମଡେଲ ନିର୍ମାଣ କରିଥିଲେ |

କାମଦେବ କହନ୍ତି, ଇ-ସାଇକେଲ ନିର୍ମାଣ ପାଇଁ ଗାଁରେ ଅଧିକ ସାମଗ୍ରୀ ଉପଲବ୍ଧ ନଥିଲା। ମୁଁ ମୋ ବାପାଙ୍କ ସହ ଗାଁରୁ ସହରକୁ ପନିପରିବା ବିକ୍ରି କରିବା ପାଇଁ ଆସୁଥିଲି | ଆଉ ନିଜ ସଂଚିତ ଟଙ୍କାରୁ କିଛି କିଛି ସାମଗ୍ରୀ ସହରରୁ କିଣୁଥିଲି | ଏହା ପରେ ସେ ଇ-ସାଇକେଲ ନିର୍ମାଣ କରିଥିଲେ | ଯଦିଓ କାମଦେବ ଗାଁରେ ଏହାକୁ ବ୍ୟବହାର କରୁଥିଲେ, କିନ୍ତୁ ଗ୍ରାମବାସୀ ଏଥିପ୍ରତି ଧ୍ୟାନ ଦେଇ ନଥିଲେ। କିନ୍ତୁ ୨୦୧୭ ମସିହାରେ ଗାଁରୁ ସ୍ନାତକ ହାସଲ କରିବା ପରେ ଯେତେବେଳେ ସେ ଜାମସେଦପୁରରେ ଏକ ସରକାରୀ କାର୍ଯ୍ୟାଳୟରେ ଡାଟା ଏଣ୍ଟ୍ରି କାମ କରୁଥିଲେ ସେତେବେଳେ ହିଁ ତାଙ୍କ ଇ-ସାଇକେଲ ଲୋକପ୍ରିୟ ହୋଇଥିଲା । କାମଦେବ କହନ୍ତି ଯେ ଥରେ, କୌଣସି କାମ ପାଇଁ ସେ ତାଙ୍କ ଦ୍ୱାରା ନିର୍ମିତ ବାଇକ୍ ନେଇ ସହରର ଡେପୁଟି କମିଶନରଙ୍କ କାର୍ଯ୍ୟାଳୟକୁ ଯାଇଥିଲେ | ତା’ପରେ ସେଠାରେ ଥିବା ଅଧିକାରୀମାନେ ମୋ ବାଇକ୍ ବିଷୟରେ ପଚାରିଥିଲେ। ଯେତେବେଳେ ସେମାନେ ଜାଣିବାକୁ ପାଇଲେ ଯେ ମୁଁ ଏହାକୁ ନିଜେ କରିଛି, ସମସ୍ତେ ଆଶ୍ଚର୍ଯ୍ୟ ହୋଇଗଲେ | ଏହା ପରେ, ରାଜ୍ୟର ମୁଖ୍ୟମନ୍ତ୍ରୀ ମଧ୍ୟ ତାଙ୍କ ବାଇକକୁ ପ୍ରଶଂସା କରିଥିଲେ। ଏହା ପରେ ଲୋକମାନେ ଏହି ଇ-ବାଇକ ପାଇଁ ତାଙ୍କୁ ଅର୍ଡର ଦେଇଥିଲେ | ଏପର୍ଯ୍ୟନ୍ତ ସେ ୫୦ରୁ ଅଧିକ ଗୋ-ବାଇକ୍ ତିଆରି କରି ବିକ୍ରି କରିଛନ୍ତି | ଏହାର ମୂଲ୍ୟ ପ୍ରାୟ ୩୦ ହଜାର ଟଙ୍କାରୁ ଆରମ୍ଭ ହୋଇ ବିଭିନ୍ନ ମଡେଲ ଅନୁଯାୟୀ ବିଭିନ୍ନ ମୂଲ୍ୟରେ ବିକ୍ରି ହୁଏ |

କାମଦେବ ଇଣ୍ଟରନେଟର ଶକ୍ତିକୁ ଆଜି ସବୁଠାରୁ ବଡ ଶକ୍ତି ଭାବରେ ବିବେଚନା କରୁଛନ୍ତି, କାରଣ ସୋସିଆଲ ମିଡିଆରେ ତାଙ୍କ ଇ-ବାଇକର ଭିଡିଓ ଦେଖିବା ପରେ ତାଙ୍କୁ ମୁମ୍ବାଇର ଏକ ବଡ ଅଟୋ କମ୍ପାନି ଦ୍ୱାରା ସାକ୍ଷାତକାର ପାଇଁ ଡକାଯାଇଥିଲା। କାମଦେବ କହନ୍ତି, “ଏହି କମ୍ପାନି ସାଧାରଣ ଯାନ ସହିତ ଇ-ଯାନ ତିଆରି କରିବାକୁ ଚାହୁଁଥିଲା, ଯେଉଁଥିପାଇଁ ସେମାନେ ବିଭିନ୍ନ ଲୋକଙ୍କ ଆବଶ୍ୟକ କରୁଥିଲେ ତେଣୁ ମୁଁ ଅନେକ ବଡ ଇଞ୍ଜିନିୟର ଏବଂ ଡିଜାଇନର୍ଙ୍କ ସହ କାମ କରିବାର ସୁଯୋଗ ପାଇଲି। ଆଉ ଏବେ ଉଚ୍ଚ ଦରମା ପାଇ ଚାକିରି କରୁଛି |