ଅଜାଣତରେ ଝିଅ ଉପରେ ଗାଡି ଚଢ଼ାଇଦେଲା ବାପା, ଚାଲିଗଲା ଜୀବନ

ବେଙ୍ଗାଲୁରୁ: ଅଜାଣତରେ ଝିଅ ଉପରେ ଗାଡି ଚଢ଼ାଇଦେଲା ବାପା | ଚିକିତ୍ସା ପାଇଁ ପରିବାର ଡାକ୍ତରଖାନା ନେଇଥିଲେ ବି ଚାଲିଗଲା ଜୀବନ | ସୋମବାର ରାତି ୧୧.୩୦ରେ ଏହି ହୃଦୟ ବିଦାରକ ଘଟଣା ଘଟିଥିବା ଜଣାପଡିଛି | ଏହି ଛାତି ଥରା ଘଟଣାଟି ସିସିଟିଭିରେ କଏଦ ହୋଇଥିବା ବେଳେ ଏବେ ତାହା ଭାଇରାଲ ହେବାରେ ଲାଗିଛି | ମୃତକଙ୍କ ନାମ ଶାଜିଆ ଜନତ ବୋଲି ଜଣାପଡିଛି |

ମିଳିଥିବା ସୂଚନା ମୁତାବକ, ଶାଜିଆଙ୍କ ମାତାପିତା ଏକ ବିବାହରେ ଯୋଗ ଦେବାକୁ ଯାଇଥିବା ବେଳେ ସୋମବାର ରାତିରେ ଘରେ ପହଞ୍ଚିଥିଲେ | ଗାଡ଼ିରେ ରଖାଯାଇଥିବା ଜିନିଷ କାଢ଼ିବା ପରେ ଶାଜିଆଙ୍କ ବାପା ପାର୍କ କରିବା ପାଇଁ ଗାଡି ଷ୍ଟାର୍ଟ କରିଥିଲେ | ହେଲେ ଶାଜିଆ ତାଙ୍କ ପଛେ ପଛେ ଘର ବାହାରକୁ ଚାଲିଆସିଛି ବୋଲି ତାଙ୍କୁ ଜଣାନଥିଲା | ଏହି କାରଣରୁ ସେ କାର ବୁଲାଇବା ବେଳେ ସାମ୍ନା ଚକ ତଳେ ଚାପି ହୋଇଯାଇଥିଲେ ଶାଜିଆ | ଚିତ୍କାର ଶୁଣି ତୁରନ୍ତ ଗାଡ଼ିରୁ ବାହାରି ଶାଜିଆଙ୍କୁ ତଳେ ପଡିଥିବା ଦେଖି ଆଶ୍ଚର୍ଯ୍ୟ ହୋଇଯାଇଥିଲେ ତାଙ୍କ ବାପା | ଏହା ପରେ ଶାଜିଆଙ୍କୁ ତୁରନ୍ତ ଡାକ୍ତରଖାନା ନିଆଯାଇଥିଲେ ବି ଡାକ୍ତର ତାଙ୍କୁ ବଞ୍ଚାଇ ପାରିନଥିଲେ |