ଏଫଏଟିଏଫ ବୈଠକ ଶେଷ ହୋଇଯାଇଥିବାରୁ ପାକିସ୍ତାନ ପଟୁ ଆତଙ୍କବାଦୀ କାର୍ଯ୍ୟକଳାପ ବଢିବ : ସେନା
ନୂଆଦିଲ୍ଲୀ : ଫାଇନାନ୍ସିଆଲ ଆକ୍ସନ ଟାକ୍ସଫୋର୍ସ (ଏଫଏଟିଏଫ)ର ବୈଠକ ଶେଷ ହେବାପରେ ପାକିସ୍ତାନ ଏବେ ଭାରତ ବିରୁଦ୍ଧରେ ନିଜର ଆତଙ୍କବାଦୀ କାର୍ଯ୍ୟକଳାପକୁ ଆହୁରି ତୀବ୍ର କରିବା ଆଶଙ୍କା କରାଯାଉଛି । ଗତ ଅଗଷ୍ଟ ୫ରେ ଭାରତ ସରକାର ଜମ୍ମୁ ଓ କଶ୍ମୀରରୁ ଧାରା ୩୭୦ ପ୍ରତ୍ୟାହାର କରିବା ପରେ ପାକିସ୍ତାନ ନିଜର ଜନତାଙ୍କଠାରୁ ପ୍ରବଳ ଚାପରେ ରହିଛି । ତେବେ ଏଫଏଟିଏଫ ବୈଠକ ଓ ବିଶ୍ୱଜନମତ ଯୋଗୁଁ ପାକିସ୍ତାନ ଚାହିଁକରି ମଧ୍ୟ କୌଣସି ଆତଙ୍କବାଦୀ କାଣ୍ଡ କରିପାରୁନଥିଲା । ଏବେ ଏଫଏଟିଏଫ ବୈଠକ ଶେଷ ହୋଇଥିବାରୁ ପାକିସ୍ତାନ ଉପରୁ ଚାପ ଶେଷ ହୋଇଯାଇଛି । ଏଣୁ ଆଗକୁ ଆତଙ୍କବାଦୀ କାର୍ଯ୍ୟକଳାପ ଓ ଅସ୍ତ୍ରବିରତି ଉଲ୍ଲଙ୍ଘନ ବଢିପାରେ ବୋଲି ଭାରତୀୟ ସେନା ଆଶଙ୍କା କରୁଛି ।
ଅଗଷ୍ଟ ୫ପରଠାରୁ ଏପର୍ଯ୍ୟନ୍ତ ପାକିସ୍ତାନ ମୋଟ ୮୨୩ ଥର ଅସ୍ତ୍ରବିରତି ଉଲ୍ଲଙ୍ଘନ କରି ଗୁଳିଗୋଳା ବର୍ଷଣ କରିଛି ବୋଲି ସେନା କହିଛି । ଅର୍ଥାତ ଦିନକୁ ହାରାହାରି ୧୦ରୁ ଅଧିକ ଥର ଗୁଳିବର୍ଷଣ ହେଉଛି ।
Sambad is now on WhatsApp
Join and get latest news updates delivered to you via WhatsApp
ସୂଚନାଯୋଗ୍ୟ ଯେ ପ୍ରତିଶ୍ରୁତି ମୁତାବକ ଆତଙ୍କବାଦୀଙ୍କୁ ପାଣ୍ଠିଯୋଗାଣ ବନ୍ଦ କରିବା ଦିଗରେ କୌଣସି ଆଖିଦୃଶିଆ ପଦକ୍ଷେପ ନେଉନଥିବାରୁ ପାକିସ୍ତାନ ଫଏଟିଏଫ ଗତ ବର୍ଷଠାରୁ ଗ୍ରେ (ଧୂଷର) ତାଲିକାରେ ରଖିଛି । ଚଳିତ ମାସରେ ହୋଇଥିବା ଏଫଏଟିଏଫ ପ୍ଲାନେରୀ ବୈଠକରେ ମଧ୍ୟ ଏହି ଗ୍ରେ ମାନ୍ୟତାକୁ ବଜାୟ ରଖାଯାଇଛି ଓ ପାକିସ୍ତାନକୁ ଆତଙ୍କବାଦୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ଫେବ୍ରୁଆରୀ ପର୍ଯ୍ୟନ୍ତ ସମୟ ଦିଆଯାଇଛି ।
ଗତ ଜୁନରେ ହୋଇଥିବା ଆମେରିକାର ଓରଲାଣ୍ଡୋଠାରେ ଅନୁଷ୍ଠିତ ଏଫଏଟିଏଫ ବୈଠକରେ ପାକିସ୍ତାନକୁ ୨୭ ସୁତ୍ରୀ କାର୍ଯ୍ୟାନୁଷ୍ଠାନ ପାଇଁ ସେପ୍ଟେମ୍ବର ସୁଦ୍ଧା ସମୟ ଦିଆଯାଇଥିଲା । କିନ୍ତୁ ଏହିୁ ୨୭ ସୁତ୍ରୀ କାର୍ଯ୍ୟ କରିବାରେ ପାକିସ୍ତାନ ବିଫଳ ହୋଇଥିଲା । ଫଳରେ ପାକିସ୍ତାନକୁ ଚେତାବନୀ ଦିଆଯାଇ ଫେବ୍ରୁଆରୀ ପର୍ଯ୍ୟନ୍ତ ସମୟ ଦିଆଯାଇଛି ।